Dual Panel1Untu’ pamimping pakelong. Pammujina Daud. (40-2) Sa’barakka’ antayangi bantuanNa Batara; nampa Naparhatikanga’ siagang Napilangngeri pakkiokku.
2(40-3) Nabesoka’ battu lalang ri kali’bong bahayaya, battu lalang ri peo’na binangaya. Nabolika’ irate ri bulu’ batua, sa’genna baji’ dakkaku.
3(40-4) Naajaraka’ angkelongangi lagu berua lagu pammuji untu’ Allata’alata. Jai tau anciniki siagang a’jari malla’, nampa tappa’ mae ri Batara.
4(40-5) Mate’nei tau matappaka ri Batara, tenaya nanynyomba ri rewata-rewataya, yareka appala’ tulung mae ri tau tampoa.
5(40-6) O, Batara, tamaka jaina bate paretTa mae ri kambe, o, Batara Allata’alaku, iKatte tena sangkammanTa! Tamaka jaina rancana appakalannasatTa mae ri kambe, tena olona lakkulle nicarita ngaseng.
6(40-7) Passarea siagang koro’bang nipatalaya tena Kingai, koro’bang nitunu siagang koro’bang pammopporang dosa tena Kituntuki. Mingka le’ba’ma’ Kisare toli akkullea allangngereki sa’ranTa.
7(40-8) Nampa kukana, "Annemi kalengku, lalang gulungang kitta’ tattulisika untu’ inakke:
8(40-9) Sannanga’ anggaukangi erotTa, o, Allata’ala, kuparipa’maiki hukkunTa."
9(40-10) Lalang pa’rappunganna ummatTa kupabattui kabara’ bajika angkanaya iKatte le’ba’ ampasalamaki ikambe. Tena ammarina kupabattu anjo passalaka, Kiasseng ngasengi anjo sikammaya, o, Batara.
10(40-11) Tena kuboliki anjo kabara’ kasalamakkanga ri atingku, tuli kukabarrangi pannulunTa siagang tamamminraTa. Tena ku’mereki ri dallekanna pa’rappunganna ummatTa, mingka tuli kupappiassengangi pangngamaseanTa na tamamminraTa.
11(40-12) O, Batara, teaKi’ ammari angkamaseanga’; tuli Kijagaia’ siagang pangngamaseanTa na tamamminraTa.
12(40-13) Nikatulunga’ ri jai bala lompo, takkulleai nirekeng siapa jaina. Niondanga’ ri dosa-dosaku sa’gengku takkulleamo accini’. Jaiangngangi nauu’ niaka ri ulungku jaina, sa’gengku tappu’ minasa.
13(40-14) O, Batara, Kipasalama’ laloa’, o, Batara sadia maKi’ untu’ antulunga’!
14(40-15) Boli’mi kamma anjo tau eroka ambunoa’ nibetai na lari a’lingu-lingu. Boli’mi kamma anjo tau anggoraiyai kacilakangku nitunrung ammunduru’ na nihina.
15(40-16) Boli’mi kamma anjo tau angkakkalia’ a’jari ta’bangka na siri’-siri’.
16(40-17) Poro sikontu tau anynyombaya ri Katte marannu siagang ma’reja-reja, na sikontu tau mangngaia ri kasalamakkang battua ri Katte tuli nakana, "Tojeng, Malompoi Batara!"
17(40-18) Inakke anne kasi-asia’ na kulamma, mingka Naparhatikanga’ Batara. IKattemi pannulungku siagang Tumappasalamakku, teaKi’ salloi, o Allata’alaku!