Dual Panel1Nampa a’lampamo Musa ambokoi lappara’na Moab siagang angngambi’ ri Moncong Nebo, ri coppo’na Pisga irayanganna Yerikho. Anjoreng Napappicinikammi Batara mae ri ia sikontu anjo pa’rasanganga, iamintu: Daera Gilead sa’genna wara’ ri kota Dan;
2sikontu daera Naftali; daera Efraim siagang Manasye, daera Yehuda kalau’ sa’genna Tamparang Tangngaya;
3bageang timboranna Yehuda siagang lappara’ ta’bantanga battu ri Zoar sa’genna Yerikho, kota rassia siagang poko’ korma.
4Nampa Nakanamo Batara mae ri Musa, "Iaminjo pa’rasangang Kupa’janjianga mae ri Abraham, Ishak siagang Yakub untu’ nipassareang mae ri jari-jarina ke’nanga. Kupappicinikangi mae ri kau, Musa, mingka tena naKupa’biangko a’lampa mange anjoreng."
5Nampa matemo Musa, anjo atanNa Batara, ri butta Moab, sangkamma le’baka Napau riolo Batara.
6Nitarawammi ri Batara ri se’reang ka’bung ri Moab, ri ba’leanna kota Bet-Peor, mingka sa’genna anne alloa tena tau angngassengi angkana kemae jera’na.
7Sibilangngang anruampulo taung umuru’na Musa namate. Tena nakurang kagassinganna siagang baji’ iji paccini’na.
8Appare’mi upacara kasusaang bansa Israel tallumpulo allo ri lappara’na Moab lanri kamateanna Musa.
9Yosua ana’na Nun nisarei kacara’dekang ri Batara lanri iami le’ba’ nijo’jo’ ri Musa a’jari sambenna. Mannuruki bansa Israel mae ri Yosua siagang napajappami parenta-parenta Napassareanga Batara mae ri ke’nanga tete ri Musa.
10Ri Israel tenamo na’bi sangkamma Musa a’bicaraya sidallekang rupa siagang Batara.
11Tena anggaukangi gau’-gau’ malompoa siagang appakalannasaka sangkamma nagaukanga Musa mae ri pa’rasangang Mesir, karaenna siagang sikamma pagawena situru’ parentaNa Batara.
12Tena anggaukangi panggaukang-panggaukang hebaka siagang lompo sangkammaya nagaukanga Musa ri dallekanna sikontu bansa Israel.