1Pammujina golongang Korah. Untu’ pamimping pakelong. (47-2) Attempa-tempa limako siagang rannu, he sikontu bansaya! Pujimi Allata’ala siagang pakkio’ rannu!
2(47-3) Saba’ Batara Kaminang Tinggia teai sipato’ heba’na, Karaeng Malompo angkoasaiyai sikontu linoa.
3(47-4) Nasareki’ pammetang lompo mae ri bansa-bansaya, Napa’jariki’, makoasa mae ri suku-suku bansaya.
4(47-5) Napileangki’ tana pisaka untu’ ikatte, kalompoang pa’mai’ ri bansa Nakamaseanga.
5(47-6) Nai’mi Allata’ala ri empoang kala’biranNa, nirurungang pakkio’ rannu siagang sa’ra tarompe’.
6(47-7) Akkelongko pammuji mae ri Allata’ala, akkelongko pammuji mae ri Karaenta!
7(47-8) Allata’ala Karaeng ri sikontu linoa, pujimi siagang kelong mabaji’!
8(47-9) Ammempoi Allata’ala irate ri empoang kala’birang matangkasa’Na; ammarentai mae ri bansa-bansaya.
9(47-10) Sikamma pamimping-pamimping bansaya napasse’rei kalenna salaku umma’Na Allata’ala, napakalompoa Abraham. Saba’ Allata’ala Karaenna sikontu karaenga, sanna’ malompona siagang sanna’ mala’biri’na.