Dual Panel1Bezaleel siagang Aholiab appareki pakeang ibada battu ri kaeng wol gau’, lame butung siagang eja, untu’ sikamma imanga ri wattunna nagaukang tugasa’na ke’nanga ri Kamara’ Matangkasaka. Pakeanna Imang Harun nipareki situru’ apa le’baka Naparentakang Batara mae ri Musa.
2Anjo nikanaya Efod nipareki battu ri kaeng lenang alusu’, kaeng wol gau’, lame butung siagang eja, kammayatompa bannang bulaeng.
3Ande’deki ke’nanga la’ba’-la’ba’ bulaeng, nampa nipolong-polong a’jari bannang nipisi’, nampa nitannung siagang kaeng lenang alusu’ siagang kaeng wol gau’, lame butung siagang eja.
4Le’baki anjo nipare’ tongi rua otere’ salangga passikko’ efod ia nijaika ri sa’rinna.
5Ia passikko’ aya’ tannung alusuka, ia nipareka battu ri bahang sangkammaya, siagang nijaika ri anjo efodka sa’genna assialle sangkamma Naparentakanga Batara mae ri Musa.
6Angngalusimi ke’nanga batu paramata delima nampa napataba lalang ri les bulaenga. Naukiri’ baji’mi ke’nanga areng-arenna sampuloa anrua ana’na Yakub ri anjo batu-batu paramataya.
7Nampa nipataba anjo batu-batu paramataya ri otere’ efodka salaku pappiu’rangi mae ri sampuloa anrua suku Israel, sangkamma Naparentakanga Batara mae ri Musa.
8Appareki Bezaleel siagang Aholiab pa’lapa’ barambang battu ri bahang sangkammaya siagang bahanna efodka, siagang sangkammaya todong sulanna.
9Appasagi pare’na na nilappa’ rua, sangkara’na siagang la’buna massing-massing 22 sentimetere’.
10Ri anjo pa’lapa’ barambanga nipatabai patambarrisi’ batu paramata. Ri barrisi’ makase’rea iamintu batu paramata delima, topasa’ siagang baiduri.
11Ri barrisi’ makaruaya iamintu batu paramata samru’, batu nilang siagang intang.
12Ri barrisi’ makatallua iamintu batu paramata lasuardi, batu aki’ siagang batu kacubung.
13Ri barrisi’ makaappaka iamintu batu paramata pirusu’, yaku’ siagang ratna campaka. Anjo sampuloa anrua batu paramata nisikkoki siagang bulaeng.
14Ri tunggala’ batu paramataya anjo niukiriki arenna kalase’renna sampuloa anrua ana’na Yakub a’jari pammatei pangngu’rangi mae ri suku-suku Israel.
15Nampa nipare’ rua rante battu ri bulaeng ti’no’ ia niotereka sangkamma otere’.
16Nipare’ tongi rua ponto bulaeng, ia nipatabaya ri rua cappa’ ratena anjo pa’lapa’ barambanga.
17Nampa nipantama’ anjo ruaya rante bulaeng ri anjo ponto-pontoa,
18nampa ruaya cappa’ maraenna nisikkokangi mae ri anjo ruaya les, sa’genna akkulle anjo pa’lapa’ barambanga nipasialle siagang bageang dallekanna otere’ salangganna efodka.
19Nampa nipare’ rua ponto bulaeng pole, ia nipatabaya ri anjo pa’lapa’ barambanga, ri cappa’ rawana bageang lalanga ia nitabaya ri efodka.
20Le’baki anjo nipare’mi rua ponto bulaeng ia nipasanga ri bageang ri dallekanna anjo ruaya otere’ salangganna efodka, ri ampi’na sambungang panjai’na irawa sike’de’, irateanna passikko’ aya’ nitannung alusuka.
21Situru’ parentaNa Batara mae ri Musa, anjo ponto pa’lapa’ barambanga nipasiallei siagang otere’ gau’ niaka ri ponto efodka, sa’genna anjo pa’lapa’ barambanga tuli niaki rateanna passikko’ ayaka siagang tena nata’lappasa’.
22Juba nipakea irate ri efodka, yangasenna nipareki battu ri wol gau’.
23Kallonna nikassakki siagang pita nitannung sollanna tena nagampang kekke’.
24Ri tammulilina bageang rawana nipapparekangi belo-belo rappo delima battu ri kaeng lenang alusu’ siagang wol gau’, lame butung, siagang eja, nipasialla’-allakki siagang lisere’-lisere’ bulaeng, situru’ Naparentakanga Batara mae ri Musa.
25(39:24)
26(39:24)
27Appareki ke’nanga kameja untu’ Harun siagang ana’-ana’na,
28kammayatompa soro’bang, saluara’ bodo battu ri kaeng lenang,
29siagang passikko’ aya’ battu ri kaeng lenang alusu’, wol gau’, lame butung siagang eja, nibelo-beloi siagang kaeng nisulang, sangkamma Naparentakanga Batara mae ri Musa.
30Kammayatompa nipare’ tongi belo-belo battu ri bulaeng ti’no’, a’jari pammatei angkanaya le’ba’mi ke’nanga nisa’la’ untu’ a’jari taunNa Batara. Ri anjo belo-beloa nia’ tattulisi’ kana-kana angkanaya, "Nisa’laki untu’ Batara".
31Anjo belo-beloa nipatabai ri bageang dallekanna soro’banga, situru’ Naparentakanga Batara mae ri Musa.
32Kala’busanna le’ba’ ngasemmi anjo jama-jamang appareka KemaNa Batara. Le’ba’mi nagaukang tu Israel sikamma apa Naparentakanga Batara mae ri Musa.
33Naerangi ke’nanga mae ri Musa Kemaya siagang sikontu pakkakasa’na, sikamma pakkai’na, kayu-kayu tappalanna, benteng-bentenga siagang pallanggana,
34pa’rangka’ battu ri kukkulu’ bembe laki ia nikasumba ejaya, pa’rangka’ battu ri kukkulu’ alusu’, kaeng pa’rangka’,
35Patti Parjanjiang pammantanganna ruaya batu nipannulisi Sampulo ParentaNa Allata’ala siagang kayu pa’bule’ kammayatompa pa’rangka’na,
36mejang siagang sikontu pakkakasa’na siagang roti nipatalaya,
37bangkeng lampu battu ri bulaeng ti’no’, lampu-lampuna siagang sikamma pakkakasa’na, minynya’ untu’ lampu,
38tampa’ pakkoro’bangngang battu ri bulaeng, minynya’ upacara, dupa bau’, gordeng pakke’bu’ Kema,
39tampa’ pakkoro’bangngang battu ri tambaga siagang kawa’ nianyang battu ri tambaga, kayu pa’bule’ siagang sikamma pakkakasa’na; ba’ pa’bissang siagang pa’lapara’na,
40sikamma layara’ untu’ kalli’ paranglakkeng siagang sikamma bentenna kammayatompa pallanggana, gordeng pakke’bu’ lompona paranglakkenga siagang sikamma otere’na, patto’-patto’ Kema; sikontu pakkakasa’ parallua nipake lalang ri Kemaya,
41siagang pakeang ibada untu’ sikamma imanga ri wattunna nagaukang tugasa’na ke’nanga lalang ri Kamara’ Matangkasaka, kammayatompa pakeang nisa’laka untu’ Harun siagang ana’-ana’na.
42Le’ba’mi nagaukang tu Israel sikontu jama-jamanga anjo, situru’ parentaNa Batara mae ri Musa.
43Naparessami Musa yangasenna anjo jama-jamanga na nacini’mo angkanaya le’ba’ ngasemmi napa’le’ba’ ke’nanga anjo jama-jamanga situru’ apa Naparentakanga Batara. Nampa nabarakkakimo Musa anjo ke’nanga.