Alkitab Mobile SABDA
[VER] : [MAKASAR]     [PL]  [PB] 
 <<  Mazmur 81 >> 

1Untu’ pamimping pakelong. Situru’ lagu: Gitit. Battu ri Asaf. (81-2) Akkelongko pammuji-muji mae ri Allata’ala, kagassinganta, akkio’ rannuko ma’reja-reja mae ri Allata’alana Yakub.

2(81-3) Appasa’rako rabana, appasa’rako kelong, ko’bi’ bajiki gambusuka siagang kacapia.

3(81-4) Tuiki tarompeka ri allo nipakalompota, ri passua’-suarrang bulang beru siagang bulang sumara’.

4(81-5) Saba’ kammai anjo paratoranga ri Israel, se’re parenta battu ri Allata’alana Yakub.

5(81-6) Napa’jari se’re katantuang mae ri bansa Israel, ri wattunna maju angngewai Mesir. Allangngereka’ bicara tenaya nakuassengi, angkana,

6(81-7) "Le’ba’mi Kualle erangnganga ri salanggannu, naKulappassang karanjeng pisangngang niaka ri limannu.

7(81-8) Lalang kasusannu akkiokko, naKupasalamakko. Kupialiko battu ri gunturu’ tampa’ paccokkoangKu, Kuso’riko ri timbuseng je’neka ri Meriba.

8(81-9) Pilangngeri pappakaingakKu, he kau ummakKu, Israel, ebara’ angkana erokko ampilangngeriA’!

9(81-10) Tea’ laloko niakki alla maraeng ri alla’nu, tea’ laloko anynyombai ri rewata bansa maraeng.

10(81-11) INakkemi Batara Allata’alanu, anrurungangko assulu’ battu ri Mesir. Wattunnu cipuru’ Kusareko kanre.

11(81-12) Mingka ummakKu taerokai mappilangngeri ri Nakke, taeroka Israel mannuruki ri Nakke.

12(81-13) Lanri kammana Kubalang parekangi ke’nanga terasa’ ulunna; lappassammi naturuki ero’na ke’nanga.

13(81-14) Ah, ebara’ angkana eroki ummakKu mappilangngeri ri Nakke, ebara’ angkana eroki ke’nanga mannuruki ri Nakke,

14(81-15) lalintakKa’ ampatunduki musunna ke’nanga, naKubeta sikontu balinna ke’nanga.

15(81-16) Tau birisika ri ke’nanga laKupatunduki, lanihukkungi ke’nanga satunggu-tungguna.

16(81-17) Mingka ummakKu laKusarei kanre gandung nipile, naKupibassori ke’nanga siagang je’ne’ bani romang."


  Share Facebook  |  Share Twitter

 <<  Mazmur 81 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel