Dual Panel1Tena nasallo Yoyakim ana’ bura’nena Yosia a’jari karaeng Yehuda,
2Nakanamo Batara ri nakke, "A’lampako mange ammenteng ri paranglakkeng luara’na BallakKu nampa a’bicara mako mae ri pandudu’na Yehuda battua anynyomba anjoreng. Pabattui mae ri ke’nanga sikontu apa Kuparentakanga mae ri kau untu’ nupabattu mae ri ke’nanga. Teako kurangngi manna sike’de’.
3Gassingka eroki anjo bansaya appilangngeri nampa ammari a’gau’ ja’dala’, sa’genna tena Kupanjari erokKu untu’ ampitujui cilaka situru’ panggaukang ja’dala’na ke’nanga."
4Nasuroa’ Batara ampaui anne mae ri ke’nanga, "INakke, Batara, le’baki Kuparentakang mae ri kau sollanna mannurukiko mae ri Nakke siagang nupajappa hukkung-hukkung le’baka Kupassareang mae ri kau.
5Musti nupilangngeri tongi apa napaua ata-atangKu, sikamma na’bi tenaya ammarina tuli Kusuro battu mae ri kau. Mingka teako ampilangngeri ke’nanga.
6Punna tuli teanu mappilangngeri, anne balla’ sambayanga laKupa’jari sangkamma Silo, sa’genna sikontu bansaya ri lino napakei arenna kota Yerusalem anne salaku kana pattunra."
7Sikontu anjo apa kupaua ri anjo Balla’Na Batara nalangngereki sikamma imanga, na’bi-na’bia, kammayatompa ra’yaka.
8Tena sallo le’ba’na kupa’la’bang sikontu anjo pasanNa Batara sangkamma Naparentakanga, najakkala’ma’ ke’nanga nampa ammarrang angkana, "Musti mateko!
9Barani tojengko a’bicara lalang arenNa Batara, angkanaya anne Balla’Na la’jari sangkammai Silo, siagang angkanaya anne kotaya laniancuruki siagang la’jari tampa’ tenamo nanipammantangngi." Nampa nikatulumma’ ri tau jaia.
10Ri wattunna nalangngere’ pagawe-pagawena pamarenta Yehuda apa kajarianga, akkaro-karomi ke’nanga assulu’ battu ri balla’ karaenga nampa a’lampa mange ri Balla’Na Batara, siagang ammempo ri Pakke’bu’ Lompo Berua.
11Nakanamo sikamma imanga siagang na’bi-na’bia ri sikamma anjo pagawe-pagawe pamarentaya siagang ra’yaka, "Anne taua siratangi nihukkung mate, lanri le’baki appasulu’ kana-kana ambaliangi anne kotata. Kau ngaseng kalennu le’ba’mi nulangngere’."
12Nampa kukanamo, "Batara assuroa’ ampabattui pasang ambaliangi Balla’Na Batara siagang anne kotaya sangkamma le’baka ngaseng nulangngere’.
13Lanri kammana pinrami gau’ katallassannu siagang panggaukang-panggaukannu; turuki Karaeng Allata’alanu, sollanna taNapa’jaria ero’Na untu’ ampitujuiko kacilakang.
14Ri sesena kalengku, memang niakka’ lalang kakoasannu siagang akkullei nugaukang situru’ apa nukaerokia mae ri kalengku.
15Mingka u’rangi, punna nubunoa’, ikau ngaseng siagang pandudu’na anne kotaya lantanggongi kasalang pammunoanga ri tau tenaya salana. Nasaba’, Batara assuroa’ untu’ ampabattui anjo pappakaingaka mae ri kau ngaseng."
16Nampa sikamma pagawe pamarentaya siagang ra’yaka nakanamo ri anjo imang-imanga siagang na’bi-na’bia, "Anne taua a’bicarai lalang arenNa Karaeng Allata’alata; tena nasiratang nihukkung mate."
17Le’baki anjo nia’mo siapa are pamimpinna anjo bansaya maju mae ri dallekang nampa nakana mae ri sikamma tau niaka a’rappung anjoreng,
18"Ri wattunna Hizkia a’jari karaeng Yehuda, Na’bi Mikha battu ri Moresyet napabattui mae ri ra’yaka anne kana battua ri Batara Kaminang Koasaya, angkana, ‘Sion lanipa’jekoi rapang koko, Yerusalem la’jari pannambungang rumbangngang, siagang Bulu’ Balla’Na Batara la’jari romangi.’
19Mingka Karaeng Hizkia siagang tu Yehuda tena nabunoi Na’bi Mikha. Ba’lalo malla’mi Hizkia mae ri Batara siagang napala’mi sollanna nanikamaseang. Jari taNapa’jariami Batara anjo ero’Na untu’ ampabattui cilakaia mae ri ke’nanga. Na kamma-kamma anne, sike’de’ mamaki’ anne appabattu cilaka lompo mae ri kalenta."
20Le’ba’ tongi nia’ tau maraengannaya a’bicara ambaliangi anne kotaya siagang bansaya lalang arenNa Batara, sangkamma kugaukanga. Anjo taua niarengi Uria ana’na Semaya battu ri Kiryat-Yearim.
21Ri wattunna Yoyakim siagang perwira-perwira tantarana, kammayatompa sikamma pagawe pamarentaya nalangngereki kana-kananna Uria, ero’mi karaenga ambunoi Uria. Mingka nalangngereki Uria anjo passalaka nampa a’jari malla’, sa’genna lari mae ri Mesir.
22Mingka Karaeng Yoyakim nasuroi Elnatan ana’na Akhbor siagang siapa are tau maraeng a’lampa mange ri Mesir na naalle Uria.
23Nampa naerang ke’nanga ammotere’ anjo Uria mange ri Karaeng Yoyakim. Nampa nasuro buno karaenga anjo Uria, na napela’ maya’na ri pa’jerakkang tau jaia.
24Mingka kamma-kamma anne lanri pannulunna Ahikam ana’na Safan, inakke Yeremia, tena nipassareanga’ mae ri ra’yaka untu’ nibuno.