Dual Panel1Pujimi Batara! Pujimi arenNa Batara, he ikau ngaseng ata-atanNa
2a’gau’ ibadaya ri Balla’Na Batara ri pammantanganNa Allata’alata.
3Pujimi Batara, saba’ Ia bajiki, pujimi arenNa, saba’ lammoro’ pa’maiki.
4Napilei Yakub untu’ KalenNa, umma’ Israel Napa’jari Ia ampatangi.
5Saba’ kuassengi tamaka malompona Batara, Ia malompo la’biangngang nasikontu rewataya.
6Nagaukangi apa Nakaerokia, ri langi’ siagang ri butta, ri tamparang siagang ri tamparang lompo sannaka lantanna.
7Battu ri cappa’na buttaya appabattui rammang, appareki kila’ untu’ bosi. Nampa Naparenta anginga sollanna assulu’ battu ri tampa’ pammolikanNa.
8Ri Mesir Nabunoi sikontu ana’ bungasaka battu ri rupataua sa’genna olo’-oloka.
9Anjoreng Nagaukangi jai gau’ appakalannasa’ siagang tanra untu’ anghukkungi karaenga siagang sikontu pagawena.
10Jai bansa Naposso’, siagang Nabuno sikamma karaeng barania:
11Sihon karaeng Amori siagang Og karaeng Basan, kammayatompa sikontu karaenga ri Kanaan.
12Nampa napassareang pa’rasanganna ke’nanga a’jari napatang Israel, umma’Na.
13O, Batara, iKatte tuli lanikabarrang, siagang arenTa niu’rangi ri sikontu turungang,
14saba’ iKatte ampassareangi kaadelanga mae ri ummatTa, siagang angkamaseangi ata-atanTa.
15Barhalana ke’nanga iamintu battu ri bulaeng siagang pera’, bate pare’ limanna rupataua.
16Nia’ bawana, mingka takkulleai a’bicara, nia’ matanna, mingka taccinikai.
17Nia’ tolinna, mingka takkulleai allangngere’, battu ri bawana tena nappasa’ assulu’.
18Tapporo kamma tomminjo sarenna tau amparekai, siagang tau tappaka mae ri ia.
19Pujimi Batara, he umma’ Israel, pujimi, he imang-imanNa Allata’ala!
20Pujimi Batara, he sikamma tu Lewi, pujimi, he ikau ngaseng tau mappilangngeria.
21Pujimi Batara ri Sion, ri Yerusalem, tampa’ pammantanganNa. Pujimi Batara!