Dual Panel1Pammuji battu ri Daud. Akkioka’ mae ri Katte, o, Batara, Kitulung laloa’ linta’! Kipilangngeria’ punna akkioka’ mae ri Katte.
2Kitarimai pappala’ doangku lalang koro’bang dupa, siagang kupatara limangku a’jari koro’bang bangngi.
3O, Batara, Kijagai bawaku siagang Kijannangngi muncengku.
4Pakabella’ battu ri ero’ a’gau’ ja’dalaka. TeaKi’ lappassangngia’ a’rappungang siagang tau doraka siagang amminawang angnganre lalang ri passuarranna ke’nanga.
5Punna nia’ tau baji’ ampakaingaka’, siagang lambusuki pa’mai’na angngajarakka’, iaminjo sanrapang minynya’ kaminang baji’ mae ri nakke. Poro tena lalo nakutollaki, saba’ tulusu’ appala’ doangku ambaliangi kaja’dallanna ke’nanga.
6Punna sikamma pamarentana ke’nanga nipasambila battu ri tubiri’na batua, lanamangakui ke’nanga angkanaya kammatojengi kanangku.
7Lanipasiaraki buku-bukunta ri sa’rinna kuburuka sanrapang batu niancuruka naung ri buttaya.
8Mingka inakke tuli manrannuanga’ ri Katte, o, Karaeng Allata’alaku, teaKi’ balang parekangia’ mate, saba’ iKatte kupa’la’langngi.
9Kijagaia’ battu ri sikko’ nitannanga untu’ inakke, battu ri sikko’na anjo sikamma tau ja’dalaka.
10Boli’mi kamma tu’guru’ ke’nanga antama’ ri sikko’ kalenna, mingka inakke poro salamaka’.