Alkitab Mobile SABDA
[VER] : [MAKASAR]     [PL]  [PB] 
 <<  Mazmur 19 >> 

1Untu’ pamimping pakelong. Pammujina Daud. (19-2) Langi’ ampa’nyatai kalompoanNa Allata’ala, siagang allaka ancaritai bate pare’Na.

2(19-3) Allo se’rea ampabattui mae ri allo ammukoa; bangngi se’rea ancaritai mae ri bangngi poleanga.

3(19-4) Tena a’bicara yareka akkana-kana, tena sa’ra kalangngerang.

4(19-5) Mingka pakkio’Na kalangngerangi ri sikontu linoa, pappasanNa ta’rapiki sa’genna cappa’-cappa’na buttaya. Appareki Batara balla’ ri langi’ untu’ mataalloa.

5(19-6) ammumbai ri bari’basaka sanrapang bunting bura’ne assulu’ battu ri kamara’na, sanrapang tubarani eroka ampakaramulai pa’lampanna.

6(19-7) Najappai langika battu ri cappa’ se’rea mange ri cappa’ maraenga; tena tanitaba ri bambanna.

7(19-8) Anjo hukkunNa Batara sukku’ ganna’na, napakabajiki pakkasia’na nyawaya. ParentaNa Batara akkullei nipatappa’ assare kacara’dekang mae ri tu biasaya.

8(19-9) Anjo paratoranNa Batara coco’ sikali, appakasannangi pa’mai’. Anjo Napattantua Batara maci’nongi, napa’jari pahangi taua.

9(19-10) Anjo manynyombaya ri Batara bajiki, nigaukang satunggu-tungguna. Anjo hukkunNa Batara tojengi, na adele’ ngaseng.

10(19-11) Lompoangangi anggaranna HukkunNa Batara na bulaeng ti’no’, te’neangangi naje’ne’ bani tenaya bengkoro’na.

11(19-12) Yangasenna anjo mappakainga’ ri atanTa; sadiai pahala lompoa mange ri tau anturukiai.

12(19-13) Tena akkulle mangngu’rangi ri kalinguanna; o, Batara Kilappassanga’ battu ri kasalang taccokkoa.

13(19-14) Pakabella’ battu ri dosa kusangajakkia, teaKi’ lappassangngia’ nikoasai. Nakuma’jari tena callangku, kuta’lappasa’ battu ri gau’ sala lompoa.

14(19-15) Poro Kipassiratang kana-kanangku siagang nawa-nawangku ri Katte, o, Batara, pa’la’langangku siagang tumappasulukku!


  Share Facebook  |  Share Twitter

 <<  Mazmur 19 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel