Dual Panel1Nakana Batara, "Mae ngasengko sikamma tau turerea, angnginung mako battu ri je’ne’ nipasadiaya. Battu mako mae tau tenaya doe’na tarimai gandunga nuta’bayarra, siagang angnganre mako! Anggoroka siagang dadika sadiai, alle bawang-bawammi.
2Untu’ apa naniballi apa tenaya nappassukku’ ri pa’mai’, siagang nijama apa tenaya nabassori taua? Turukimi parentaKu, na nukanre apa bajika, siagang nukasia’ kanre nyamang nipatalaya.
3Pilangngeri, he bansaKu, battu mako mae ri Nakke, laKusareko katallassang sitojennaya. Lanri pangngamaseang siagang kajarrekang Kupa’janjianga ri Daud, appareKa’ janji mannannungang siagang ikau ngaseng.
4Sikontutojenna, ia laKupa’jari pamimping siagang panglima, sa’bi kakoasangKu mae ri sikamma bansa-bansaya.
5Lanukioki bansa-bansa maraenga, na battu linta’ ke’nanga mae ri kau, lanri iNakke, Karaeng Allata’alanu, Allata’ala matangkasa’na Israel, lanri le’ba’ mako Kupakalompo."
6Ammotere’ mako mae ri Batara lalang akkullena ija; akkio’ mako mae ri Ia lalang a’reppese’Na.
7Parallui tau ja’dalaka napakabaji’ tallasa’na, siagang napinra batena appikkiri’. Lappassammi ammotere’ mae ri Batara, sollanna anggappa pangngamaseanNa. Parallui assaile mae ri Allata’alata, saba’ lammoro’ pa’maiki Batara ampammopporangi taua.
8Nakana Batara, "PikkirangKu teai pikkirannu, siagang oloangKu teai oloannu.
9Kamma tinggina langika battu ri buttaya, kamma tomminjo tinggina pikkirangKu rateanna pikkirannu, siagang oloangKu rateanna oloannu.
10Rapang bosi turunga battu ri langi’, na tammotera nai’, passangalinna nabasai buttaya, napakacoppongi siagang napattimboi lamung-lamunga, assarei wassele’ untu’ nipakioro’ siagang untu’ nikanre,
11kamma tomminjo kana Kupaua talammoterai sia-sia, mingka akkullei nagaukang apa Kukaerokia, siagang nagappa sikamma apa Kupakkanaya.
12Lanubokoi Babel siagang rannu, siagang niantarakko assulu’ siagang salama’. Monconga siagang buluka larannui siagang lakkio’ rannui, latempa-tempai sikamma poko’ kayua ri kokoa.
13Poko’ camaraya lassambeangi rompo’ katintinga bunga-bunga ansambeangi sikamma rompo’-rompoka. Kajariammi anjo kammaya sollanna masahoro’ arengKu; a’jari pammatei mannannungang tenaya nalatappela’."