Dual Panel1Bezaleel, Aholiab, siagang sikontu pajama-jama alusuka anggappai kacara’dekang siagang kaporeang battu ri Batara; naassengi ke’nanga antekamma batena nigaukang anjo jama-jamang niparalluanga ampareki KemaNa Batara. Sikontu anjo apa napareka ke’nanga musti situruki siagang apa le’baka Naparentakang Batara."
2Nakio’mi Musa anjo Bezaleel, Aholiab siagang sikontu tau anggappaya kacara’dekang battu ri Batara siagang eroka ambantu, nampa nasuro ke’nanga ampakaramulai anjo jamanga.
3Napassareammi Musa mae ri ke’nanga anjo sikontu apa napassareanga tu Israel untu’ ambangungi KemaNa Batara. Mingka tulusu’ angngeranna ija bansa Israel passare tunggala’ bari’basa’ mae ri Musa.
4Nampa a’laporo’mo mae ri Musa anjo sikamma tau anjamaya angkana, "La’bimi anjo bahang-bahang nasumbangkanga taua untu’ pambangunanna anjo jamang Naparentakanga Batara."
5(36:4)
6Jari napa’la’bammi napau Musa ri sikontu kemaya angkanaya ganna’mi anjo sumbanganga untu’ KemaNa Batara; jari tenamo nangngerang pole apa-apa taua.
7Alla’bi anjo bahang-bahang le’baka nasumbangkang ke’nanga untu’ ampa’le’baki anjo sikontu jama-jamanga.
8Nampa kaminang cara’deka ri sikamma anjo pajamaya napare’mi anjo KemaNa Batara. Anjo Kemaya napareki ke’nanga battu ri sampulo polong kaeng lenang alusu’, ia nitannunga siagang wol gau’, lame butung siagang eja, nampa nisulang siagang gambara’ malaeka’ akka’nyi’.
9Tassipolong-polonga sangkamma ngasengi ukkuranna; la’buna sampulo anrua metere’, na sangkara’na rua metere’.
10Limam polong kaeng dipasisambungi a’jari se’re layara’, na limam polong maraengannaya nipakamma tongi anjo.
11Ri birinna anjo ruaya layara’ nipapparekangi pa’gentungang battu ri kaeng gau’,
12ta’limang puloi pa’gentungang ri massing se’rea layara’, sa’genna a’jari sipasang.
13Nampa nipapparekang limampulo pakkai’ battu ri bulaeng untu’ ampa’jari se’rei anjo ruaya layara’.
14Le’baki anjo appare’mi ke’nanga pattongko’na anjo Kemaya battu ri sampulo asse’re kaeng battu ri bulu bembe.
15Tassipolonga sangkammai ukkuranna; la’buna sampulo antallu metere’ na sangkara’na rua metere’.
16Limam polong nisambungi a’jari se’re layara’, na annang polong maraengannaya nipare’ kamma tongi anjo.
17Anjo layara’ makase’rea nisarei birinna limampulo pa’gentungang na anjo layara’ makaruaya nisare tongi limampulo pa’gentungang.
18Nampa nia’ limampulo pakkai’ nipare’ battu ri tambaga untu’ ampa’jari se’rei anjo ruaya layara’, a’jari pattongko’ Kema.
19Le’baki anjo nipapparekangi rua pa’rangka’ untu’ bageang Kemaya; anjo se’rea battu ri kukkulu’ gimbala’ laki nipare’ na nikasumba eja, nampa se’reanga battu ri kukkulu’ alusu’ nipare’.
20Nampa appare’ ke’nanga rangka-rangka Kema battu ri kayu akasia, nipaenteng lambusuka nai’.
21Tasse’rea rangka ta’appa’ metere’ tinggina na sangkara’na ta’annampulo sentimetere’.
22Ri tasse’rea rangka nipapparekangi ta’rua patto’ assipasang, sa’genna anjo rangka-rangkaya akkullei nipasisambung.
23Bageang timboranga ri anjo Kemaya niparekangi ruampulo rangka,
24siagang patampulo pallangga battu ri pera’, ta’rua irawanganna tunggala’ rangkaya untu’ ruaya patto’na.
25Untu’ bageang warakkang ri anjo Kemaya niparekangi ruampulo rangka,
26siagang patampulo pallanggana battu ri pera’, ta’rua irawanganna tunggala’ rangkaya.
27Untu’ bokona Kemaya ri bageang lau’, niparekangi annang rangka
28nampa rua rangka untu’ panyingkulu’na.
29Rangka-rangkana anjo panyingkuluka nipasiallei appakkaramula battu rawa ri bangkenna sa’genna nai’ ri bageang ratena. Anjo ruaya rangka appa’jaria panyingkulu’ nipare’ kammatommi anjo.
30Jari yangasenna nia’ sagantuju rangka siagang sampulo angngannang pallangga battu ri pera’, ta’rua ri massing tasse’rea rangka.
31Nampa appare’ ke’nanga sampulo allima kayu tappalang, iamintu battu ri kayu akasia; lima untu’ rangka-rangka ri tasse’rea sa’rinna Kemaya,
32lima untu’ sa’ri maraengannaya, nampa lima pole untu’ bokona Kemaya ri bageang laukang.
33Kayu tappalang ammantang tangngaya, nipatabai bageruanna tinggina anjo rangkaya, battu ri cappa’ se’rena sa’genna ri cappa’ maraengannaya anjo Kemaya.
34Anjo rangka Kemaya siagang sikamma kayu tappalanga nilapisi siagang bulaeng, nampa nipatabai ponto-ponto bulaeng untu’ antahangi anjo kayu-kayua.
35Appare’ tongi ke’nanga kaeng pintu battu ri kaeng lenang alusu’ ia nitannunga siagang wol gau’, lame butung siagang eja, nampa nisulang siagang gambara’ malaeka’ akka’nyi’.
36Untu’ panggentunganna anjo kaenga nipapparekangi appa’ benteng battu ri kayu akasia ia nilapisika bulaeng, siagang pakkai’ bulaeng siagang nipatabaya irate ri appa’ pallangga battu ri pera’.
37Nampa nipare’ gordeng untu’ pakke’bu’ Kemaya battu ri kaeng lenang alusu’ ia nitannunga siagang wol gau’, lame butung siagang eja, siagang nibelo-beloi kaeng sulang.
38Anjo kaeng pintua nipapparekangi lima benteng ia nipasiallea siagang pakkai’-pakkai’. Sikamma cappa’na siagang panynyambunginna anjo limaya benteng nilapisiki siagang bulaeng, nampa limaya pallanggana tambaga nipare’.