Alkitab Mobile SABDA
[VER] : [MAKASAR]     [PL]  [PB] 
 <<  Yesaya 24 >> 

1LaNapanraki Batara linoa, sa’genna a’jari kalotoro’ siagang sino. LaNabulintaki bageang ratena nampa napasimbung-simbung sikamma pandudu’na.

2Sikontu taua nakasia’ ngasengi sare sangkammaya: imang-imanga siagang ra’yaka, ata niballia siagang pinggawaya, pabaluka siagang tummallia, tau appappinranga siagang tau angnginranga, kalumanynyanga siagang kasi-asia.

3Tena nasilolongang buttaya siagang laniancuruki. Le’ba’mi a’bicara kamma Batara, namattantu lakajarianna anjo kammaya.

4La’jari kalotoroki siagang kalumengi buttaya, sikontu linoa lata’ronangi. Langika siagang buttaya para lata’ronangi.

5A’jari rantasaki buttaya lanri pandudu’na nadakkai sikamma parentaNa Allata’ala, napinrai sikamma apa le’baka Napattantu Allata’ala, siagang tanarupaiyai ke’nanga parjanjiang le’baka Napare’ siagang ke’nanga untu’ satunggu-tungguna.

6Lanri kammana anjo Natunraimi Batara buttaya siagang Nahukkummi pandudu’na lanri panggaukanna ke’nanga. Nipa’jari ammutungi ke’nanga siagang sike’de’ mami battu ri ke’nanga salama’.

7Ta’ronammi poko’ anggoroka siagang sukkara’mi nigappa je’ne’ anggoroka. Tau rannua riolo kamma-kamma anne si’nami.

8Tenamo nilangngere’ ko’bi’ kacapi a’rannu-rannua siagang tunrung rabana ma’reja-rejaya. Ammarimi kasuarranna tau a’rannu-rannua.

9Tenamo tau angnginung anggoro’ siagang akkelong-kelong, tenamo tau angkasiaki nyamanna inungang terasaka.

10Kabusu’na kotaya ricu ngasemmi; sikontu pakke’bu’ ballaka takkonci ngasengi lanri malla’na ngaseng bonena.

11Lakkio’-kioki taua ri agang-aganga lanri kala’busangi ri je’ne’ anggoro’. Tenamo karannuang ri anjo pa’rasanganga sa’genna satunggu-tungguna.

12Ancuru’ taba sikalimi kotaya, sikamma pakke’bu’ lompona runtung ngasemmi tassimbung-simbung.

13Iaminjo lakajariang mae ri sikontu bansaya ri lino. Sangkamma ri wattunna pakkatoang, wattu rappo zaitun nialle sa’genna la’busu’ siagang nialle rappo anggoro’ kala’busanga battu ri poko’na.

14Sikamma tau salamaka lakkelong rannui. Tau niaka ri bageang ilau’ lanakabarrangi kalompoanNa Batara,

15na tau niaka ri bageang iraya lamammuji mae ri Ia. Pandudu’ niaka ri biring tamparanga lanapakala’biriki Batara, Allata’alana Israel.

16Battu ri cappa’na buttaya lania’ kalangngerang sa’ra kelong pammuji mae ri Israel, bansa mannurukia. Mingka inakke cilakama’! Inakke ta’ronanga’! Tau a’bali’ ballanga tuli nagaukanna a’gau’ bali’ ballanga.

17Pilangngeri, he sikontu pandudu’na buttaya! Kagegerang, tado’ siagang sikko’, niaki antayangko.

18Tau laria battu ri anjo kagegeranga latu’guruki antama’ ri sikko’ tattannanga, na tau ta’lappasaka battu ri sikkoka laniallei ri tado’. Bosi lompoa latattumpai battu rate ri langika, nampa dapara’na buttaya lata’goccangi.

19A’lattai buttaya, ta’lenggai, na ancuru’.

20Bundala’na linoa lata’royong-royongi rapang tau nasa’ring, ta’ge’goso’ rapang balla’ kepo lalang ri anging lompoa. Laruntungi buttaya lanri battala’na dosana. Ancuruki siagang takkuleai ambangung ammotere’.

21Anjo wattua laNahukkungi Batara sikamma tukoasaya ri sikontu linoa siagang sikamma karaenga ri buttaya.

22Lanipa’rappungangi ke’nanga rapang tau nitahanga lalang ri kali’bong, siagang nipantamaka ri tarungkua sa’genna narapi’ wattunna lanihukkung.

23La’jari sassangi bulanga siagang tenamo naccaya mataalloa, lanri Batara Kaminang Makoasaya ammarenta salaku Karaeng. Ia lammarentai ri Yerusalem, irate ri Bulu’ Sion, siagang Napappicinikangi kalompoanNa mae ri sikamma pamimpinna umma’Na.


  Share Facebook  |  Share Twitter

 <<  Yesaya 24 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran