Dual Panel1Nakana Batara, "He tau, angngalleko pa’dang tarang nampa nupake untu’ ancukkuruki janggo’nu sa’genna la’busu’ siagang uu’nu. Nampa nutimbang anjo uu’nu ri timbanganga nampa nubage a’jari tallung bageang.
2Bage tallunna musti nutunui ri tangnga-tangngana anjo kotaya ri wattunna le’ba’mo nikurung anjo kotaya. Bage tallunna pole musti nutattaki siagang pa’dannu nanuinroi anjo kotaya. Nabage tallunna kala’busanga nupasiaraki nai’ ri allaka, nampa laKuondang siagang pa’dangku.
3Boliki sike’de’ battu ri anjo uuka siagang rokoki lalang ri lappa’na jubanu.
4Nampa allei sike’de’ pole battu ri anjo uuka, pasambilai antama’ ri pepeka, siagang lappassangi ammutung. Battu anjoreng la’le’lereki pepeka sa’genna mae ri sikontu bansa Israel."
5Nakana Batara Kaminang Tinggia, "Ciniki, iaminne Yerusalem. Anne kotaya Kuboliki ri pocci’na linoa, siagang bansa-bansa maraenga ri tammulilina.
6Mingka Yerusalem natollaki parentaKu siagang a’nassami angkana ja’dallangngangi nabansa-bansa maraenga, ba’lalo la’bi tenangngang namannuruki nabansa-bansa maraenga ri tammulilina. Nadakkai Yerusalem parenta-parentaKu siagang taerokai tundu’ mae ri hukkung-hukkungKu."
7Nakana Batara Kaminang Tinggia, "He Yerusalem, pilangngeri! Ikau tena numannuruki ri parenta-parentaKu siagang hukkung-hukkungKu; la’bi kapala batuangngangko nabansa-bansa maraeng niaka ri tammulilinu, siagang amminawang turukko mae ri kabiasanna anjo bansa-bansaya.
8Jari iNakke, Batara Kaminang Tinggia, Kupa’nassai angkanaya iNakke musunnu. LaKuhukkungko ri dallekanna bansa-bansa maraenga.
9Lanri sikontu panggaukannu tenaya Kungai, laKuhukkungi pandudu’nu sangkamma heba’na tenayapa nale’ba’ Kugaukang siagang tenaya nalaKugaukang ribokoanganna.
10Tau toaya lanakanrei ana’ kalenna siagang anaka lanakanrei tau toana. Kammami anjo batena laKuhukkung ke’nanga, siagang ia attallasaka ija laKupasiaraki mae ri sikontu tampa’ maraenga.
11INakke Allata’ala mattallasaka, Batara Kaminang Tinggia, siagang iaminne kana-kanangKu: Lanri le’ba’namo nura’massi BallakKu siagang sikontu panggaukannu ja’dalaka siagang appakaringi’-ringika, jari laKuancurukko natena Kupammopporangko.
12Bage tallunna pandudu’nu lamatei passabakkang garring siagang bala kacipurang antujuai kotaya. Bage tallunna lamate nibunoi siagang pa’dang ri pantaranganna kotaya, nampa bage tallunna pole laKupasiaraki mange-mange siagang laKuondangi siagang pa’dang.
13Lanupisa’ringi antekamma lompona pangngalarroingKu siagang pa’jallokangKu sa’genna sukku’ Kusa’ring. Punna le’ba’ ngasemmo kajariang anjo sikammaya, nampa mako latappa’ angkanaya iNakke, Batara, anne a’bicara mae ri kau lanri larroKu mae ri sipa’ tenana namattantu pa’mai’nu.
14La’jari mamako rapang loro-loro bawang, nampa sikontu bansa-bansa niaka ri tammulilinu lanacau-cauko; tunggala’ tau allaloa la’lili ngasengi ampakabellai kalenna battu ri kau.
15Punna larroA’ siagang lussaKa’ mae ri kau, kammayatompa Kuhukkungko, sikontu bansa-bansa niaka ri tammulilinu la’jari mallaki nakasia’. Lanacau-cauko siagang lanrei ancinikko.
16LaKuancuruki parsadiaang kanre-kanreannu siagang Kubalang parekangi pandudu’nu naalle cipuru’. Lanakasiaki ke’nanga pa’risi’na kacipuranga, sanrapang ana’ pana ciduka antarrusuki kalennu siagang ampanrakiko.
17Pantaranganna bala kacipuranga, lappabattu tongA’ garring, kapallakang siagang bundu’, untu’ ambunoi pandudu’nu, siagang olo’-olo’ sekkeka untu’ ambunoi ana’-ana’na ke’nanga. INakke, Batara, anne akkana."