Alkitab Mobile SABDA
[VER] : [MAKASAR]     [PL]  [PB] 
 <<  Yesaya 51 >> 

1Nakana Batara: "PilangngeriA’, he ikau ngaseng tau eroka nipasalama’ siagang battua mae ri Nakke appala’ pannulung. U’rangi angkanaya battu ri moncong batu kemaeko nipa’, siagang battu ri pangngekeang batu kemaeko nikeke.

2U’rangi boe-boenu Abraham siagang Sara; wattunna Kukio’ Abraham natena ana’na; nampa Kubarakkaki siagang Kusarei turungang jai.

3Ikau Yerusalem, laKusaleoriko, siagang sikontu niaka ammantang ri alla’na rumbangannu. Sikamma parang kalotoro’nu Kupa’jari koko ga’ga, rapang Eden, koko coppongKu. Anjoreng taua larannui siagang ma’reja-rejai siagang appala’ sukkuru’ lalang kelong-kelong.

4Parhatikangi sa’rangKu, he bansaKu, pilangngeri kana-kanangKu, he ummakKu. Kupassareangi ajarangKu mae ri bansa-bansaya, hukkung-hukkungKu lansingari ke’nanga.

5A’reppese’mi kasalamakkang laKupassareanga; a’birimmi battu pammetangKu. KalengKu lammarenta mae ri bansa-bansaya. Sikamma pa’rasangang bellaya natayang-tayangA’ siagang naminasai gau’ malompoKu.

6Parhatikangi langika siagang ciniki buttaya; langika lalanynyaki rapang umbu na buttaya la’jari toai rapang baju toa, sikontu pandudu’na lamate ngasengi rapang lamu’. Mingka kasalamakkang Kupassareanga tuli nia’na satunggu-tungguna, siagang tena kale’bakkanna pammetangKu.

7PilangngeriA’, he bansaKu, nuassengi apa annabaya; ajarangKu nuboliki lalang ri atinnu. Teako mallakki punna nicau-cauko ri rupataua, teako lussakki punna nahinako ke’nanga.

8Lapanraki ke’nanga siagang lalanynyaki, rapang pakeang nakanre kacoa’ siagang kaeng bulu gimbala’ nikanre ri taisang. Mingka kasalamakkang Kupassareanga tuli nia’na satunggu-tungguna, a’jari pammetangKu sa’genna sikontu turungang."

9Ammenteng maKi’ o Batara, Kitulung laloi ikambe, pasalamaki ikambe lanri koasaTa. Ammenteng maKi’ sangkamma ri jammang riolo ri wattunna Kilissarrang Rahab siagang Kicoka naga tamparanga sa’genna mate.

10IKatte todong ampakalotoroki tamparanga, je’ne’ tamparang lantanga. IKatte appare’ oloang lalang ri anjo je’neka, sollanna akkulle a’limbang sikamma tau Kipasalamaka.

11Nalammotere’mo sikamma tau Nalappassanga Batara akkio’ rannui ke’nanga antama’ ri Yerusalem corai rupanna ke’nanga lanri karannuang mannannungang. Rannui siagang ma’reja-rejai ke’nanga, lanynya’mi susaya siagang kunrarenga.

12Nakana Batara, "INakkemi ansaleori ngasengko. Angngapa numalla’ mae ri rupatau lamatea, mae ri rupatau nipelaka rapang ruku’?

13Maka lanukaluppai Batara Mapa’jarinu angka’rangai langika siagang ampadongkokai dasara’na buttaya? Angngapa nunnekkere’ sila’busu’ allo mae ri jallo’na lapung tumanjallakkanga sadiaya ero’ angngancurukko? Sikontutojenna anjo jallo’na ke’nanga talania’ pakkullena mae ri kau.

14Sikamma tunitahanga lanilappassangi linta’; tena nalakakurangang ke’nanga ri kanre, siagang talamateai na nikuburu’.

15Saba’ iNakkemi Karaeng Allata’alanu, ampa’jalloki tamparanga siagang ampamarrungi bombanna. Kaminang Makoasaya, iaminjo arengKu.

16INakke ampaka’rangi langika siagang ampadongkoki dasara’na buttaya. Kukana mae ri Sion: Ikaumi ummakKu; Kupassareangi ajarangKu mae ri kau na Kula’langiko siagang koasaKu."

17Ambangungko, he Yerusalem, ambangung mako! Hukkungang Napabattua Batara lanri larroNa le’ba’mi nujappai sa’genna la’busu’.

18Battu ri pandudu’nu tena anrurungangko, battu ri tummantannu tena angnguluko.

19Nitujuko ri ruang rupa bala; lanri bundu’ naancuru’ taba sikali pa’rasangannu siagang mate cipuru’ ra’ya’nu. Tena angkamaseangko siagang ansaleoriko.

20Tunggala’ ri cappa’na aganga tu’guru’ ngasengi taunnu lanri cappu’mi kagassinganna rapang jonga nialle ri tado’. Nitujui ke’nanga ri pangngalarroiNa Batara, siagang nitabai ri pangga’gara’Na Allata’alanu.

21Pilangngeri he sikamma tau nijallakkanga, ta’royong-royonga kamma tau nasa’ring!

22Kammaminne kananNa Bataranu, Karaeng Allata’alanu angngalleangako, "Ia passessa Kupabattua mae ri kau lalang larroKu, laKuallei ammotere’ battu ri kau. Lanaungi larroKu, siagang tea’ mako tanggongi pole.

23Anjo passessaya Kupabattui mae ri tau anjallakkangako, le’baka assuroko attinro naung ri buttaya, na naonjo’-onjokangko, rapangko agang naoloa tau."


  Share Facebook  |  Share Twitter

 <<  Yesaya 51 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran