Dual Panel1Untu’ pamimping pakelong. Situru’ lagu: Bunga Bakung. Pammuji kasa’bianna Asaf. (80-2) O, Pakalawakinna Israel, Kipilangngeri laloi, iKatte ampimpingi turunganna Yusuf sanrapang pa’rappungang. IKatte ammempo irate ri empoang malaeka’ akka’nyika, maju maKi’ siagang cayaTa
2(80-3) ri dallekanna Efraim, Benyamin, siagang Manasye. Kipappicinikangi koasaTa mae ri kambe, battu maKi’ ampasalamaki ikambe.
3(80-4) O, Allata’ala, Kipammollei ikambe; lammoro’ pa’mai’ maKi’ anciniki ikambe, nalasalama’ ikambe.
4(80-5) O, Batara Allata’ala Kaminang Koasaya, sa’genna siapa salloTa lalarro, manna nappala’ doang ummatTa?
5(80-6) Kisarei ikambe karru’ untu’ sanrapang kanre, je’ne’ mata a’jari sanrapang je’ne’ inung.
6(80-7) Kibalang parekangi bansa-bansa siampi’na ikambe ampa’beserangi buttana ikambe ammakkala’ sannang ngasemmi musu-musunna ikambe.
7(80-8) O, Allata’ala Kaminang Koasaya, Kipammollei ikambe lammoro’ pa’mai’ maKi’ anciniki ikambe, sollanna salama’ ikambe.
8(80-9) UmmatTa sanrapangi poko’ anggoro’ Kipaletteka battu ri Mesir. Kibongkai bansa-bansa maraenga, nampa Kilamung anjo pokoka ri pa’rasanganna ke’nanga.
9(80-10) IKatte ansadiakangi butta ke’nanga; jari angngaka’ lantammi anjoreng a’la’ba’ mae ri sikontu pa’rasanganga.
10(80-11) Kila’langi bulu’-buluka, siagang tangke-tangkenna Kitongkoki poko’-poko’ kayu arasa’ lompo.
11(80-12) Tangke ca’dina a’la’baki sa’genna mange ri Tamparang Tangngaya, pucu’-pucu’na narapiki Binanga Efrat.
12(80-13) O, Allata’ala, angngapa Kirumbangi kalli’na, sa’genna sikamma tau allaloa akkulle ngasengi naalle rapponna?
13(80-14) Nikekkeseki ri bawi romang sa’genna panra’, na nikanre ri olo’-olo’ paranga.
14(80-15) O, Allata’ala Kaminang Koasaya, battu maKi’ ammotere’, accini’ maKi’ battu ri suruga naKiparhatikang ummatTa.
15(80-16) Kipasalamaki ummatTa sanrapang poko’ anggoro’ le’baka Kilamung kalenTa, siagang cu’la’ anggoro’ Kipakajarreka.
16(80-17) Le’ba’mi nata’bang siagang natunu musu; boli’mi kamma niancuru’ ke’nanga ri kalarroanTa.
17(80-18) Kijagai tau le’baka Kipile, ana’ rupatau Kipa’jari gassinga untu’ kalenTa.
18(80-19) Natena nalammengka maraeng ikambe battu ri Katte; Kijagai tallasa’na ikambe, nalamammuji ikambe mae ri Katte.
19(80-20) O, Karaeng Allata’ala, Kaminang Koasaya, Kipammollei ikambe, sollanna salama’ ikambe.