Dual Panel1Pilangngeri kelongku ri sesena koko anggoro’na sahabakku. Nia’ koko anggoro’na sahabakku ri bulu’ copponga buttana.
2Nabingkungi buttana, na napela’ batu-batunna. Nalamungi anggoro’ nipile nambangung balla’ tinggi pa’jagang. Angngekei se’re kali’bong tampa’ pammaccokang anggoro’na, nampa attayang rappo ti’noka, mingka kacci wassele’ rappo anggoro’na.
3Jari kamma-kamma anne nakanamo sahabakKu, "Ikau ngaseng, pandudu’na Yerusalem siagang Yehuda, adelima’ iNakke siagang koko anggorokKu.
4Apapi pole musti Kugaukang, mingka tenapa Kugaukangi mae ri anjo koko anggorokKu? Angngapa narappo kacci narappoang, teai rappo baji’ sangkamma Kuminasaia?
5Kammaminne laKugaukang ri anjo koko anggorokKu: LaKubi’buki kalli’na angkulilingiai, laKurumbangi tembo’ niaka angkalliki, nampa Kubalang parekang napanraki olo’-olo’ sekke’ siagang naonjo’-onjokang.
6LaKubalang parekangi natimboi ruku’-ruku’ liara’. Tena nalaKuparakai poko’ anggoro’na, siagang tena nalaKusangkoi. Ba’lalo Kubalang parekangi nitongko’ ri ruku’ siagang rompo’ akkatinting, ba’lalo Kupisangkai rammanga ampitu’guri bosi."
7Saba’ koko anggoro’Na Batara Kaminang Koasaya iamintu umma’ Israel, siagang tu Yehuda iami poko’ anggoro’ Nalamunga. Battu ri ke’nangami Naminasai kaadelanga, mingka kapallakkanji napa’nia’. Naminasai ke’nanga appaenteng katojengang, mingka karru’ji appala’ kaadelang napanai’.
8Cilakako sikamma ammallia balla’ siagang angngalle passaya koko untu’ antambai barang-barannu! Tenamo nasallo nacappu’ tampaka untu’ tau maraenga sa’genna ikau mami ammantang ri anjo pa’rasanganga.
9Kulangngereki Batara Kaminang Makoasaya assumpa angkana, "Anne sikamma balla’ lompoa siagang ga’gaya lakosong ngasengi tena bonena.
10Tena nala’jari wassele’ buttana, koko anggoro’na niaka sampulo hetto luara’na, sampuloji litere’ je’ne’ anggoro’ wassele’na. Sibilangngang litere’ bibi’ gandung nalamung, na sampuloji litere’ wassele’na."
11Cilaka mako kau! Battu ri bari’basa’ sa’genna bangngi iaji bawang nugaukang angnginunga inungang terasa’ siagang nasa’ringa.
12Nia’ ri pa’gaukang-pa’gaukannu sa’ra kacapi, gambusu’, rabana, siagang suling, siagang nia’ inungang anggoro’. Mingka tena nujampangi bate pa’jariNa Batara siagang apa Nagaukanga.
13Lanri kammana, ummakKu tenaya apa-apa naasseng, lanierangi a’lampa a’jari tunitahang. Sikamma pamimpinga siagang ra’yaka lamate cipuruki siagang lamate turerei.
14Tassungke luaraki bawana kamateanga untu’ angnga’luki sikamma pamimpinna Yerusalem siagang ra’ya’ sitabanga assua’-suara’.
15Tunggala’ taua lanipakasiriki, siagang tau borroa lanipakatunai.
16Mingka Nagaukangi Batara Kaminang Koasaya katojenganga, untu’ ampappicinikangi kalompoanNa. Naadeli bansaNa untu’ ampappicinikangi katangkassanNa.
17Ri rumbanganna kotaya angnganre ruku’ ana’ bembea siagang gimbalaka; tena nalakakurangang ke’nanga.
18Cilakako kau tulusu’ dorakaya!
19Nukana, "Lappassammi angngalle linta’ tindakang Karaeng, Allata’ala matangkasa’na Israel! Boli’mi kamma Nagaukang rancanaNa, sollanna niciniki siagang niassengi."
20Cilakako kau amputara’ balekai bajika siagang kodia, singaraka siagang sassanga, te’nea siagang paika!
21Cilakako kau tau nukanaya kalennu cara’de’ siagang sanna’ porenu!
22Cilakako kau tuporea angnginung anggoro’! Baraniko siagang hebakko punna accampurukko inungang terasa’!
23Mingka lanri ero’nuji anggappa doe’ pammuccu’, nanulappassang tau salaya, siagang nurompai tau tenaya nasala anggappa kaadelang.
24Nutollaki ajaranNa Batara Kaminang Koasaya, na nuhina parentaNa Allata’ala matangkasa’na tu Israel. Lanri kammana anjo, rapang rarame siagang ruku’ kalotoro’ la’busu’ nakanre pepe’, kamma tomminjo aka’-aka’nu la’jari bottoki, bunga-bungannu la’jari kalotoroki na la’busu’ nairi’ anging.
25Larroi Batara mae ri bansaNa. Sadiami untu’ anghukkungi ke’nanga. Lata’ge’gosoki sikamma monconga; maya’-maya’na tau matea latassiaraki rapang loro ri sikamma aganga. Mingka larro iji Batara siagang tuli laNagaukanna hukkunganNa.
26LaNakioki Batara bansa bellaya na labattu ke’nanga linta’!
27Tuli sadiana ke’nanga ero’ a’bundu’ siagang tangngassengai ke’nanga mangngang. Tena le’bakai ke’nanga attinro yareka ta’do’do’.
28Ciduki ana’ panana na sadiamo anrong panana ero’ appabuccu’. Kanuku jaranna kamma batu pepe’ terasa’na, siagang roda karetana tapputaraki rapang anging puttusu’.
29Ammarrungi sa’ranna tantarana rapang sa’ranna singaya, beru le’baka angngokko’ apa najakkala’, nampa naerang lari, nampa tena akkulle allappassangi.
30Anjo wattua nia’ kalangngerang sa’ra pakkio’ bundu’ ri sikontu pa’rasangang Israel, kamma sarrinna arrunna bombang tamparanga. Ciniki, sassangi sikontu anjo pa’rasanganga, rassi kasukkarang. Singaraka a’jari sassang makkapu’.