Dual Panel1Sukkurukko mae ri Batara lanri Ia bajiki, pangngamaseanNa sa’genna satunggu-tungguna.
2Siratangi tu Israel angkana, "PangngamaseanNa sa’genna satunggu-tungguna."
3Siratangi sikamma imanga angkana, "PangngamaseanNa sa’genna satunggu-tungguna."
4Siratangi sikontu tau mappilangngeria angkana, "PangngamaseanNa sa’genna satunggu-tungguna."
5Lalang kasukkarangku akkioka’ mae ri Batara; nampa appiali na Nalappassanga’.
6Tena kumalla’ lanri Narurunganga’ Batara, tena pakkullena rupataua mae ri nakke.
7Narurunganga’ Batara untu’ antulunga’, lakuciniki musungku nibeta.
8Bajikangngangi a’la’langa mae ri Batara, kala manrannuanga mae ri rupataua.
9Bajikangngangi a’la’langa mae ri Batara, kala manrannuanga mae ri bija karaenga.
10Jai musu angkulilingia’; lanri koasaNa Batara, kubetai ke’nanga.
11Natammulilia’ ke’nanga battu ri kere-keremae; lanri koasaNa Batara, kubetai ke’nanga.
12Sanrapangi cani’ ke’nanga angkatulunga’; lanri koasaNa Batara, kubetai ke’nanga. Lalang sipakkida mataji bawang nibuno ke’nanga sanrapang pepe’ angkanrei rompo’ akkatintinga.
13Teai sipato’ bateku nibakkai na sike’de’ mami kutu’guru’, mingka Natulunga’ Batara.
14Batara kagassingangku siagang panynyombangku, Iami le’ba’ ampasalamaka’.
15Pilangngerimi pakkio’ rannu ammetana ri kema-kemana umma’Na, "Nagaukangi Batara gau’ malompoa!
16KoasaNa Batara assareki’ pammetang! Nagaukangi Batara gau’ malompoa."
17Tena kulamate, mingka tuli lattallasakka’ untu’ ankabarrangi bate pare’Na Batara.
18Le’baka’ nasessa terasa’ Batara, mingka tena Napassareanga’ mae ri kamateanga.
19Sungkeanga’ pakke’bu’ lompona Balla’Na Batara, sollangku antama’ siagang appala’ sukkuru’ ri Ia.
20Iaminne pakke’bu’ lompoNa Batara, tau lambusuka bawang akkulle numalo.
21Mammujia’ mae ri Katte, saba’ Kiturukianga’ pappalakku; Kisarema’ pammetang.
22Batu nipelaka ri tukang-tukang bangunanga, a’jari batu tangnga.
23Iaminjo gau’Na Batara, tamaka malompona mae ri katte.
24Iaminne allo Napattantua Batara; umba nanipakalompoi siagang rannu.
25Napalaki ikambe, o, Batara, Kipasalamaki ikambe, o, Batara, Kisarei ikambe pammetang!
26Nibarakkakimi niaka battu lalang arenNa Batara, nibarakkakiko ri kambe battu ri Balla’Na Batara.
27Batarami Allata’ala, malammoro’ pa’maiki mae ri katte. Maju mako a’barrisi’ siagang tangke kayu ri limannu, siagang kulilingi tampa’ pakkoro’bangnganNa Batara.
28IKatte Allata’alaku, appala’ sukkurukka’ mae ri Katte, Allata’alaku, kupakalompoKi’.
29Sukkurukko mae ri Batara, saba’ Ia bajiki, pangngamaseanNa sa’genna satunggu-tungguna.