Dual Panel1Nampa a’bicaramo Allata’ala angkana,
2"INakkemi Karaeng Allata’alanu, angngerangako assulu’ battu ri Mesir, tampa’nu nipare’ ata.
3Teako anynyombai mae ri rewata-rewata maraeng. Inakke bawang musti nusomba.
4Teako papparekkangi kalennu patung sanrapanga apa-apa niaka ri langi’, ri butta, yareka lalang ri je’ne’ irawanganna buttaya.
5Teako anynyombai ri patung kammaya anjo, nasaba’ iNakkeji Karaeng Allata’alanu, siagang taerokA’ nipasangkamma manna apa-apa mamo. Sikamma tau mangngabirissia mae ri Nakke Kuhukkungi sa’genna jari-jari lapisi’ makatalluna siagang makaappa’na.
6Mingka Kupappicinikangi pangngamaseangKu mae ri assa’bu-sa’bua jari-jarina tau mangngaia mae ri Nakke siagang mannurukia mae ri parentaKu.
7Teako tappu bawang-bawangngi arengKu, saba’ iNakke, Karaeng Allata’alanu, anghukkungi manna pole inai ampake salayai arengKu.
8Pakalompoi Allo Pammari-marianga siagang pakala’biriki anjo alloa a’jari allo matangkasa’.
9Kusareko annangallo untu’ anjama,
10mingka allo makatujua iamintu allo pammari-mariang ia nisa’laka untu’ iNakke. Anjo alloa manna sitau takkulleai anjama, baji’ naikau, kammayatompa ana’-ana’nu, ata-atannu, olo’-olo’nu yareka tau annompanga lalang ri pa’rasangannu.
11Lalang wattu annang allo, iNakke, Batara, Kupa’jari buttaya, langika, tamparanga, siagang sikontu apa niaka lalang, mingka ri makatujuna alloa ammari-mariA’. Iaminjo saba’na iNakke, Batara, Kubarakkaki Allo Pammari-marianga siagang Kusa’laki untu’ KalengKu.
12Pakala’biriki manggenu siagang amma’nu, sollanna salewangang tallasa’nu siagang la’bu umuru’nu ri pa’rasangang Kupassareanga mae ri kau.
13Teako ammunoi.
14Teako a’gau’ salimaraki.
15Teako a’lukkakki.
16Teako assarei kasa’biang takontutojeng mae ri parannu tau.
17Teako kacinnai barang-baranna parannu rupatau, kammaya: balla’na, bainenna, ata-atanna, olo’-olo’na, keledaina, yareka apa-apa mamo baranna parannu tau."
18Ri wattunna nalangngere’ taua gunturuka siagang sa’ra tarompeka, kammayatompa nacini’na kilaka siagang a’rumbu monconga, annekkere’mi ke’nanga napakamma malla’, siagang ammenteng battu bellami ke’nanga.
19Nakanamo ke’nanga ri Musa, "Ikaumo a’bicara mae ri kambe, nalanapilangngeri ikambe. Teami na Allata’ala a’bicara mae ri kambe, gassingka mateji ikambe."
20Appialimi Musa angkana, "Teako mallakki. Nabattu Allata’ala kaero’nuji Naso’ri sollanna nutuli mannuruki mae ri Ia, siagang tena nudoraka."
21Mingka tuli battu bellana ngaseng anjo taua ammenteng, siagang Musa ji bawang anreppesi anjo rammang sassanga ri tampa’ kahaderanNa Allata’ala.
22Naparentakangi Batara mae ri Musa sollanna napabattu mae ri bansa Israel angkana, "Nucini’ ngasemmi antekamma iNakke, Batara, a’bicara mae ri kau battu rate ri langika.
23Teako papparekangngi untu’ kalennu patung-patung pera’ yareka bulaeng untu’ nupakalompo pantaranganna iNakke.
24Apparekko untu’ iNakke se’re tampa’ pakkoro’bangngang battu ri butta, nampa assare mako anjoreng gimbala’ siagang sapi untu’ koro’bang tunuang siagang koro’bang untu’ passiamakkang. Ri tunggala’ tampa’ Kupattantua mae ri kau untu’ a’jari tampa’ ibadanu mae ri Nakke, labattuA’ mae ri kau siagang laKubarakkakiko.
25Punna apparekko se’re tampa’ pakkoro’bangngang batu untu’ iNakke, teako parekki battu ri batu nipaka, saba’ punna ammakeko pa’ untu’ ampuei batua, takkulleami anjo tampa’ pakkoro’bangnganga nipake untu’ iNakke.
26Teako ambangungi tampa’ pakkoro’bangngang tinggi sa’genna musti ammake pako tuka’ punna nupanaiki, sollanna tena nakacinikang apa tenaya nakkulle nicini’ ri kalennu."