1Pammujina golongang Korah. Untu’ pamimping pakelong. (49-2) Pilangngeri, he sikontu bansaya, tannangi tolinnu, he pandudu’na linoa,
2(49-3) baji’ na tu biasaya, kammayatompa tupamimpinga, baji’ na tu kasi-asia, kammayatompa tu kalumanynyanga.
3(49-4) Lakupabattuangko kana-kana baji’, pikkirang mailalang sikaliku.
4(49-5) Lakuparhatikangi paruntu’ kanaya, nakupakasingara’ battuanna lalang akko’bikku kacapi.
5(49-6) Tena kumalla’ ri wattu kasukkarranga, ri wattungku nikatulung ri musu ja’dalaka.
6(49-7) Anjo ke’nanga kakalumanynyangnganna napattoang, siagang napattampo-tampoang pa’barang-baranganna.
7(49-8) Sitojenna tena manna sitau akkulle ampasalamaki sari’battanna, yareka a’bayara’ ampasuluki battu ri Allata’ala.
8(49-9) Manna apa nasareangi talagannaki; ta’lalo ka’jala’na lanipasulukangi nyawana,
9(49-10) sollanna akkulle a’lili battu ri kamateanga nakkulle attallasa’ satunggu-tungguna.
10(49-11) Tena, ia lanaciniki angkanaya manna tau annabaya mate tonji. Tau dongoka siagang tau toloa para lapossoki, na nabokoi barang-baranna untu’ tau maraenga.
11(49-12) Lammantangi ke’nanga ri jera’na satunggu-tungguna; iaminjo pammantanganna ke’nanga untu’ situlusu’na, manna riolo jai tanana ke’nanga.
12(49-13) Takkulleai rupataua tulusu’ lattallasa’ assannang-sannang; sanrapang olo’-olo’, laposso’ tongi.
13(49-14) Kammaminjo sarenna tau ampattoangiai kalenna, siagang allo ri bokona tau sukkuka nasa’ring ri kana-kananna.
14(49-15) Sanrapang gimbala’, nipattantui ke’nanga untu’ mate; kamateang langkalawaki ke’nanga. Ri bari’basa’ iji nibetami ke’nanga ri tau lambusuka linta’mi botto’ tubuna ke’nanga lalang ri linona tu matea, bella battu ri pammantanganna tau assannang-sannanga.
15(49-16) Mingka laNalappassanga’ Allata’ala, laNalappassanga’ battu ri koasana kamateanga.
16(49-17) Teako mallakki punna nia’ tau a’jari kalumanynyang, na pila’ katambang pa’barang-baranganna.
17(49-18) Saba’ ri wattunna mate takkulleai angngerang apa-apa, talanaerang tongi pa’barang-baranganna naung ri kiburuka.
18(49-19) Ba’lalo punna upa’ taua lalang tallasa’na, nanipalece lanri a’jarina wassele’na,
19(49-20) lanapinawang tonji boe-boena mae ri tampa’ sassanga satunggu-tungguna.
20(49-21) Takkulleai rupataua tulusu’ lattallasa’ assannang-sannang, sanrapang olo’-olo’, laposso’ tongi.