Alkitab Mobile SABDA
[VER] : [MAKASAR]     [PL]  [PB] 
 <<  Yesaya 61 >> 

1KoasaNa Batara Kaminang Tinggia niaki ri nakke; Napilea’ siagang Nasuroa’ untu’ angngerang kabara’ baji’ mae ri tau kasi-asia siagang ampammollei tau ancuruka pa’mai’na; untu’ ampa’la’bangi mae ri tau nitahanga angkanaya tasalloami nanilappassang ke’nanga, siagang mae ri sikamma tau nitarungkua angkanaya lanipasulu’mi ke’nanga.

2Nasuroa’ angkabarrangi angkanaya narapi’mi wattunna Batara appasalama’; untu’ ansaleori sikontu tau susaya, siagang Nabalasa’ sikamma musu-musunna ke’nanga;

3untu’ assarei karannuang siagang kate’neang pa’mai’ sikamma tau si’naya siagang tau susaya; untu’ ampinrai si’nana ke’nanga a’jari kelong pammuji. Larapangi ke’nanga poko’ kayu nilamunga ri KalenNa Batara. Lanagaukangi ke’nanga apa bajika siagang annabaya, sa’genna nipakala’biri’ Batara.

4Lanabangungi ke’nanga kota-kota salloamo runtung nappaenteng tampa’-tampa’ salloamo sino.

5He, bansaku, lanalayaniko bansa maraenga; lanakalawaki ke’nanga olo’-olo’ piaranu lanajamai kokonnu siagang koko anggoro’nu.

6Lanigallarakko atanNa Allata’ala siagang niarengko imanNa Batarata. Lanukasiaki kakalumanynyanganna bansa-bansaya na lompo pa’mai’nu lanri barang-baranna ke’nanga.

7Lanri le’ba’ mako nipakasiri’ a’lappi tallu, siagang ra’masaka kammayatompa tunaya a’jari bageannu, na nunggappamo warisi’ a’lappi rua ri pa’rasangannu, na nupatang karannuang mannannunganga.

8Nakana Batara, "INakke Kungai kaadelanga na Kukabirisi panjallakkanga siagang kaja’dallanga. LamajarreKa’ assareko pahalanu, siagang appare’ parjanjiang mannannungang siagang ikau.

9Jari-jarinu lamasahoroki ri kere-keremae, a’la’bangi niasseng ri alla’na sikontu bansaya. Na sikontu tau ancinikai lanamangakui, angkanaya Kubarakkaki anne bansaya."

10Nakana Yerusalem, "Rannui pa’maikku lanri Batara, mate’nei atingku lanri Allata’ala. Rapang bunting bura’ne siagang baine ammake belo-belo ga’ga ngaseng, kammaminjo Napatabaya Batara ri nakke baju kasalamakkang siagang pammetang.

11Rapang bine nipakioroka lattimboi a’jari lamung-lamung, kammaminjo Karaeng Allata’ala ampatimboi kasalamakkanga na sikontu bansaya lamammuji mae ri Ia."


  Share Facebook  |  Share Twitter

 <<  Yesaya 61 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran