Dual Panel1Iaminne pappasang ri passala’na Babel: Rapang anging puttusu’ ammarrunga allalo ri parang lompoa, kammaminjo kabattuanna bala lompoa battu ri pa’rasangang hebaka.
2Anggappa’ pangngunju’, nakucini’ sikamma passala’ lakajarianga, sannaka appakamalla’na; iamintu nikanaya sipa’ a’bali’ ballang siagang pammanrakia. Maju mako, pasukanna Elam, a’bakka mako! He, pasukanna Madai, kurummi! LaNapa’le’ba’mi Allata’ala sikontu kapa’risang passabakkang nagaukanga Babel.
3Linguma’ kugappana anjo paccinika, sa’genna takkulleama’ accini’ siagang allangngere’. Malla’ma’ siagang pa’risi’mi kusa’ring, rapang baine lamanaka.
4Lussaki pa’maikku; annekkerekka’ napakamma malla’. Poro malla’ji naerang battu bangngi kuminasaia.
5Nia’ todong kucini’ parjamuang pa’rannu-rannuang, ia le’baka memammo nipasadia; sadia tommi empoanga untu’ sikamma undanganga. Angnganre angnginungi ke’nanga. Ti’ring nia’mo kalangngerang parenta angkana: "He, sikamma perwiraya! Pasadia ngasengi pa’lapa’ barambannu!"
6Nampa Nakanamo Batara mae ri nakke, "A’lampako ammoli’ sitau pajaga siagang suroi allaporoki apa niaka nacini’.
7Punna nia’ nacini’ pasukang a’jarang ta’rua-rua a’gimbara’ battu, pasukang a’dongko’ keledai siagang unta, musti nuparhatikang baji’-bajiki."
8Nampa ammarrammo anjo pajagaya angkana, "O, Karaeng, le’ba’ma’ a’jaga allo-allo, a’jaga allo bangngi."
9Ciniki, anjomi ke’nanga! Pasukang a’jarang ta’rua-rua a’gimbara’ battu. Nampa nakabarrammo anjo pajagaya angkana, "Runtummi Babel! Patung-patung napakalompoa ke’nanga ancuru’mi tassia’-siara’ ri buttaya."
10He bansaku Israel! Le’ba’ mako nilissarrang siagang nionjo’-onjokang rapang lisere’-lisere’ gandung. Kamma-kamma anne kupabattuangko kabara’ baji’, ia kulangngereka battu ri Batara Kaminang Makoasaya, Allata’alana Israel.
11Iaminne pappasang ri passala’na Edom. Nia’ tau akkio’ battu ri Edom mae ri nakke, nakana, "He, pajaga, sallo ijakai anne bangngia? Pirang tetteppi nampa bari’basa’?"
12Appialima’ angkana, "Labattui bari’basaka, mingka bangngia pole. Punna erokko akkuta’nang, battu poleang mako akkuta’nang."
13Iaminne pappasang ri passala’na Arab: He, tu Dedan, akkemai sikamma kapilanu ri rompo’-rompo’na butta Arab.
14He, pandudu’na butta Tema, sarei je’ne’ inung sikamma tau turere battua mae ri kau, siagang sarei kanre tau laria battu ri pa’rasanganna battu annumpang.
15Nasaba’ nalariangi kalenna ampilari pa’dang ta’bi’buka, battu ri ana’ pana nipalio-lioa, siagang battu ri pa’bundukang hebaka.
16Nampa Nakana Batara ri nakke, "Ganna’-gannaki sitaung pole lakala’busammi kaporeanna suku-suku Kedar.
17Sikamma tau papanana Kedar sangnging tau barani. Mingka sike’de’ji battu ri ke’nanga lasalama’. INakke, Karaeng, Allata’alana Israel, anne le’ba’ akkana."