Dual Panel1Nampa Nakana Batara ri Musa, "Naikko mae andallekang ri Nakke siagang Harun, Nadab, Abihu, siagang tujupulo pamimpinna bansaya, siagang su’jukko battu bella anynyomba mae ri Nakke.
2Ikauji bawang kalennu akkulle battu a’reppese’ mae ri Nakke. Maraenganga takkulleai battu a’reppese’, siagang ba’lalo ra’yaka takkulleai angngambi’ ri anne monconga."
3Jari a’lampami Musa siagang napa’la’bammi napauang anjo bansaya sikontu parentaNa siagang paratoranNa Batara. Appadami appiali ngaseng ke’nanga angkana, "Sadiami ikambe langgaukangi sikontu Nakanaya Batara."
4Le’baki anjo natulisi’mi Musa anjo sikontu parentaNa Batara. Ammukona ri bari’basaka, ambangummi se’re tampa’ pakkoro’bangngang siagang sampulo anrua batu napaenteng, ri bangkenna anjo monconga; tunggala’ anjo batu nipaentenga nawakkeli kalase’renna sikamma suku Israel.
5Nampa nasuro Musa siapa are tau rungka, siagang assaremi ke’nanga koro’bang nitunu untu’ Batara; kammayatompa ammolommi ke’nanga siapa are sapi untu’ a’jari koro’bang passiamakkang.
6Sipa’gang battu ri cera’na anjo sapia naallei Musa nampa napatiri’ antama ri siapa are katoang. Na sipa’gang maraenga napatiriki rate ri tampa’ pakkoro’bangnganga.
7Nampa naalle kitta’ parjanjianga niaka lalang nitulisi’ sikamma parentaNa Batara, nampa nalompoi sa’ranna ambacai bonena mae ri sikamma anjo bansaya. Nakana ngasemmo ke’nanga, "Sadiai ikambe lamannuruki siagang langgaukangi sikontu parentaNa Batara."
8Nampa naalle Musa anjo cera’ niaka lalang ri sikamma anjo katoanga nampa napasirang nai’ irateanna ra’yaka. Nakana Musa, "Anne ceraka a’jari panjarreki ri parjanjiang Napareka Batara siagang ikau ngaseng situru’ sikamma parentaNa."
9Nampa nai’mo Musa, Harun, Nadab, Abihu siagang anjo tujupuloa pamimping angngambi’ ri monconga.
10Na nacini’mo ke’nanga Allata’alana Israel ammenteng ri se’reang tampa’, kammaya nicini’ dapara’ laccu’, gauka tanja’na sanrapang langi’ coraya.
11Sikamma anjo pamimpinna tu Israel nacini’mi Allata’ala; mingka manna nakamma tenaja nanipanraki ke’nanga. Le’baki anjo angnganremi siagang angnginummi ke’nanga.
12Nampa Nakanamo Batara ri Musa, "Battuko mae ri Nakke irate ri monconga. Anjoreng laKusareko rua batu Kupannulisia sikontu hukkungKu. Anjo sikontu hukkunga Kupassareangi untu’ a’jari pangngajarang mae ri anjo bansaya."
13Nampa sadiamo Musa siagang pambantuna iamintu Yosua untu’ nai’ ri anjo moncong pammantanganNa Batara.
14Le’ba’mi appasang Musa mae ri sikamma pamimpinna tu Israel angkana, "Attayangko ri kemaya sa’genna ammotere’ ikambe. Nia’ji Harun siagang Hur angngagangko anrinni. Inai-nai nia’ parkarana, akkullei mange andallekang ri ke’nanga untu’ alle’bakangi urusanna."
15Angngambi’mi Musa nai’ ri Moncong Sinai, nampa nitongko’ ri rammang.
16Naummi caya kahaderanNa Batara irate ri anjo monconga na nacini’ tu Israel rapang pepe’ a’rinra rate ri coppo’na monconga. Annang allo sallona rammanga antongkoki anjo monconga; na ri allo makatujua Nakio’mi Batara anjo Musa battu ri anjo rammanga.
17(24:16)
18Napatulusu’mi Musa angngambi’ sa’genna antama’ ri anjo rammanga. Patampulo allo patampulo bangngi ammantang Musa anjoreng.