Alkitab Mobile SABDA
[VER] : [MAKASAR]     [PL]  [PB] 
 <<  Yesaya 57 >> 

1Tau bajika siagang annabaya matei, natena tau ampahangi siagang amparhatikangi. Punna mate ke’nanga, ta’lappasaki ke’nanga battu ri balaya nampa sannang ammari-mari.

2(57:1)

3Mingka ikau ngaseng tau dorakaya, battu mako mae untu’ niadeli! Tena nubajikangngang na pabale’-bale’ mataya, siagang tau nangaia a’gau’ bawang kammayatompa baine pagau’ salaya!

4Inai nukakkali? Inai nucau-cau? Sai ikau turungang paballe-balleko siagang turungang tau nangaia angngewa?

5Anynyombako ri rewata-rewata kacopponganga siagang nupassareang kalennu anturukiangi hawa napasunu irawanganna poko’-poko’ kayu karama’nu. Nutarawangi sikamma ana’nu lalang ri binangaya, ri alla’-alla’na batua.

6Jari siratangko appasse’re batu-batu laccu’ battu anjoreng. Iaminjo bageannu! Ia tomminjo batu-batua nutiriki anggoro’nu nusare gandung. Nukapangi angkana sannangA’ anciniki yangasenna anjo kammaya?

7A’lampako mange ri coppo’-coppo’na monconga untu’ assare koro’bang siagang ampassukkuki hawa napasunu.

8Attannangko patung-patung rantasa’ ri dallekang pakke’bu’ balla’nu. NubokoiMa’ iNakke. Nupasuluki pakeannu nampa naikko ri katinroang napakaluaraka bayuannu nugajia untu’ nuagang sikatinroang, nampa nupassukku’ hawa napasunu.

9Ammakeko minynya’-minynya’ mabau’, nampa a’lampako mange anynyomba ri rewata niarenga Molokh. Nukiringi sikamma tunisuronu mange ri pa’rasangang-pa’rasangang bellaya, ba’lalo mange ri lino tau matea.

10Tena natappu’ minasannu nuposoi kalennu amboyai rewata-rewataya. Nukapangi angkana akkullei ke’nanga assareko sumanga’ beru, sa’genna tena nu’jari lamma.

11Nakana Batara, "Inaika anjo rewata-rewata ampajariako malla’, sa’gennu a’balle-balle siagang tenamo nungngu’rangi mae ri Nakke? Apaka tenamo nunynyomba mae ri Nakke lanri sallo duduKumo tamakkana-kanaya?

12Mingka Kupauangko angkanaya, anjo kabajikannu anu nupare’-pare’, na sikontu panggaukannu tena matu-matunna mae ri kalennu.

13Punna ammarrangko, lappassammi na napasalamakko anjo patung-patunga! Latappelaki ke’nanga niri’bakang ri anging siagang lalanynyaki lalang sipa’maikang nappasa’ bawang! Mingka tau a’la’langa mae ri Nakke lanawarisiki anjo pa’rasanganga siagang anynyomba mae ri Nakke ri BallakKu."

14Nia’ tau angkana, "Pareki siagang pasadiai oloanna ummakKu, pakabellai sikontu anrompaia."

15Saba’ kammaminne kananNa Allata’ala Kaminang Tinggia na matangkasa’, makoasaya sa’genna satunggu-tungguna, "AmmantangA’ ri tampa’ tinggia siagang tangkasaka, mingka ammantang tongA’ ri alla’na tau tuna pa’maika siagang tau assesse’ lalanga lanri dosa-dosana, untu’ ampamollei sumanga’na siagang panrannuanna ke’nanga.

16Tena natuli laKusalakang ummakKu; tena nauntu’ situlusukKu lalarro, sollanna tena natappu’ sumanga’ ke’nanga, nasaba’ iNakke ampattallasaki ke’nanga.

17Dosa lanri ngoana ke’nanga ampakanassuA’, lanri kammana naKuhukkung siagang Kubokoi ke’nanga. Mingka terasa’ dudui ulunna ke’nanga na tuli ero’na naturukiang.

18Kucini’mi panggaukanna ke’nanga, mingka laKupakabaji’ tonji ke’nanga. LaKururungangi siagang laKutulungi ke’nanga siagang Kusaleori tau si’naya pa’mai’na.

19LaKusarei kasannangngang sikontu taua, baji’ tau ambania kammayatompa tau bellaya. LaKupakabajiki ummakKu.

20Mingka tau ja’dalaka rapangi tamparang a’bombanga siagang tenaya nale’ba’ sannang. Lo’loro’na angngerangi loro siagang peo’.

21Tena kasannangngang mae ri tau dorakaya," Nakana Batara.


  Share Facebook  |  Share Twitter

 <<  Yesaya 57 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel