Dual Panel1Le’baki anjo, yangasenna taua, lompo ca’di, siagang sikamma perwiraya, kammayatompa Yohanan ana’na Kareah siagang Azarya ana’na Hosaya battui
2mae ri nakke nampa angkana, "Bapa’, sangkamma kicinika kalenta, ikambe anne riolo jaiki’, na kamma-kamma anne sike’de’ mamaki’ ammantang. Napalaki ikambe ri katte Bapa’, nakiero’ ampappala’ doangngangi ikambe mae ri Karaeng Allata’ala kisombaya. Kipappala’ doangngangi ikambe anne niaka ija tassesa ri Karaeng Allata’ala kisombaya,
3sollanna Napicinikiangi Karaeng Allata’ala ikambe angkana kemae musti a’lampa siagang apa musti nagaukang ikambe."
4Appialima’ angkana, "Baji’mi punna kamma antu. Kutarimai pappala’nu ngaseng. Lappala’ doanga’ mae ri Karaeng Allata’alata, siagang manna pole apa pappialinNa, lakupauang ngasengko; manna se’re tania’ lakucokkoangko."
5Nakana ke’nanga ri nakke, "Napalaki ikambe ri katte sollanta appala’ doang ri Karaeng Allata’alata, lanri eroki ikambe mannuruki ri Ia, sollanna a’jari baji’ katallassanna ikambe. Jari, baji’ yareka kodi anjo pasanNa Batara, lamannuruki ikambe ri Ia. Boli’mi kamma Batara a’jari sa’bi malambusu’ siagang tamamminraya mae ri kambe, punna tena naturuki ikambe sikontu parenta Napassareanga Batara mae ri kambe tete ri katte bapa’."
6(42:5)
7Sampulo allo ribokoanganna, a’bicarami Batara ri nakke.
8Jari kukio’mi Yohanan siagang sikamma perwira-perwirana kammayatompa sikontu tau maraenga niaka naagang battu.
9Kukana ri ke’nanga, "Nusuroa’ ampabattui pappala’nu mae ri Batara, iamintu Allata’alana Israel. Jari, kammaminne kananNa Batara,
10‘Punna erokko tuli ammantang anrinni ri pa’rasanganga, laKuangkakko, tena nalaKutu’gurangko; laKupaentengko nai’, tena nalaKura’bako. Sanna’ si’nana nyawaKu lanri Kupabattuna balaya mae ri kau.
11Teako mallakki mae ri anjo karaeng Babel. NiakKa’ ri tangnga-tangnganu untu’ antulungko siagang allappassangko battu ri kakoasanna.
12Lanri mangngamaseangA’ mae ri kau, laKupa’jari karaeng Babel mangngamaseang mae ri kau siagang lanapa’biangko ammotere’. INakke, Batara, anne akkana.’"
13Mingka ikau ngaseng niaka ija ammantang ri Yehuda, teako kapala batui mae ri Karaeng Allata’alanu, siagang teako angkanai, "Teai ikambe ammantang anrinni ri pa’rasanganga. Eroki ikambe a’lampa mange ri Mesir siagang ammantang anjoreng. Anjoreng tenamo nalanakasia’ ikambe bunduka, tenamo nilangngere’ sa’ra tarompe’ akkioka untu’ a’lampa mange a’bundu’, siagang tena tommo nilasessa lanri cipuru’." Punna terasa’ pa’mai’nu untu’ a’lampa mange ri Mesir siagang ammantang anjoreng, iaminne pasanNa Batara Kaminang Koasaya, iamintu Allata’alana Israel, mae ri kau:
14(42:13)
15(42:13)
16"Anjo pa’bundukang siagang kacipurang nukamallakkanga lanaondangko sa’gennu mange ri Mesir, siagang lamateko anjoreng ri pa’rasanganga.
17Sikontu tau terasaka pa’mai’na ero’ a’lampa mange ri Mesir siagang ammantang anjoreng, lamatei lalang pa’bundukang, yareka lamatei lanri kacipurang yareka lanri garring. Tena manna sitau lata’lappasa’ battu ri bala laKupabattua mae ri ke’nanga; yangasenna lamatei.
18Sangkamma iNakke, Karaeng Allata’alana Israel Kutumpai kalarroangKu siagang kalussakkangKu mae ri pandudu’na Yerusalem, kamma tomminjo laKutumpai kalussakkangKu mae ri kau ngaseng a’lampaya mange ri Mesir. Lamallaki taua ancinikko; lanihinako, siagang lanipakei arennu a’jari kana pattunra. Tenamo nalanucini’ pole butta passolongang cera’nu."
19Nampa kukana pole, "Le’ba’mi Naparentakang Batara sollanna ikau niaka ija tassesa ri Yehuda tena nu’lampa mange ri Mesir. Lanri kammanami anjo nakupakaingakko kamma-kamma anne,
20angkanaya le’ba’ mako appare’ kasalang lompo. Nupalaki sollangku appala’ doang mae ri Karaeng Allata’alata untu’ ikau ngaseng, siagang a’janjiko untu’ anggaukangi sikontu apa Napaua Batara.
21Kamma-kamma anne le’ba’mi kupabattu pasanNa Karaeng Allata’alata mae ri kau, mingka taerokako anturuki anjo pasanga.
22Lanri kammana anjo u’rangi: ri anjo pa’rasangang eroka nubattui untu’ ammantang, lamateko lalang pa’bundukang, yareka lanri kacipurang, yareka lanri garring."