Dual Panel1Nakana Batara, "He tau, a’bicarako mae ri moncong-monconna Israel siagang suroi ke’nanga ampilangngeri pasanNa Batara Kaminang Tinggia, angkana,
2‘Ri wattunna bansa-bansaya ri tammulilinu nabundukiko siagang naellakko, nahinai ke’nanga sikontu Israel. Rannui ke’nanga a’bicara angkanaya kamma-kamma anne anjo sikamma bulu’-bulu’ battu riolo dudua iami ke’nanga pata. Lanri kammana anjo he moncong-monconga siagang bulu’-buluka, pangka-pangka binangaya siagang sikamma ka’bunga, he kota-kota ancurukamo a’jari rumbangngang siagang nibokoiamo ri tau ammantanna, kammayatompa niellaka siagang nicau-caua ri bansa-bansa niaka ri tammulilina, pilangngeri apa kananNa Batara Kaminang Tinggia mae ri kau: Lalang a’rerena larroKu Kucallai bansa-bansa niaka ri tammulilinu siagang kammaya Edom, lanri rannuna anghinako, na naalle passa buttaKu siagang narampasa’ parang-parang ruku’na. Kamma-kamma anne larroA’ siagang a’jalloKa’ lanri anjo bansa-bansaya sanna’ dudu nahinanu siagang napakatunako.
3(36:2)
4(36:2)
5(36:2)
6(36:2)
7INakke, Batara Kaminang Tinggia assumpA’ angkanaya anjo bansa-bansaya ri tammulilinu lanihina tongi.
8Mingka mae ri kau Kukana he moncong-monconna Israel, poko’-poko’nu laccu’laki siagang la’rappo poleangi untu’ ummakKu Israel tenayamo nasallo nammotere’.
9Kuagangngangko he Israel, siagang Kupattantui angkanaya lanibingkungi ammotere’ buttanu siagang lanikiori bine.
10LaKutambai jaina ummakKu Israel. Lammantangi ke’nanga ri kota-kotaya siagang lanabangungi ammotere’ sikontu balla’na le’baka ancuru’ a’jari loro.
11Pandudu’nu siagang olo’-olo’nu laKutambai sa’genna a’jari sanna’ jaina, la’bi jaiangngangi narioloa, siagang lammana’-manaki naccucu ke’nanga sanna’ jaina. Lattallasaki ke’nanga anjoreng sangkamma riolo, siagang Kupa’jari kalumanynyangi, kamma tenayapa nale’ba’ nukasia’ rioloanganna. Jari lanaassemmi ke’nanga angkanaya iNakkemi Batara.
12UmmakKu Israel, laKuerangi ammotere’ untu’ mange ampammantangngi ammotere’ pa’rasanganna. Anjo buttaya la’jari napatangi ke’nanga siagang tuli lanagappai ke’nanga wassele’na, sa’genna ana’-ana’na ke’nanga tena nalamate cipuru’.
13INakke, Batara Kaminang Tinggia Kukana: Memang annabai angkana anne buttaya nigallaraki pakanre tau siagang parampasa’ ana’-ana’ — bansa ampammantangiai.
14Mingka appakkaramula kamma-kamma anne tenamo nalangnganre tau anne buttaya yareka narampasaki ana’-ana’na ke’nanga. INakke Batara Kaminang Tinggia anne akkana.
15Tenamo naparallu anne buttaya allangngereki bansa-bansaya ancau-caui yareka nihina ri taua. Anne buttaya tenamo nalanatumpasa’ bansa ampammantangiai. INakke, Batara Kaminang Tinggia anne akkana.’"
16Nakana Batara ri nakke,
17"He tau, ri wattunna ammantang tu Israel ri pa’rasangang kalenna, nara’massi anjo pa’rasanganna lanri tindakanna siagang panggaukanna ke’nanga. Kupasangkammai harang anjo panggaukanna ke’nanga, rapang baine battua bulanna.
18Kupa’betteseki larroKu mae ri ke’nanga lanri jaina pammunoang le’ba’ nagaukang ke’nanga ri anjo buttaya, kammayatompa nara’massi siagang barhala-barhalana ke’nanga.
19Kuhukkungi ke’nanga situru’ carana attallasa’ siagang panggaukanna ke’nanga, nampa kupasiara’ ke’nanga mae ri pa’rasangang maraeng.
20Manna kemae lampana ke’nanga, tuli nara’massinna arengKu matangkasaka. Nasaba’ akkanai taua kamma anne, ‘Anne bansaya umma’Na Allata’ala, mingka musti nabokoi butta Napassareanga Allata’ala mae ri ke’nanga.’
21Sanna’ Kuparhatikanna anne passalaka, lanri arengKu matangkasaka nara’massimi tu Israel, manna kemae lampana ke’nanga.
22Lanri kammana anjo, pabattui apa Kupaua, iNakke Batara Kaminang Tinggia, mae ri bansa Israel, angkana, ‘Anjo apa Kugaukanga sallang, teai lanri ikau he tu Israel, passangalinna lanri arengKu matangkasaka, ia le’baka nura’massi, manna pole kemae lampanu.
23LaKupicinikiangko anjo katangkassanna areng malompoKu, iamintu areng le’baka nura’massi ri tangnga-tangngana bansa-bansaya, sa’genna nuassemmo angkanaya iNakkemi Batara. INakke, Batara Kaminang Tinggia anne akkana. LaKupakeko untu’ ampappicinikangi mae ri bansa-bansaya angkanaya iNakke anne matangkasakKa’, Batara tenaya ruanna.
24Battu ri tunggala’ bansaya siagang pa’rasanganga, laKupa’rappungko nampa Kupoterangko mange ri butta kalennu.
25Le’baki anjo Kupiracciki mako je’ne’ ci’nong, sollannu a’jari tangkasa’ battu ri sikontu barhalanu siagang battu ri sikontu anra’massiako.
26Jari laKusare mako ati beru siagang pikkirang beru. Anjo atinnu terasa’ kammaya batu laKusambei siagang ati mannuruki.
27LaKupantamaki RohKu antama’ ri atinnu, siagang laKujagaiko sollannu attallasaka’ situru’ hukkung-hukkungKu kammayatompa nugaukang sikamma parentaKu.
28Jari lammantang mako ri butta le’baka Kupassareang mae ri boe-boenu. La’jariko ummakKu, siagang iNakke la’jari Allata’alanu.
29LaKupakabebasakko battu ri sikontu kara’massannu. LaKuparentakangi gandunga sollanna coppong timbona sa’gennu talanatujuamo kacipurang.
30Lapila’ Kupakacoppongi poko’ rappo-rappoannu siagang wassele’ koko-kokonnu, sa’genna tenamo nalanukasia’ jammang kacipuranga, anra’massiai arennu ri tangnga-tangngana bansa-bansaya.
31Lanuu’rangi panggaukang ja’dala’nu siagang anjo tindakannu tenaya nasiratang, nampa a’jari lanre mako mae ri batangkalennu lanri dosa-dosanu siagang anjo kapallakkannu.
32U’rangi, he Israel, angkanaya naKugaukang ngaseng anjo sikammaya, teai lanri ikau. Musti siri’-siriki nusa’ring siagang hinai pakkasia’nu lanri panggaukannu. INakke, Batara Kaminang Tinggia, anne akkana.’"
33Nakana Batara Kaminang Tinggia, "Punna le’ba’ mako Kutangkasi battu ri sikontu dosanu, laKupa’biang mako ammantang ammotere’ ri kota-kotanu, siagang ambangungi ammotere’ battu ri rumbanna.
34Riolo sikamma tau a’jappaya angngolo ri parang-parannu naciniki antekamma roso’na anjo buttaya, mingka laKupa’jari ammotere’ akkulle anjo buttaya nujama.
35Jari sikontu taua la’jari lannasaki lanri anjo butta rosoka sumpaeng, kamma-kamma anne a’jarimi koko Eden; siagang kota-kota sinoa riolo, ancuruki siagang a’jari loromi, kamma-kamma anne a’jarimi kota-kota kassa’ pattahanganna siagang jai pandudu’na.
36Jari bansa-bansa singngampi’na ia niaka ija, lanaassemmi angkanaya iNakke, Batara, le’ba’ ambangungi ammotere’ kota-kota ancuruka, siagang anjamai ammotere’ sikamma koko rosoka. INakke, Batara anne a’bicara, siagang mattantui laKupa’rupana kanangKu."
37Nakana Batara Kaminang Tinggia, "He bansa Israel, Kupa’biang mako ammotere’ appala’ tulung mae ri Nakke; laKutambai jainu, sanrapang pa’rappungang gimbalaka jaina.
38Kota-kota ancuruka kamma-kamma anne, larassi bonena sallang sangkamma Yerusalem ri allo-allo passua’-suarrang ri allo allaloa, rassi siagang gimbala’ eroka nipassareang. Jari nuassemmi angkanaya iNakke Batara."