Dual Panel1Nakana Allata’ala, "A’merekiko, pilangngeriA’, he sikamma pandudu’na sikamma pa’rasangang bellaya. Sadiako untu’ maju ri pangadelanga, maju mako nasorong parkaranu. Umba kissidang siagang, na nitappuki angkana inai annaba, inai sala.
2Inai ampagioki tukoasaya battu raya, siagang tulusu’ assarei pammetang? Inai assarei pakkulle untu’ ambetai sikamma bansa-bansaya, siagang napatundu’ sikamma karaenga? Pa’danna ampassimbungi ke’nanga rapang limbu’bu’, panana ampatassiaraki ke’nanga rapang rarame nairikang anging.
3Tulusuki angngondang siagang maju, tena anrompai; lintaki bangkenna, sangkamma tallanteai bangkenna ri butta.
4Inaika anggaukang ngasengi anjo sikammaya? Inaika ampattantui jappana riwayaka? INakke, Batara, iNakkemi uru-uru, siagang tuli niaka sa’genna satunggu-tungguna.
5Pandudu’na pa’rasangang bellaya naciniki apa Kugaukanga. Ta’bangkai siagang annekkereki ke’nanga lanri malla’, nampa a’rappungang na battu mae.
6Sikontu taua situlung-tulungi, siagang massing sipakajarreki ri pa’mai’na.
7Tukang kayua napakajarreki pa’mai’na tukang bulaenga, tau a’de’deka appakanipisi’ bassi siagang palu-palu, napakalompoi pa’mai’na tau a’de’deka rate ri pa’de’dekanga. Nakana, ‘Baji’ sikali bate jamanu’; nampa napakajarre’ siagang paku sollanna tagioka.
8Mingka ikau, he Israel, atangKu, umma’ Kupilea, ikau turunganna Abraham, sahabakKu.
9Kualleko battu ri cappa’-cappa’ linoa, Kukiokko battu ri tampa’-tampa’ bellaya. Kukana, ‘Ikaumi atangKu; taKutollakai bate pileKu.’
10Teako mallakki, saba’ iNakke anrurungangko, teako lussakki, saba’ iNakke Allata’alanu. LaKupakajarrekko siagang laKutulungko, Kurenrengko lalang lima makassakKu.
11Ciniki, sikontu tau larroa mae ri kau, lanibetai nammakkala’ kacci. Tau angngewayako, lapanraki nala’busu’ nibarrasa’.
12Lanuboyai tau eroka ambaliangko, mingka tanugappayai ke’nanga. Tau a’bunduka siagang ikau kamma-kamma anne panra’mi siagang tenami.
13Saba’ iNakke Batara, Allata’alanu, anta’galaki lima kanannu; kukana, ‘Teako mallakki, iNakke lantulungko.’"
14Nakana Batara, "Teako mallakki, Israel, manna nuca’di siagang lamma. INakke Batara antulungko, kaminang Matangkasaka, Allata’alana Israel, Mappasalama’nu.
15Ciniki, Kupa’jariko rapang papang-papang pallessoro’, berua, taranga, siagang rua a’gimbara’ giginna. Lanulissaraki sikamma monconga siagang nuancuru’; sikamma buluka nupa’jari rapang awang.
16Lanutapi ke’nanga, nampa niri’bakang ri anging ke’nanga nipasimbung ri anging lompo. Larannui pa’mai’nu lanri Nakke, Batara, lompoi pa’mai’nu lanri Nakke, Allata’alana Israel
17Punna a’boya je’ne’ anjo bansaKu cilakaya, nakalotoro’ karro’-karro’na lanri turere, iNakke, Batara, lampiali pappala’ doanna ke’nanga; Allata’alana Israel talanabokoiyai umma’Na.
18Kupasolongi je’neka battu ri bulu’-bulu’ a’gondoloka; lassuluki je’neka battu ri timbuseng je’neka ri tangnga-tangngana lapparaka. Parang lompoa laKupa’jari kollang; lassuluki je’neka battu ri butta kalotoroka.
19Parang lompoa laKulamungi poko’ camara, poko’ zaitun, poko’ mura’, siagang poko’ akasia. Parang luaraka laKupa’jari romang, romang eru, berangang, siagang camara.
20Na sikontu taua lanaciniki siagang lanaassengi angkana iNakke, Batara, anggaukangi anjo. Lanaparhatikangi siagang lanapahangi ke’nanga, Allata’ala matangkasa’na Israel ampa’jari anjo kammaya."
21Batara, karaenna Israel, angkana ri rewata-rewataya, "Pamajumi parkaranu, paumi alasang-alasanna!
22Battu mako mae, siagang tappu riolomi apa lakajarianga, sollanna naasseng ikambe antekamma sallang kale’bakkanna. Paumi sikamma kajariang-kajariang rioloa, pakasingara’mi battuanna sollanna naparhatikangi ikambe.
23Paumi apa lakajarianga, sollanna naasseng ikambe angkana ma’nassa batara tojengko. Gaukammi a’matu-matua yareka appakarugia, sollanna lannasa’ ikambe anciniki.
24Sikontutojenna, ikau siagang panggaukannu, anu tena apa-apa, siagang tau anynyombaya ri kau appakaringi’-ringi’ji bawang.
25Nia’mo sitau Kupagio’ battu raya: Kukioki untu’ a’bakka battu wara’. Sikamma tukoasaya lanaonjo’-onjokangi rapang peo’, rapang papare’ uring butta angngonjo’-onjokang butta pi’.
26Inai ri kau akkulle antappu rioloi sa’genna akkulle ikambe ampattojengi? Mingka tena ri kau akkulle ampaui, tena tau allangngerekko le’ba’ a’bicara.
27INakke, Batara, uru angkabarrangi mae ri Sion; iNakke akkiring tau angngerang kabara’ baji’ mae ri Yerusalem.
28Ri wattunna Kuboya ri alla’na rewata-rewataya, tena manna se’re akkulle assare pitunju’, tena akkulle appiali.
29Tojeng, anjo rewata-rewataya tena matu-matunna, patung nipare’ji ke’nanga, tenaya kullena, tenaya nakkulle appare’ apa-apa."