Dual Panel1Pajaga: "Inaika anjo niaka battu ri Bozra ri Edom? ejai bajunna, pakeanna accayai; teai sipato’ gammara’na batena a’jappa." Pajaga:
2"Angngapa naeja kammanjo pakeanta, sangkamma bajunna papacco’ rappo anggoroka?" Batara:
3"Kale-kalengKu antama’ ri pammaccokang anggoroka tena battu ri ummakKu antulungA’. Kuonjo’-onjokangi bansa-bansaya lalang larroKu, rapang tau angngonjo’-onjokanga rappo anggoro’. Tappaccoki cera’na ke’nanga na nabasai bajungKu, nara’massi sikontu pakeangKu.
4Le’ba’mi Kurancanakang allo pa’balassanga, siagang wattu kalappassanga mae ri ummakKu.
5A’boyA’ tau, mingka tena akkulle antulungA’, lannasakKa’ lanri tenana akkulle ambantuA’. Nampa kagassingang KalengKu antulungA’, kalarroangKu ambantuA’.
6Lalang kalarroangKu a’rinra-rinraya, Kuonjo’-onjokangi bansa-bansaya; Kuancuruki ke’nanga, naKutumpa cera’na ke’nanga naung ri buttaya."
7Eroki kukabarrang pangngamaseanNa Batara lanri sikontu gau’Na kumammuji ri Ia. Allumpa-lumpai bateNa ambarakkaki umma’Na, lanri nia’na pangngamaseanNa na tena la’busu’na anjo pangngamaseanNa.
8Nakana Batara, "Tojeng, anjo ke’nanga ummakKu, ana’-ana’ tenaya nappakala’ba pa’mai’." Na Ia a’jari Mappasalama’na ke’nanga,
9Ia KalenNa nituju ri kasusaanna ke’nanga. Tena Nakkiring Batara tunisuro yareka tunisare koasa; Ia KalenNa allappassangi ke’nanga lanri pangngamaseanNa siagang pangngarimanginNa. Tuli Naparakai ke’nanga battu riolo.
10Mingka angngewai ke’nanga siagang napakasi’na pa’mai’Na Batara. Jari ta’bale’mi a’jari musunNa ke’nanga KalenNa a’bundu’ ambaliangi ke’nanga.
11Nampa angngu’rangimo ke’nanga ri rewasa’ allaloa, ri jammanna Musa, atanNa Batara. Akkuta’nangi ke’nanga angkana, "Kemae Batara, anrurungangai sikamma pamimpinna umma’Na allalo ri tamparanga? Kemae Batara ampassareangai koasaNa mae ri ke’nanga?
12Kemae Batara le’baka anrurungangi Musa siagang limanNa makassaka, ambage ruayai je’neka ri dallekanna ke’nanga sollanna masahoro’ arenNa satunggu-tungguna?
13Kemae Batara anrenrengai ke’nanga a’jappa ilalang ri je’ne’ lantanga? Rapang jarang allalo ri parang lompoa, tena le’bakai tatto’ro ke’nanga."
14Naerangi Batara ke’nanga mae ri tampa’ pammantangnganga, rapang olo’-olo’ piara niemba mange ri paranga untu’ a’ruku’. Kammaminjo bateNa anrurungangi umma’Na, sollanna nipakala’biri’ arenNa.
15O Batara, Kiparhatikangi battu ri suruga, battu ri pammantangang matangkasatTa siagang mala’birika. Kemae pangngamaseanTa siagang kabaranianTa? Kemae kalammoranTa siagang pangngarimanginTa? Tea’ laloKi’ tahangngi anjo untu’ ikambe.
16Sai iKatte manggena ikambe? Abraham siagang Yakub tanaassengai ikambe. Mingka iKatte o Batara, iKatte Manggena ikambe, Mappasalama’na ikambe battu riolo dudu.
17O Batara, angngapa Kibalang parekangi ikambe lingu? Angngapa Kipa’jari terasaki nyawana ikambe sa’genna tamallakka ikambe mae ri Katte? Ammotere’ lalo maKi’ lanri ata-atanTa, lanri ummatTa, pisakaTa.
18Angngapa Kilappassangi musua angngonjo’-onjokangi BallatTa, siagang nara’massi taua bulu’ matangkasatTa?
19IKatte ampa’jari ikambe rapang tena le’bakaKi’ makoasa mae ri kambe; rapang tena le’bakai ikambe a’jari ummatTa.