Alkitab Mobile SABDA
[VER] : [MAKASAR]     [PL]  [PB] 
 <<  Yesaya 25 >> 

1Batara, iKatte Allata’alaku, kupakala’birikKi’ siagang kupuji arenTa. Saba’ sikamma bate pa’jariTa tamaka appakalannasa’na; le’ba’ Kirancana memangi battu riolo, naKimmajarre’ anggaukangi.

2Anjo kotaya le’ba’mi Kiancuru’; kota niaka balla’ pattahanganna a’jari rumbangang. Balla’ lompo nabangunga bansa maraenga cappu’mi, na tena nalanibangung poleang satunggu-tungguna.

3LanipujiKi’ ri bansa-bansa makassaka, siagang lanikamallakkangKi’ ri kota-kotana sikamma bansa pallaka.

4Saba’ iKattemi palararianna tau lammaya, tampa’ amanga mae ri tu kasi-asia lalang kasukkarranga. IKattemi pa’la’langngang battu ri anging lompoa, pa’la’langngang battu ri bambanna alloa. Saba’ tau pallaka a’bakkai rapang anging lompo ri wattu bara’,

5rapang anging bambang ri butta kalotoroka. Mingka iKatte antongkoki bawana musunna ikambe, Kipamari ammarranna sikamma tau pallaka, rapang la’lang rammang ampakadingingi bambang alloa.

6Ri Bulu’ Sion, lappasadiai Batara Kaminang Makoasaya parjamuang untu’ sikontu bansaya ri lino. Appatalai kanre kaminang nyamanga siagang anggoro’ nipilea.

7Irate ri anjo buluka laNapa’lanynyaki rammang kasi’nanga niaka antongkoki bansa-bansaya.

8LaNaancuruki Batara Kaminang Makoasaya anjo kamateanga sa’genna satunggu-tungguna! LaNasapui sikamma je’ne’ mataya battu ri rupaya, siagang Napakabella kahinanga ia natanggonga umma’Na ri sikontu buttaya. Batara anne le’ba’ akkana kamma, na mattantu lakajarianna anjo passalaka.

9Anjo wattua lanakana taua, "Sikontutojenna, Iami Allata’alata; Iami nitayanga, sollanta Napasalama’. Tojeng, Iaminne Batara; Iami nitayanga. Anne kamma akkio’ rannu maki’, saba’ le’ba’ maki’ Napasalama’."

10LaNajagai Batara Bulu’ Sion, mingka tembo’ pattahanganna Moab lanaonjo’-onjokangi rapang rarame ri tampa’ loroa.

11Pandudu’na lanapaka’rangi limanna sangkamma tau eroka a’lange. Mingka Batara laNapakatunai katampoanna ke’nanga sa’genna tena pakkullena ke’nanga.

12Sikamma tembo’ pattahanganna Moab siagang tembo’-tembo’ tinggina ke’nanga lanirumbangi nampa nipatappasa’ naung ri buttaya sa’genna ancuru’ sangkamma limbu’bu’.


  Share Facebook  |  Share Twitter

 <<  Yesaya 25 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel