Dual Panel1"Pakalompoi Allo Lompo Paskaya ri bulang Abib untu’ ampakala’biriki Karaeng Allata’alanu, nasaba’ ri wattu iaminjo bulanga, ri wattu bangngina, naNalappassangko Batara battu ri Mesir.
2A’lampako mange ri anjo tampa’ ibadaya untu’ anynyamballe sikayu gimbala’nu yareka sapinu salaku passare Paska untu’ ampakala’biriki Karaeng Allata’alanu.
3Anjo passare Paskaya musti nupasikanrei siagang roti tenaya nammake pa’gambang. Tuju alloko musti angnganre roti tenaya nammake pa’gambang, sangkamma ri wattu nubokoina butta Mesir siagang akkaro-karo. Kanremi anjo rotia, iamintu roti niarenga roti kasessang, sollanna tuli nuu’ranginna anjo alloa lalang sikontu tallasa’nu, iamintu ri wattunna nubokoi Mesir, tampa’ nupammantangngia angkasiaki sessaya.
4Lalanna anjo tujua allo, ri sikontu pa’rasangannu tena manna sitau akkulle ammoli’ pa’gambang ri balla’na. Dageng olo’-olo’ nipolonga ri bangnginna allo makase’rea musti nikanrei sa’genna la’busu’ anjo memang bangngia.
5Olo’-olo’ untu’ Allo Lompo Paskaya musti nipolongi ri tampa’ ibada le’baka nipattantu, siagang takkulleai ri tampa’ maraeng ri sikontu pa’rasangang Napassareanga Batara mae ri kau. Anjo kammaya musti nugaukangi ri wattu labuna alloa, sangkamma ri wattunna nubokoi butta Mesir.
6(16:5)
7Pallui anjo dagenga, siagang kanrei ri tampa’ ibadaya, nampa ammoterekko mae ri balla’nu ammukona bari’basa’.
8Lalang annang allo ribokoanganna, musti angnganreko roti tenaya nammake pa’gambang. Ri makatujuna alloa musti asse’re ngasengko untu’ anynyomba ri Karaeng Allata’alanu. Teako anjamai anjo alloa."
9"Rekengi pintuju tattujui allo, appakkaramula ri allo pakkaramula akkattonu gandung,
10nampa pakalompoi Allo Lompo Pakkattoanga untu’ ampakala’biriki Karaeng Allata’alanu. Ri anjo alloa angngerangko passare ero’ kalennu mae ri Ia, situru’ jaina dalle’ Napassareanga mae ri kau.
11A’rannu-rannuko ri dallekanNa Karaeng Allata’alanu, ri anjo tampa’ le’baka Napattantu, siagang ngaseng ana’-ana’nu, ata-atannu, kammayatompa tu Lewi, tubattu-battua, ana’-ana’ kukanga siagang sikamma janda niaka ammantang ri kota-kotanu.
12Turuki sikontu parentaNa siagang pa’mai’ tamamminranu, siagang teako kaluppai angkanaya ikau riolo ata tonjako ri butta Mesir."
13"Punna le’ba’mo nulessoro’ gandunnu, siagang le’ba’ ngasemmi nipacco’ rappo anggoro’nu, musti nupakalompoi Allo Lompo Pa’ballakang Leko’-leko’ Kayua, lalang tuju allo.
14A’rannu-rannu mako siagang ana’-ana’nu, ata-atannu, tu Lewi, tubattu-battua, ana’-ana’ kukanga siagang sikamma janda niaka ammantang ri kota-kotanu.
15Tuju alloi musti nugaukang anjo passua’-suarranga untu’ ampakala’biriki Karaeng Allata’alanu ri tampa’ ibada le’baka Natantukang. A’rannu-rannu mako, lanri Nabarakkakina Karaeng Allata’alanu wassele’ buttanu siagang jama-jamannu.
16Sikontu tu bura’ne Israelka musti battui anynyomba ri Karaeng Allata’alanu ri anjo tampa’ ibadaya pintallung lalanna sitaung, iamintu ri Allo Lompo Paskaya, ri Allo Lompo Pakkattoanga siagang ri Allo Lompo Pa’ballakang Leko’-leko’ Kayua. Tunggala’ taua musti angngerangi passare,
17situru’ pakkullena, situru’ jaina dalle’ Napassareanga Karaeng Allata’alanu mae ri ia."
18"Ri tunggala’ kota Napassareanga Karaeng Allata’alanu mae ri kau, musti angngangkakko haking-haking siagang patugasa’-patugasa’ maraengannaya untu’ angngadeli kara-karana ra’yaka siagang adele’.
19Punna angngalle kaputusang ke’nanga, takkulleai ke’nanga appaero’-ero’ kalenna yareka takkulleai battala’ siali. Takkulleai ke’nanga annarima passare nipacoco’, lanri anjo passare kammaya napa’jari butai taua, ba’lalo manna tau cara’deka siagang tau lambusuka, sa’genna tena naadele’ batena ke’nanga angngalle kaputusang.
20Musti tuli adelekko, sollannu akkulle ammantang tuli siagang tallasa’ salewangang ri butta Napassareanga Karaeng Allata’alanu mae ri kau.
21Punna apparekko tampa’ pakkoro’bangngang untu’ Karaeng Allata’alanu, teako ammoliki kayu patunna Rewata Asyera ri sa’rinna,
22siagang tea tongko appaentengi benteng untu’ anynyomba mae ri rewata maraeng, lanri Nakabirisi Karaeng Allata’alanu anjo panggaukang kammaya.