1Bangngi-bangngina, ri katinroangku, kuboya tanringku lalang so’na; kuboyai, mingka sia-siaji bawang.
2Eroka’ ambangung na kua’lampa akkuliling kota, anjappai sikontu aganga siagang loronga. Eroka’ amboyai tu ta’dongkoka ri atingku; kuboyai, mingka sia-siaji bawang.
3Kubattui paronda kotaya, na kukuta’nang, "Tanucinikai tu ta’dongkoka ri atingku?"
4Silalonna kubokoi ke’nanga, kugappami tu ta’dongkoka ri atingku. Kuta’gala’mi, taeroka’ allappassangi sa’genna kuerang mange ri balla’na ammakku, ri bili’na tungnganakkangku.
5A’janjiko, he sikamma tulolonna Yerusalem, lanri sikamma jongaya siagang kijanga ri parang, angkana talanugangguai passingaianga sa’genna nipassukku’. Baine:
6Apa kutadeng anjo niaka battu ri parang lompoa, sangkamma umbu a’rumbua? Bau’na sangkammai muru’ siagang kamanynyang, siagang ba’ra’ battua ri padangganga.
7Ciniki, anjo bulekanna Salomo, nikulilingi ri annampulo tau gammara’, tau gammara’na Israel,
8niaka pangalamanna a’bundu’. Assele’ ngasengi ke’nanga pa’dang ri aya’na sadia andallekangi tau a’bakkaya ri wattu bangngi.
9Napapparekangi Salomo kalenna bulekang, battu ri kayu kaminang bajika.
10Bentenna battu ri pera’ nipare’ pammanjenganna battu ri bulaeng. Tampa’ pammempoanna cura’ lame butung tanja’na, nisulang sanna’ baji’na ri ati mate’nena tulolonna Yerusalem.
11Assulukko, he sikamma tulolonna Sion, ciniki Karaeng Salomo siagang songko’ bulaeng nipataba ri amma’na ri allo pa’buntinganna, ri allo pa’rannu-rannuanna.