Dual Panel1Battu ri Daud. Teako lussakki lanri tu ja’dalaka, teako angngiri matai mae ri tu a’gau’ salaya.
2Saba’ tasalloa nalanynya’ ke’nanga sanrapang ruku’, nakalumeng sanrapang lamung-lamung moncongbuloa.
3Tappakko ri Batara, siagang gaukangi bajika, ammantang mako ri anjo pa’rasanganga siagang teako amminrai.
4Boyai mate’nea ri Batara, Iami lampassukkukko ri nakaerokia pa’mai’nu.
5Passareangi tallasa’nu mae ri Batara, manrannuangko ri Ia, Iami lantulungko.
6Ia lampa’nyatai tamamminranu sanrapang singaraka, siagang kalambusannu sanrapang alloa.
7Pakasannangi pa’mai’nu antayangi Batara, sa’barakko antayangi sa’genna angngalle tindakang. Teako lussakki lanri baji’na nucini’ tallasa’na taua, yareka tau anggaukangai balle-ballea.
8Teako larroi siagang teako bambangi nyawanu, anjo cilakaji bawang naerang.
9Saba’ lanipa’lanynyaki tau a’gau’ ja’dalaka, mingka tu manrannuanga ri Batara lanawarisiki anjo buttaya.
10Tau ja’dalaka lanipa’lanynyaki linta’, taenami, punna niboyai.
11Tau tuna pa’maika lanawarisiki anjo buttaya, na nakasia’ kacoppongang alla’bia.
12Tu ja’dalaka a’rancanai kaja’dallang mae ri tu bajika, na birisi’ ke’nanga anciniki.
13Mingka nikakkali ri Batara tu ja’dalaka, saba’ Naassengi angkana a’reppese’mi kale’bakkanna.
14Nabi’buki pa’danna siagang napatabai ana’ panana untu’ ambunoi tu kasi-asia siagang tu pa’risika, untu’ ansamballei tu bajika ri katallassanna.
15Mingka tu ja’dalaka lanicokai ri pa’dang kalenna, lanitepoki anrong panana ke’nanga.
16Apa sike’de’ napatanga tu bajika lompoangangi anggaranna nakala’bianna tu ja’dalaka.
17Saba’ lanitepoki koasana tu ja’dalaka ri Batara, mingka tu bajika laNajagai.
18Najagai Batara katallassanna tu bajika, barang pisakana ke’nanga sa’genna satunggu-tungguna.
19Ri wattu kasukkarranna tena nalasusa ke’nanga, ri wattu kacipuranga lagannaki kaparalluanna ke’nanga.
20Mingka tu ja’dalaka lapossoki, musunNa Batara lalanynyaki sanrapang bunga ri paranga, lalanynyaki ke’nanga lalang umbua.
21Tu ja’dalaka angnginrangi na tanapoterangnga, mingka tau bajika lammoro’ pa’maiki assare.
22Tu nibarakkakia ri Batara lanawarisiki anjo buttaya, mingka laNabongkai tu Natunraya.
23Narenrengi Batara taua ri oloang mustia naolo, Napakajarreki tau Napangngellaia ri tallasa’na.
24Punna tu’guru’ tena nalasanna’ bokka’na nasaba’ nita’galaki limanna ri Batara.
25Pakkaramula ri rungkaku sa’gengku toa, tale’bakai kucini’ tau bajika nibokoi ri Batara, yareka a’jari papala’-palaki ana’ cucunna.
26Tuli appappinrangi siagang assarei, na’jari barakka’ ana’-ana’na mae ri kalenna.
27Bokoi kaja’dallanga, gaukangi bajika, na untu’ satunggu-tungguna napammantangngi turungannu anjo buttaya.
28Saba’ Nangai Batara panggaukang bajika siagang adeleka, tena Nabalang parekangi ta’ronang tau majarreka ri Ia. Najagai ke’nanga satunggu-tungguna, mingka natumpasaki turunganna tu ja’dalaka.
29Tu bajika nawarisiki anjo buttaya, na napammantangngi satunggu-tungguna.
30Tu bajika a’bicarai siagang annaba, tuli lambusuki kana-kananna.
31Naparipa’maiki hukkunNa Allata’ala, tena nadakkai anjo hukkunga.
32Tu bajika niodoki ri tu ja’dalaka a’boyai kasampatang untu’ ambunoi.
33Mingka tena nilappassangi tu’guru’ ri limanna musua, yareka nihukkung wattunna niadeli.
34Manrannuangko ri Batara siagang turuki parentaNa, na Naangkakko untu’ a’jari warisi’ ri anjo buttaya; lanuciniki nipa’lanynya’ tu ja’dalaka.
35Le’baka’ accini’ tu ja’dala’ na nangai borro pauna; sanrapangi poko’ coppong siagang lantang aka’na.
36Wattu allaloku pole, tenami kucini’, kuboyai, mingka tenami kugappa.
37Parhatikangi tau bajika siagang tau lambusu’ pa’maika; tau nangaia assiama’ bajiki allo ri bokona.
38Mingka tau dorakaya lanipossoki; turunganna ke’nanga lanipa’lanynyaki.
39Napasalamaki Batara tau bajika, Najagai ke’nanga ri wattu kasukkarranna.
40Natulungi siagang Napasalamaki ke’nanga, Nalappassangi ke’nanga battu ri tu ja’dalaka, saba’ a’la’langi ke’nanga mae ri Ia.