Dual Panel1Nakana Batara Kaminang Tinggia, "Pakke’bu’ lompo bageang raya a’lampa mangea ri paranglakkeng bageang lalanga musti tuli tattongkoki lalang annang allo panjamanga. Anjo pakke’bu’ lompoa allo Pammari-mariang bawang siagang allo Passua’-suarrang Bulang Beru nampa akkulle nisungke.
2Ri anjo allo-allo kammaya patugasaka musti antamaki battu ri paranglakkeng bageang pantarang angngolo ri kamara’ lompoa nampa ammenteng ri sa’rinna pakke’bu’ lompoa, lalang assarena koro’bang sikamma imanga, iamintu koro’bang nitunu siagang koro’bang passiamakkang battu ri sikamma patugasaka. Anjoreng ri pakke’bu’ lompoa musti su’juki siagang anynyomba ri Batara, nampa a’lampa. Nampa takkullea nitongko’ anjo pakke’bu’ lompoa sa’genna bangngi.
3Ri dallekanna todong anjo pakke’bu’ lompoa, sikontu ra’yaka musti su’juki anynyomba ri Batara ri tunggala’ allo Pammari-marianga siagang allo lompo Bulang Berua.
4Ri allo Pammari-marianga patugasa’ pamarentaya musti assarei mae ri Batara koro’bang nitunu, iamintu annang kayu ana’ gimbala’ siagang sikayu gimbala’ laki, kabusu’na tena caca’na.
5Siagang anjo gimbala’ lakia musti nipassareang tongi koro’bang gandung iamintu 17,5 litere’, nampa tunggala’ ana’ gimbalaka musti nipassareang tongi siagang gandung situru’ nikaerokia. Tunggala’ koro’bang gandunga musti nirurungangi siagang passare tallu litere’ minynya’ zaitun.
6Ri wattu Passua’-suarranna Bulang Berua anjo passarea musti a’rupa sikayu sapi laki, annang kayu ana’ gimbala’, kammayatompa sikayu gimbala’ laki, kabusu’na tena caca’na.
7Tunggala’ sapi lakia siagang bembe lakia musti nipassareangi siagang gandung 17,5 litere’, tunggala’ ana’ gimbala’ musti nipassareangi siagang gandung, siapa-siapa mamo jaina situru’ nakaerokia. Tunggala’ koro’bang gandunga musti nipasiagangi tallu litere’ minynya’ zaitun.
8Punna ero’ patugasa’ pamarentaya anggaukangi ibadaya ri BallakKu, musti anjorengi ri kamara’ lompoa angngolo antama, kammayatompa punna ammotereki ia todong anjo naolo.
9Kabalekanna, punna ri allo-allo lompoa nabattu ra’yaka untu’ anggaukangi ibadaya mae ri Batara, battu ri pakke’bu’ lompo bageang waraki ke’nanga angngolo antama, nampa punna ammotere’ musti pakke’bu’ lompo bageang timboroka naolo punna le’ba’ ke’nanga anggaukangi ibadaya. Na ia ke’nanga antamaya battu ri pakke’bu’ lompo bageang timboroka, punna ammotereki musti pakke’bu’ lompo bageang waraka naolo. Tena nipa’biangi taua angngolo ri oloang naoloa wattunna antama; musti ammotereki ke’nanga battu ri oloang ba’leanna.
10Patugasa’ pamarentaya musti antamaki ri Balla’Na Batara assiagang ngaseng ra’yaka, siagang punna ammotereki musti siagang ngaseng tongi.
11Ri allo-allo lompoa siagang passua’-suarranga, sikamma sapi lakia siagang gimbala’ laki nipassareanga musti nipasiagangi siagang gandung 17,5 litere’, kammayatompa tunggala’ ana’ gimbalaka siapa-siapa situru’ ero’na tau anggaukangai ibadaya. Tunggala’ koro’bang gandunga musti nipasiagangi siagang passare minynya’ zaitun iamintu tallu litere’.
12Punna ero’ patugasa’ pamarentaya angngerang passare ri ero’ kalenna mae ri Batara, baji’ a’rupa koro’bang nitunu kammayatompa koro’bang passiamakkang, musti nisungkeangi pakke’bu’ lompo bageang iraya a’lampa mangea ri paranglakkeng bageang lalang. Carana ampassareangi anjo koro’banga musti sangkammai cara nagaukanga ri allo Pammari-marianga, mingka punna ammotere’mi musti nitongkoki linta’ anjo pakke’bu’ lompoa."
13Nakana Batara, "Tunggala’ allo ri wattu bari’basa’, sikayu ana’ gimbala’ umuru’ sitaunga siagang tenaya caca’na musti nipassareangi untu’ koro’bang nitunu mae ri Batara.
14Pantaranganna anjo, tunggala’ bari’basa’ musti nipassareang tongi rua kilogarang gandung siagang se’re litere’ minynya’ zaitun untu’ nipasileo’ siagang anjo gandunga. Iaminjo koro’bang gandung tunggala’ alloa musti nipassareang mae ri Batara; anjo atoranga nipakei untu’ satunggu-tungguna.
15Tunggala’ bari’basa’, musti nipassareangi mae ri Batara iamintu: sikayu ana’ gimbala’, koro’bang gandung siagang minynya’ zaitun."
16Batara Kaminang Tinggia Napassareangi anne parentaya angkana, "Punna nia’ patugasa’ pamarenta ampassareangi sipa’gang butta pisakana mae ri kalase’renna ana’ tu bura’nena, anjo buttaya a’jarimi buttana ana’ bura’nena siagang anjari barang kaluarga.
17Mingka punna anjo patugasa’ pamarentaya napassareangi sipa’gang butta pisakana mae ri sitau atanna, anjo buttaya lammotereki a’jari buttana anjo patugasa’ pamarentaya punna narapi’ Taung Pammoterang. Anjo buttaya ia ampatangi ammotere’, kammayatompa iaji bawang siagang ana’-ana’ bura’nena akkulle ampatangi anjo buttaya situlusu’na.
18Patugasa’ pamarentaya takkulleai naalle manna sike’de’ dudu barang pisakana ra’ya’na. Butta kalennaji bawang akkulle napassareang mae ri ana’-ana’ bura’nena, sa’genna tena manna sitau battu ri ummakKu akkulle nipasisa’la’ battu ri barang-baranna."
19Nampa anjo tu bura’nea naeranga’ allalo ri pakke’bu’ niaka ri sa’rinna pakke’bu’ lompoa, mange ri kamara’-kamara’ matangkasa’ a’dalle’ waraka. Anjo kamara’-kamaraka nipasadiai untu’ sikamma imanga. Anjo tu bura’nea a’jo’joki mae ri kamara’ cappa’ ilauka,
20na nakana, "Ri anne tampaka sikamma imanga musti napallu koro’bang pannangkasi dosaya siagang koro’bang passambe karugianga kammayatompa nalangga gandunga, sollanna manna sike’de’ anjo koro’bang matangkasaka tena nanierangi assulu’ ri paranglakkeng bageang pantaraka sa’genna nabalai ra’yaka."
21Nampa naeranga’ mange ri paranglakkeng bageang pantaraka, siagang napicinikiang ngasenga’ angkanaya ri appaka panyingkulu’na massing nia’ paranglakkeng la’bi ca’diangngang, la’buna 20 metere’ siagang sangkara’na 15 metere’.
22(46:21)
23Tunggala’ anjo paranglakkenga nikulilingi ri tembo’ batu, siagang ri anjo tembo’ batua nia’ pappalluang-pappalluang.
24Nakana anjo tu bura’nea ri nakke, "Iaminne pappalluang-pappalluang tampa’na palayang-palayanna Balla’Na Batara ampallui koro’bang-koro’bang passarena ra’yaka."