Alkitab Mobile SABDA
[VER] : [MAKASAR]     [PL]  [PB] 
 <<  Keluaran 29 >> 

1"Kammaminne carana nilanti’ Harun siagang ana’-ana’na sollanna akkulle ke’nanga allayaniA’ salaku imang. Angngalleko sikayu sapi laki rungkaya siagang ruang kayu gimbala’ laki tenaya caca’na.

2Apparekko leokang battu ri tarigu kaminang bajika tenaya nammake pa’gambang. Sipa’gang anjo leokanga musti nipareki roti siagang minynya’ zaitun, sipa’gang maraenga tena nammake minynya’, nampa la’binna nipareki kanrejawa nisapua siagang minynya’.

3Boliki lalang ri baku’ siagang passareangi anjo mae ri Nakke assama siagang koro’bang sapi laki na ruang kayu gimbala’ laki.

4Suroi Harun siagang ana’-ana’na battu ri pakke’bu’ KemaKu siagang natangkasi kalenna.

5Pipakei Harun anjo pakeang imanga: kameja, efod, juba antongkokai efodka, pa’lapa’ barambang siagang passikko’ aya’.

6Patabai anjo soro’banga ri ulunna siagang patabai anjo belo-belo bulaeng niaka ta’ukiri’, ‘Nisa’laki untu’ Batara’, mae ri anjo soro’banga.

7Nampa angngalleko minynya’ upacara, patiriki nai’ ri ulunna siagang minynyaki anjo Harun.

8Le’baki anjo, suroi ana’-ana’na battu nampa nupipakei kameja,

9siagang passikko’ aya’, nampa nupataba soro’banga irate ri ulunna ke’nanga. Kammaminjo carana nilanti’ Harun siagang ana’-ana’na. Ke’nanga siagang jari-jarina ke’nanga musti allayaniA’ salaku imang sa’genna satunggu-tungguna.

10Nampa musti nuerang anjo sapi lakia mae ri dallekanna KemaKu. Harun siagang ana’-ana’na musti napadongkoki limanna ke’nanga irate ri ulunna anjo sapia.

11Polongi anjo sapi lakia ri dallekangKu, ri pakke’bu’na Kemaya.

12Allei sipa’gang cera’na anjo sapia pasapui siagang limannu mae ri tanru’-tanru’na tampa’ pakkoro’bangnganga. La’binna anjo ceraka musti nupatiriki ri bageang rawana anjo tampa’ pakkoro’bangnganga.

13Le’baki anjo allemi sikontu janna niaka antongkoki bone parru’na, bageang kaminang bajika battu ri atenna siagang ruaya lempanna kammayatompa jannana, nampa nupadongko’ ngaseng anjo irate ri tampa’ pakkoro’bangnganga, nampa natunu a’jari passare mae ri Nakke.

14Dagenna, kukkulu’na siagang parru’ lolona anjo sapi lakia musti nitunui ri pantaranna kemaya. Iaminjo a’jari passare untu’ nipammopporanna dosana sikamma imanga.

15Nampa nualle kalase’renna anjo gimbala’ lakia. Harun siagang ana’-ana’na musti napadongkoki limanna ke’nanga irate ri ulunna anjo olo’-oloka.

16Nampa nupolong anjo gimbalaka. Allei cera’na nampa nupatiri’ mae ri appaka sa’rinna anjo tampa’ pakkoro’bangnganga.

17Anjo gimbala’ lakia musti nikere’-kereki. Bone parru’na siagang bongganna musti nibissai nampa nipadongko’ irate ri ulunna kammayatompa irate ri kere’-kere’ maraenganga.

18Passareang kabusuki anjo gimbala’ lakia irate ri tampa’ pakkoro’bangnganga untu’ a’jari koro’bang nitunu. Rasanna anjo koro’banga lanapakasannangi pa’maikKu.

19Nampa nualle pole anjo gimbala’ sikayua, iamintu gimbala’ laki untu’ upacara palantikang. Suroi Harun siagang ana’-ana’na ampadongkoki limanna ke’nanga irate ri ulunna anjo gimbalaka.

20Nampa nupolong anjo gimbala’ lakia; allei sike’de’ cera’na nampa pasapui ri leko’ tolinna bageang ri kananga Harun siagang ana’-ana’na, ri anrong karemeng bangkenna ri kananga siagang ri anrong karemeng lima kananna ke’nanga. Sesanna anjo ceraka musti nupatiriki mae ri appaka sa’rinna tampa’ pakkoro’bangnganga.

21Allei sike’de’ cera’ niaka irate ri tampa’ pakkoro’bangnganga siagang sike’de’ minynya’ upacara, nampa nupiracciki Harun siagang ana’-ana’na kammayatompa pakeanna ke’nanga. Kammaminjo carana Harun siagang ana’-ana’na kammayatompa pakeanna ke’nanga nisa’la’ untu’ iNakke.

22Allei jannana anjo gimbala’ lakia, ingkonna niaka jannana, lapisi’ jannana battu ri parru’na, bageang kaminang bajika battu ri atenna, ruaya lempanna siagang jannana, siagang bongga kananna.

23Battu ri karanjeng rotia le’baka nipassareang mae ri Nakke, allei se’re roti massing tassirupaya; sibatu nipareka siagang minynya’ zaitun, sibatu tenaya nammake minynya’, siagang sibatu kanrejawa.

24Padongko’ kabusuki anjo kanre-kanreanga ri limanna Harun siagang ana’-ana’na siagang suroi ke’nanga ampajonjoi mae ri Nakke a’jari passare nipajonjo.

25Nampa allemi anjo rotia battu ri ke’nanga siagang tunui irate ri tampa’ pakkoro’bangnganga. Rasanna anjo koro’banga lanapakasannangi pa’maikKu.

26Allei barambanna anjo gimbala’ lakia siagang passareangi untu’ a’jari koro’bang nipajonjo mae ri Nakke. Nampa iaminjo bageannu.

27Punna upacara palantikang, barambanna siagang bongganna anjo gimbala’ lakia nipakea lalang anjo upacaraya musti nipassareangi a’jari passare nipajonjo mae ri Nakke siagang nisa’laki untu’ sikamma imanga.

28Iaminne kaputusangKu tenaya nakkulle nipinra: Ri wattunna battu ummakKu ampassareangi anjo koro’bang passiamakkanga, barambanna siagang bongganna anjo olo’-oloka iami bageanna sikamma imanga. Iaminjo passarena ummakKu untu’ iNakke.

29Pakeang ibadana Harun musti nasossorangi mae ri ana’-ana’na, sollanna akkulle napake ke’nanga ri wattunna nilanti’.

30Ana’na Harun ansambeangai manggena a’jari imang siagang antamaka ri KemaKu untu’ anggaukangi ibadana ri Kamara’ Matangkasaka, musti napakei anjo pakeanga tuju allo sallona.

31Allei anjo dagenna gimbala’ laki nipakea lalang upacara palantikanna Harun siagang ana’-ana’na nampa nupallu anjo dagenga ri se’rea tampa’ matangkasa’.

32Anjo dagenga musti nakanrei ke’nanga ri pakke’bu’ KemaKu siagang sesa roti niaka ri bakuka.

33Musti nakanrei ke’nanga kanre nikoro’bangkanga lalang ri upacara pammopporang dosa ri wattunna palantikang. Imangaji bawang akkulle angkanrei kanre le’baka nisa’la’ untu’ iNakke.

34Punna ammukona bari’basa’ anjo dagenga yareka anjo rotia tassesa iji, anjo sesana musti nitunui sa’genna la’busu’, siagang takkulleai nikanre lanri le’ba’mi nisa’la’.

35Anjo upacara palantikanna Harun siagang ana’-ana’na musti tuju alloi nigaukang, kamma le’baka Kuparentakang mae ri kau.

36Tunggala’ allo musti nipassareangi sikayu sapi laki untu’ nipammopporanna dosaya. Kammaminjo lanrinna, iamintu lanri anjo koro’banga nanipakatangkasa’ anjo tampa’ pakkoro’bangnganga. Nampa musti numinynyaki anjo tampa’ pakkoro’bangnganga siagang minynya’ zaitun sollanna nisa’la’ untu’ iNakke.

37Gaukangi anjo kammaya tunggala’ allo lalang tuju allo sallona. Jari kabusu’na anjo tampa’ pakkoro’bangnganga a’jari matangkasa’mi; apa-apa mamo anseroai anjo tampa’ pakkoro’bangnganga musti nipassareangi mae ri Batara, siagang inai-nai anseroi, lanitujui ri bala lanri kagassingang matangkasa’na."

38"Tunggala’ allo untu’ satunggu-tungguna irate ri anjo tampa’ pakkoro’bangnganga musti nikoro’bangkangi ruang kayu gimbala’ umuru’ sitaunga.

39Sikayu untu’ passare bari’basa’, na sikayu untu’ passare karueng.

40Siagang anjo ana’ gimbala’ untu’ passare bari’basaka, musti nipassareang tongi se’re kilo battala’na tarigu kaminang bajika, ia nipasileoka siagang silitere’ minynya’ zaitun tenaya campuranna. Pantaranganna anjo nipassareang tongi silitere’ je’ne’ anggoro’.

41Nampa anjo ana’ gimbala’ passare untu’ karuenga, musti kamma tongi anjo batena nikoro’bangkang, nipasiagang labu’, minynya’ zaitun siagang je’ne’ anggoro’. Anjo rasanna koro’bang nitunua napakasannangi nyawaKu.

42Nampa pole untu’ tunggala’ jammang, anjo koro’bang nitunua musti nipassareangi ri dallekangKu ri pakke’bu’ KemaKu. AnjoremMa’ lasibuntulu’ siagang ummakKu siagang a’bicara mae ri kau.

43AnjorengA’ lasibuntulu’ siagang bansa Israel, na cayana kahaderangKu lampa’jari matangkasaki anjo tampaka.

44LaKupa’jari matangkasaki anjo kemaya siagang tampa’ pakkoro’bangnganga. Harun siagang ana’-ana’na laKusa’laki battu ri tau maraengannaya sollanna nalayaniA’ ke’nanga salaku imang.

45LammantangA’ ri tangnga-tangngana bansa Israel, siagang iNakke a’jari Allata’alana ke’nanga.

46Lanaassengi ke’nanga angkana iNakkemi Karaeng Allata’alana ke’nanga, ia angngerangai ke’nanga assulu’ battu ri Mesir, sollangKu akkulle ammantang ri tangnga-tangngana ke’nanga. INakke Karaeng Allata’alana ke’nanga."


  Share Facebook  |  Share Twitter

 <<  Keluaran 29 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel