1Pujimi Batara! He ata-atanNa Batara, pujimi arenNa Batara!
2ArenNa lanipa’la’bangi, anne kamma na satunggu-tungguna.
3Battu raya sa’genna kalau’ arenNa Batara musti nipuji.
4Makoasai Batara mae ri sikontu bansaya, rateanna langika kalompoanNa.
5Inai sangkammanna Karaeng Allata’alata? Ia ammempo ri empoang kala’birang ri tampa’ tinggia.
6Mingka a’dundumi naung untu’ anciniki langika siagang buttaya.
7Naangkaki tu kasi-asia battu ri limbu’buka, siagang tu kasi-asi dudua battu ri aua.
8Napaempoi ke’nanga siagang sikamma pamarentaya, siagang sikamma bija karaenga battu ri umma’Na.
9Nasarei ana’ sikamma baine tamananga, napa’jari amma’ mate’ne siagang nipakalompo ri balla’na. Pujimi Batara!