Dual Panel1"Iaminne hukkung-hukkung mustia nuturuki lalang sikontu umuru’ katallassannu ri pa’rasangang Napassareanga Batara, Allata’alana boe-boenu, mae ri kau.
2Punna antama’ mako ri anjo pa’rasanganga, musti nuancuru’ ngasengi sikamma tampa’-tampa’ panynyombanga irate ri moncong-moncong tinggia, ri bulu’-buluka siagang irawanganna poko’-poko’ kayu copponga leko’na, tampa’na bansa niaka ammantang anjoreng untu’ anynyomba ri rewata-rewatana ke’nanga.
3Rumbangi sikamma tampa’ pakkoro’bangnganna ke’nanga siagang allei lissarrang sikamma benteng batu nakanaya karamaki ke’nanga. Tunui gamba’-gambara’na Rewata Asyera siagang ancuruki patung-patung barhalana ke’nanga, sa’genna tenamo nakkulle nisomba poleang anjo rewata-rewata ri sikamma anjo tampaka.
4Ri wattunnu anynyomba mae ri Karaeng Allata’alanu, teako palembai carana sikamma anjo taua anynyomba ri rewata-rewatana ke’nanga.
5Ri sikontu daerana suku-suku Israel, ammilei Karaeng Allata’alanu se’re tampa’ sollanna akkulle bansata battu mange ri dallekanNa siagang anynyomba ri Ia.
6Anjoremmi ri tampaka musti nuerang sikamma koro’bang nitunua siagang sikamma koro’bang maraenganga, passare bage sampulona panggappannu siagang passare maraengannaya, koro’bang pa’bayara’ tinja’nu, koro’bang passare ero’ kalennu, kammayatompa ana’ sapi, ana’ bembe, siagang ana’ gimbala’ bungasa’ lassuka.
7Anjoreng tommi, ri dallekanNa Karaeng Allata’alanu, ikau ngaseng siagang sikamma kaluarganu musti angnganre siagang a’rannu-rannu lanri nugappana wassele’ usahanu lanri nibarakkakinna ri Karaeng Allata’alanu.
8Punna narapi’mo wattua anjo, tea’ mako appanggaukang kammai pole anne ri kamma-kammaya anne. Sa’genna kamma-kamma anne nugaukangi ibadanu situru’ pangngaina nyawanu,
9nasaba’ tenapa nuntama’ ri pa’rasangang Napassareanga Karaeng Allata’alanu mae ri kau, iamintu tampa’ akkullea nupammantangngi siagang amang situlina.
10Punna le’ba’ mako a’limbang ri Binanga Yordan, laNatulungko Karaeng Allata’alanu untu’ ampantamakki siagang ampammantangngi anjo butta niaka ri ba’leanna anjo binangaya. LaNajagaiko battu ri sikontu musua, siagang laamangko siagang salewangangko lalang tallasa’nu.
11Nampa lammile Karaeng Allata’alanu se’re tampa’ untu’ lanupake anynyomba mae ri Ia. Anjoreng mako musti a’lampa angngerangi sikontu apa kuparentakanga, iamintu koro’bang nitunua siagang sikamma koro’bang maraengannaya, koro’bang bage sampulona panggappannu siagang koro’bang nupa’janjianga mae ri Batara.
12A’rannu-rannuko ri dallekanNa Karaeng Allata’alanu, siagang sikamma ana’-ana’nu, ata-atannu siagang sikamma tu Lewi ammantanga ri kota-kotanu, lanri anjo tu Lewi tena nanggappa pambageang butta ri pa’rasangannu.
13Takkulleako ampassareangi koro’bannu ri tampa’ nupilea kalennu situru’ pangngainnu,
14mingka musti anjorengko ri tampa’ Napilea Batara. Anjoreng jako bawang musti ampassareangi koro’bang nitunua siagang anggaukangi anne apa kupassuroanga mae ri kau.
15Mingka laluasako ampolongi olo’-olo’nu siagang angkanrei dagenna manna kemaeko ammantang. Akkullei nukanre siapa-siapa jaina Nasareangko Karaeng Allata’alanu. Tunggala’ taua, baji’ tau tangkasaka kammayatompa tau ra’masaka, akkullei nakanre anjo dagenga, sangkamma akkullenu angnganre dageng kijang yareka dageng jonga.
16Mingka cera’naji bawang takkullea nukanre, passangalinna musti nutumpai naung ri buttaya sangkamma je’ne’.
17Ri tampa’ pammantangngannu takkulleako angkanrei passare bage sampulona panggappannu battu ri gandunga, battu ri anggoro’nu, battu ri minynya’ zaitunnu, battu ri sapinu, bembenu siagang gimbala’nu bungasa’ lassuka, koro’bang pa’bayara’ tinja’nu, koro’bang ero’ kalennu yareka passare maraengannaya.
18Ikau siagang ana’-ana’nu, kammayatompa sikamma ata-atannu, siagang tu Lewi ammantanga ri kotanu, musti nakanrei anjo passarea ri dallekanNa Karaeng Allata’alanu, ri tampa’ Napilea Karaeng Allata’alanu. Siagang anjoreng mako ri anjo tampaka musti a’rannu-rannu lanri sikontu wassele’ usahanu.
19Jagai gassingka nubalang parekangi tu Lewia na tena nasilolongang katallassanna lalang ammantannu ri anjo pa’rasanganga.
20Punna le’ba’mo Napakaluara’ Karaeng Allata’alanu pa’baeng-baenna pa’rasangannu sangkamma Napa’janjianga, akkulle mako angnganre dageng sipangngaina nyawanu.
21Punna bella dudu battu ri tampa’nu anjo tampa’ Napilea Karaeng Allata’alanu, akkulleko ammolong sapi sikayu, yareka gimbala’, yareka bembe Napassareanga Batara mae ri kau, siagang nukanre dagenna ri tampa’nu sipangngaina nyawanu, sangkamma le’baka kupau mae ri kau.
22Tunggala’ taua, baji’ tau tangkasaka kammayatompa tau ra’masaka, akkullei nakanre anjo dagenga, sangkamma akkullena nukanre dageng jongaya yareka dageng kijanga.
23Mingka dageng niaka ija cera’na takkulleai nukanre, lanri anjo nyawaya niaki lalang ceraka, nampa takkulleako angkanrei nyawaya siagang dagenna.
24Cera’na tena sikali nakkulle nukanre, passangalinna musti nutumpai naung ri buttaya sangkamma je’ne’.
25Punna nuturuki anjo parentaya, lasannangi pa’mai’Na Batara, siagang ikau kammayatompa jari-jarinu lasalewangangko.
26Sikontu koro’banga siagang passare le’baka nupa’janjiang mae ri Batara, musti nuerangi mange ri tampa’ Napilea Batara.
27Koro’bang nitunua siagang koro’bang nikanrea dagenna musti nipassareangi irate ri tampa’ pakkoro’bangnganNa Karaeng Allata’alanu siagang cera’na musti nitumpai ri rateanna anjo tampa’ pakkoro’bangnganga.
28Parhatikang bajiki sikontu apa le’baka kuparentakang mae ri kau, nampa nugaukang apa bajika siagang Napangngellaia Karaeng Allata’alanu, sa’genna ikau siagang jari-jarinu salamakko siagang salewangangko sa’genna satunggu-tungguna."
29"Laniancuruki ri Karaeng Allata’alanu sikamma bansa niaka ammantang ri anjo pa’rasanganga, sa’gennu akkulle ampantamakki siagang ampammantangngi.
30Punna le’baki niancuru’ anjo bansa-bansaya, tutu laloko, gassingka nuturuki ke’nanga anynyomba ri rewata-rewata maraenga, nasaba’ anjo panggaukang kammaya angngerangi bala.
31Tea’ laloko palembai carana anjo bansa-bansaya anynyomba ri rewata-rewatana ke’nanga untu’ anynyomba ri Karaeng Allata’alanu, nasaba’ anjo ke’nanga punna anynyombai nagaukangi apa-apa pallaka siagang Nakabirisia Batara. Ba’lalo manna ana’na ke’nanga natunui ke’nanga irate ri tampa’ pakkoro’bangnganga salaku koro’bang untu’ rewata-rewatana ke’nanga.
32Gaukang ngasengi sikontu apa kuparentakanga mae ri kau; teako tambai yareka teako kurangngi.