Dual Panel1Bezaleel appareki Patti Parjanjiang battu ri kayu akasia; la’buna 110 sentimetere’, sangkara’na siagang tinggina massing-massing 66 sentimetere’.
2Bageang lalanna siagang pantara’na nilapisiki siagang bulaeng ti’no’, nampa nipareki les bulaeng ri tammulilina.
3Nampa appare’ appa’ ponto bulaeng untu’ kayu pa’bule’na; nampa napataba ri appaka bangkenna anjo pattia, ta’ruai ponto ri tasse’rea sa’rinna.
4Appare’ tongi kayu untu’ pa’bulekang battu ri kayu akasia, na nalapisi bulaeng,
5nampa napantama’ anjo kayu pa’buleka ri ponto niaka ri massing sa’rinna anjo pattia.
6Nampa appare’ se’re pa’rangka’ battu ri bulaeng ti’no’; la’buna 110 sentimetere’ na sangkara’na 66 sentimetere’.
7Appare’ tongi rua malaeka’ akka’nyi’, iamintu gambara’ malaeka’ akka’nyi’ battu ri bulaeng ti’no’ nide’de’,
8tasse’rei ri massing cappa’na anjo pa’rangkaka. Anjo ruaya malaeka’ akka’nyi’ nipasiallei siagang pa’rangka’na anjo pattia,
9nampa nipasidallekang, takka’rang ka’nyi’na antongkoki anjo pa’rangka’na pattia.
10Appareki Bezaleel mejang battu ri kayu akasia; la’buna 88 sentimetere’, sangkara’na 44 sentimetere’ siagang tinggina 66 sentimetere’.
11Anjo mejanga nilapisi siagang bulaeng ti’no’ nampa ri tammulilina nisarei les bulaeng.
12Nampa napare’ birinna anjo mejanga 7,5 sentimetere’ la’ba’na. Anjo birinna nasarei les bulaeng ri tammulilina.
13Appareki appa’ ponto untu’ kayu pa’bule’na nampa napataba ri appaka panyingkulu’na anjo mejanga.
14Anjo ponto untu’ pannahang pa’bulekanga nipatabai ri ampi’na biring mejanga.
15Anjo kayu pa’bulekanga kayu akasia nipare’ nampa nilapisi siagang bulaeng.
16Appare’ tongi piring-piring, cangkiri’-cangkiri’, bongki-bongki siagang mangko’-mangko’ untu’ passare je’ne’ anggoro’. Yangasenna pakkakasa’na anjo mejanga sangnging bulaeng ti’no’ ngaseng nipare’.
17Appareki Bezaleel bangkeng lampu battu ri bulaeng ti’no’. Pa’lapa’na siagang panna’gallanna battu ri bulaeng nide’de’ nipare’. Bunga-bunga pa’belo-belo, kammayatompa pucu’na siagang pammantangang pucu’na assiallei siagang panna’gallanna.
18Ri panna’gallanna nipareki annang tangke; tallu tangke ri massing tasse’rea sa’rinna.
19Ri tunggala’ tangkenna nipareki belo-belo iamintu tallu bunga badang, siagang pucu’na na pammantangang pucu’na.
20Ri panna’gallanna nipareki belo-belo iamintu appa’ bunga badang siagang pucu’na na pammantangang pucu’na.
21Irawanganna anjo massing tassipasang tangkenna nipareki se’re pucu’.
22Sikontu bangkenna anjo lampua siagang pucu’-pucuka kammayatompa tangke-tangkenna, yangasenna nipareki battu ri sipolong bulaeng ti’no’ nide’deka.
23Ri bangkenna anjo lampua nipareki tuju lampu siagang pakkakasa’ untu’ nipake antangkasi sumbu lampua siagang baki bulaeng ti’noka.
24Nia’ 35 kilo battala’na bulaeng ti’no’ niparalluang untu’ ampareki anjo bangkeng lampua siagang sikamma pakkakasa’na.
25Appareki Bezaleel se’re tampa’ pattunuang dupa battu ri kayu akasia. Anjo pattunuang dupaya appasagi pare’na; la’buna siagang sangkara’na massing-massing 45 sentimetere’ na tinggina 90 sentimetere’. Ri appa’ panyingkulu’ bageang ratena nipareki tanru’, ia assiallea siagang anjo pattunuang dupaya.
26Bageang ratena, anjo appaka sa’ri siagang tanru’-tanru’na nilapisi siagang bulaeng ti’no’, nampa ri tammulilina nipareki les bulaeng.
27Appare’ tommi rua ponto irawanganna les bulaenga, iamintu ri ruaya sa’ri untu’ antahangi kayu pa’bule’na anjo pattunuang dupaya.
28Anjo pa’bulekanga battu ri kayu akasia nipare’ siagang nilapisi bulaeng.
29Appare’ tommi Bezaleel minynya’ upacara siagang dupa kaminang bajika siagang bauka, nicampuru’ sangkamma minynya’ wangi.