Alkitab Mobile SABDA
[VER] : [MAKASAR]     [PL]  [PB] 
 <<  Mikha 4 >> 

1Ri allo-allo labattua bonto, tampa’ Balla’Na Batara, lammenteng kassaki nai’ ri langika la’biangngangi nasikamma monconga siagang bonto-bontoa. Sikontu bansaya a’balulungi mange anjoreng

2lanakana ngaseng ke’nanga, "Umba kinai’ ri bontoNa Batara ri Balla’Na Allata’alana Israel! LaNapangngajarrangi mae ri katte apa mustia nigaukang. Lanipinawangi oloanNa lanri pangngajaranNa Batara battu anjorengi ri Yerusalem; battu ri Sion a’bicara mae ri umma’Na."

3LaNatappuki Batara parkaraya ri tangnga-tangngana bansa-bansaya, ri bansa-bansa kassaka, bellaya siagang ambania. Lanade’deki sikamma pa’danna ke’nanga a’jari pa’jeko siagang sikamma pokena ke’nanga a’jari lading pa’battasa’. Bansa-bansaya tenamo nalasibunduki, tenamo nasadia ero’ sibakkai.

4Tunggala’ taua laamangi siagang salewangang lalang tallasa’na ri tangnga koko anggoro’na siagang koko poko’ arana; tenamo lampakamallaki, iaminjo janjinNa Batara Kaminang Koasaya.

5Tunggala’ bansaya ri tompo’na buttaya massing anynyombai siagang mannuruki ri massing rewata kalenna. Mingka ikatte lamannurukiki’ mae ri Karaeng Allata’alata siagang anynyomba ri Ia untu’ satunggu-tungguna.

6Nakana Batara, "Lanarapiki sallang wattunna naKupa’rappung tau Kuhukkunga, iamintu ia ke’nanga angkasiakai sessaya ri pammelakkanga.

7Nipa’jarimi ke’nanga rapang tau peso’ siagang bella battu ri butta passolongang cera’na. Mingka, battu ri anjo sikamma tau tassesaya laKupakaramulai se’re turungang beru. La’jari ke’nanga bansa lompo siagang kassa’. INakke lammarenta ri ke’nanga ri Bonto Sion sa’genna satunggu-tungguna."

8Na ikau Yerusalem, tampa’Na Allata’ala anjagai umma’Na rapang pakalawaki anjagai lokoang gimbala’na, la’jariko ammotere’ ibukotana kakaraengannu kamma riolo.

9Angngapa nungarru’ lompo kamma? Angngapa nusessa kamma rapang baine eroka ammana’? Apaka lanri tenana karaennu, siagang lanri matenamo sikamma tumappakaingaka ri kau ngaseng?

10He pandudu’ Yerusalem, ammuriang mako siagang akkunrareng mako rapang baine ammanaka! Nasaba’, kamma-kamma anne musti nubokoi kotaya nampa ammantangko ri paranga. Musti a’lampako mange ri Babel, mingka anjoreng laNalappassangko Batara battu ri musu-musunnu.

11Jaimi bansa akkumpulu’ ero’ ambundukiko, he Yerusalem! Nakana ke’nanga, "Musti niancuruki Yerusalem! Eroki ikambe anciniki anjo kotaya a’jari loro!"

12Mingka tanaassengai anjo bansa-bansaya angkanaya apa Narancanakang Batara. Tanaassengai kalenna ke’nanga angkanaya nipakkumpuluki ke’nanga untu’ nihukkung, rapang gandung nipasse’rea untu’ nipatunrung.

13Nakana Batara, "He pandudu’na Yerusalem, a’lampamako mange angngonjo’-onjokangi musunnu! LaKupakagassingko rapang sapi attanru’ bassia siagang akkanuku tambagaya. Lanuancuruki jaia bansa, siagang kakalumanynyangngang wassele’ narampasaka ke’nanga lanupassareangi mae ri Nakke, Batarana sikontu linoa."


  Share Facebook  |  Share Twitter

 <<  Mikha 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran