1Pujimi Batara! Lalang sikontu pa’maikku appala’ sukkurukka’ mae ri Batara ri tangngana pa’rappunganna umma’Na.
2Tamaka appakalannasa’na sikamma panggaukanNa Batara, siratangi nipilajari ri tau mangngaia ri Ia.
3Malompoi siagang nipuji jama-jamanNa Batara, kaadelanNa sa’genna satunggu-tungguna.
4Anjo Batara mangngamaseangi siagang manynyayangi, Nagaukang gau’-gau’ malompoa, sollanna ikatte tuli niu’rangi.
5Nasarei dalle’ tau mappilangngeria, siagang tuli Nau’rangi parjanjianNa.
6Le’ba’mi Napappicinikang koasaNa mae ri umma’Na, iamintu Nasarei ke’nanga butta pisaka bansa-bansaya.
7Adeleki siagang tamamminrayai Batara lalang sikontu tindakanNa, sikontu parentaNa akkullei nipattoang.
8Attahangi hukkunNa satunggu-tungguna, nipassareangi lalang katojengang siagang kaadelang.
9Napakabebasaki umma’Na, appareki parjanjiang mannannungang siagang ke’nanga. Iami Batara matangkasa’ siagang sannaka poreNa!
10Inai ero’ cara’de’ musti napakalompoi Batara, Nasarei pammahang sikontu tau mannurukia. Nipujimi Batara satunggu-tungguna!