Dual Panel1Anjo wattua lammakei Batara pa’dang tarang siagang kassa’ untu’ anghukkungi Lewiatan, iamintu ulara’ ammekko’-mekkoka siagang akkalu’-kaluka, kammayatompa lambunoi naga tamparanga.
2Anjo wattua laNakana Batara, "Akkelongko ri passala’ koko anggorokKu ga’gaya.
3INakke, Batara, pajagana; tunggala’ wattu Kusirangi, allo bangngi Kujagai, sollanna tena angganggui.
4Tenamo naKularro. Ebara’ angkana nia’ ruku’ yareka rompo’ katinting, laKupa’lanynyaki, laKutunui sa’genna cappu’ ngaseng.
5Mingka punna nia’ musu-musunna ummakKu mae ri Nakke a’boya pa’la’langngang, boli’mi kamma assiama’ siagang iNakke, Iyo, assiama’ siagang iNakke."
6Ri wattu labattua sallang, bansa Israel lasanrapangi poko’ kayu angngaka’ siagang a’bakka’, siagang napirassi tompo’na buttaya siagang rappo-rapponna.
7Nahukkungi Batara umma’Na, mingka tena nasangkamma battala’na punna Nahukkung bansa-bansa ammusuai ke’nanga. Tena Nabunoi umma’Na, sangkamma batena ambunoi musunNa.
8Nahukkungi Batara umma’Na, iamintu Napelaki ke’nanga mange ri pa’rasangang maraenga. Nabongkai ke’nanga siagang anging ja’dala’ niaka battu raya.
9Mingka iapa nakkulle nipammopporang dosa-dosana Israel punna nigiling sikamma tampa’ pakkoro’bangnganga mae ri rewata-rewataya sa’genna a’jari alusu’ rapang pa’leo’. Sikamma pa’dupanga siagang pannanraina rewata baine niarenga Asyera musti niancuru’ tongi.
10Anjo kota niaka pattahanganna a’jari sinomi siagang nibokoimi rapang parang luara’ tenaya bonena. Olo’-olo’ piaraya anjorengi a’ruku’ siagang ammari-mari; napila’busi sikamma leko’-leko’ kayua battu ri tangke-tangkenna.
11Punna kalotoro’mo siagang tepo’mo anjo tangke-tangke kayua, battumi bai’-bainea angngalle nampa napa’jari kayu tunuang. Anjo bansaya tena apa-apa napahang, jari tena nalanisayang yareka tena nalanikamaseang ke’nanga ri Allata’ala Mappa’jarina.
12Anjo wattua laNaparappungangi Batara bansaNa tasse’re-se’re battu ri Binanga Efrat sa’genna ri pa’baeng-baenna Mesir. LaNapasisa’laki ke’nanga rapang tau appasisa’laka lisere’ gandung battu ri awanna.
13Anjo wattua lanipasa’rai tarompe’ lompoa untu’ angkioki ammotere’ sikontu tu Israel nipelaka mange ri Asyur siagang Mesir. Labattui ke’nanga Mange ri Yerusalem untu’ anynyomba ri Batara, ri bulu’ matangkasa’Na.