Alkitab Mobile SABDA
[VER] : [MAKASAR]     [PL]  [PB] 
 <<  Yehezkiel 17 >> 

1Nakana Batara ri nakke, "He tau, caritai mae ri tu Israel anne pangngebarang,

2Kupabattua, iNakke Batara Kaminang Tinggia angkana: Nia’ sikayu jangang-jangang rajawali sannaka lompona, ga’ga bulunna, siagang la’baki nakassa’ ka’nyi’na. Anri’baki mange ri Moncong Libanon, annepo’ cappa’ poko’ kayu camara,

3(17:2)

4nampa naerang na napadongko’ ri se’reang kota pa’danggangang suaraka.

5Nampa angngalle sipoko’ lamung-lamung lolo battu ri butta Israel, siagang nalamungi ri se’reang koko coppong, tenaya nale’ba’ kurang je’ne’na.

6Anjo lamung-lamunga a’jari poko’ anggoro’ attimbo tena natinggi, mingka luaraki batena a’la’ba’. Sikamma tangkenna tattuju mangei ri anjo jangang-jangang rajawalia, siagang aka’-aka’na anna’gala’ jarreki lalang ri buttaya. Teai sipato’ copponna leko’na anjo poko’ anggoroka.

7Lalang kammana anjo nia’mo jangang-jangang rajawali sannaka lompona maraengang; la’baki ka’nyi’na siagang kapalaki bulunna. Nampa anjo poko’ anggoroka napitujui aka’-aka’na siagang tangke-tangkenna mae ri anjo jangang-jangang rajawali berua lanri naminasaina angkana anjo jangang-janganga akkullei assare je’ne’ la’bi jaiangngang na anjo je’ne’ niaka ri anjo kokoa.

8Padahala’ anjo poko’ anggoroka attimbomi ri butta coppong siagang alla’bia je’ne’na, sa’genna akkulle coppong leko’na, roasa’ rapponna, siagang a’jari poko’ anggoro’ baji’.

9Jari, iNakke, Batara Kaminang Tinggia akkuta’nang: Maka akkullei anjo poko’ anggoroka attallasa’ siagang a’bakka’? Maka tena nalanibi’bu’ siagang aka’-aka’na ri anjo jangang-jangang rajawali uru-urua, nampa napasinta’ rapponna, natepo’ tangke-tangkenna siagang naboli’ kalumeng? Tena naparallu jai ambukui yareka bansa pore untu’ ambi’buki anjo poko’ anggoroka sa’genna aka’-aka’na.

10Memang, attimbo kassa’mi, mingka maka akkulle attallasa’ tulusu’ siagang a’bakka’? Maka tena nalakalumeng niiri’ ri anging battu raya? Maka tena nala’jari kalotoro’ ri tampa’na nilamung?"

11Nakana Batara ri nakke,

12"Kuta’nangi anjo sikamma tau nangaia angngewa, apaka napahanji battuanna anjo pangngebaranga? Pabattuangi ke’nanga angkanaya le’ba’mi battu karaeng Babel ri Yerusalem, nampa naengka’ karaeng Yehuda siagang sikamma pamimpinna anjo kotaya mange ri Babel.

13Nampa napilei kalase’renna bijanna anjo karaeng Yehuda, appare’ parjanjiang siagang ia, siagang nasuro assumpa lamajarre’ mae ri karaeng Babel. Anjo karaeng Babel naallei sikamma tau pamimpinga siagang tau cara’deka

14sollanna takkulleamo ambangung ammotere’ anjo kakaraengang Yehuda, siagang untu’ ampattantui angkanaya anjo parjanjianga akkulle tojeng-tojengi nirupai.

15Mingka karaeng Yehuda angngewai siagang akkiringi tau mange ri Mesir untu’ appala’ jarang siagang tantara jai. Maka lania’ wassele’na anjo usahana? Maka lanilappassangi ta’lappasa’? Tena olona lanadakkai parjanjianga natena nanihukkungi!

16Lanri iNakke, Allata’ala mattallasaka, Batara Kaminang Tinggia, lamatei karaeng Yehuda ri Babel, lanri nakaluppaina sumpana siagang nadakkaina parjanjianna siagang karaeng Babel le’baka ampaempoi irate ri empoang kakaraenganga.

17Ba’lalo anjo tantara heba’na Mesir tena kullena ambantui battu ri bundu’na tu Babel appareka pannambungang-pannambungang butta siagang angngekea kaloro’-kaloro’ untu’ ambunoi tau jaia.

18Lanri nadakkaina sumpana siagang parjanjianna, takkulleai napata’lappasa’ kalenna.

19Lanri iNakke, Allata’ala mattallasaka, Batara Kaminang Tinggia, laKuhukkungi karaeng Yehuda le’baka andakkai parjanjianna siagang karaeng Babel padahala’ assumpai lalang arengKu untu’ lanarupai.

20LammuangA’ jala untu’ anjakkalaki. LaKuerangi mange ri Babel nampa Kuhukkung anjoreng, lanri tena namajarre’ mae ri Nakke.

21Tantarana kaminang bajika lamatei lalang pa’bundukang, nampa ia akkullea ta’lappasa’ laKupasisa’la’-sa’laki a’lampa kemae-kemae. Na naassemmo ke’nanga ummakKu, angkanaya iNakke, Batara anne akkana."

22Iaminne kananNa Batara Kaminang Tinggia, "Battu ri poko’ camara tinggia, laKukattiliki pucu’na nampa Kutepo’ sipappa’ tangke lolona; Kulamungi anjo tangkea ri moncong tinggia nai’ ri rammang.

23Ri moncong kaminang tinggi ri Israel Kupatinting. Anjorengi laccu’la’ siagang a’rappo nampa a’jari poko’ camara sannaka porena. Sangka’ rupa jangang-jangang la’ru’mung anjoreng siagang a’la’lang irawanganna.

24Sikontu poko’ niaka ri pa’rasangang lanapahangi angkanaya iNakke Batara. Poko’ tinggia Kuta’bangi; poko’ tenaya natinggi Kupattimboi a’jari tinggi nai’. Poko’ copponga Kupa’jari kalotoro’; na poko’ kalotoroka Kupaccu’laki siagang a’bakka’. INakke, Batara, anne akkana; na sikontu kanangKu la’rupa kabusuki."


  Share Facebook  |  Share Twitter

 <<  Yehezkiel 17 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran