Alkitab Mobile SABDA
[VER] : [MAKASAR]     [PL]  [PB] 
 <<  Yosua 15 >> 

1Kaluarga-kaluarga battua ri suku Yehuda annarimai pambageang butta kammaya anne pa’baeng-baenna: Ri bageang timboro’, anjo daeraya a’la’bui sa’genna mange ri kaminang cappa’ timboro’na daera parang lompo Zin ri pa’baeng-baenna Edom;

2appakkaramula battu ri cappa’ timboro’na Tamparang Matea,

3tulusu’ timboro’ allalo ri pungku’-pungku’na monconga ri Akrabim sa’genna mange ri Zin. Nampa allalo ri timboranna Kades-Barnea, tulusu’ allalo ri Hezron, nai’ ri Adar, nampa a’lekko mange ri Karka.

4Battu anjorengi tulusuki pole mange ri Azmon, nampa a’biring ri pangka binangaya ri pa’baeng-baenna Mesir, nampa kala’busang ri Tamparang Tangngaya. Kammaminjo garisi’ pa’baeng-baenna ri bageang timboro’na untu’ daerana suku Yehuda. Nampa anjo garisika a’jari tommi garisi’ pa’baeng-baeng bageang timboro’na sikontu pa’rasangang Israel.

5Ri bageang iraya, pa’baeng-baenna iamintu Tamparang Matea, tulusu’ wara’ sa’genna cappa’ pa’lo’loranna Binanga Yordan. Ri bageang wara’, pa’baeng-baenna appakkaramulai battu ri cappa’ pa’lo’loranna anjo Binanga Yordan,

6nai’ ri Bet-Hogla, nampa tulusu’ mange ri pa’baeng-baenna Lappara’ Yordan. Battu anjoreng ri anjo pa’baeng-baeng waraka naiki tulusu’ a’lampa wara’ sa’genna mange ri Batu Bohan (Bohan iamintu ana’na Ruben),

7nampa tulusu’ mange ri Ka’bung Kasusaang sa’genna battu mange ri Debir, nampa a’lekko pole wara’ a’lampa mange ri Gilgal ri tampa’ assidallekanga siagang pungku’-pungku’na monconga ri Adumim ri bageang timboranna anjo ka’bunga. Battu anjoreng tulusuki pole mange ri timbuseng je’ne’ En-Semes, nampa mange ri En-Rogel,

8nampa nai’ allalo ri Ka’bung Hinom a’lampa timboro’ ri buluka, ri napammantangngia Yerusalem, kota tu Yebus. Battu anjoreng ri garisi’ pa’baeng-baenga a’lampa mange ri coppo’na anjo buluka ri laukanna Ka’bung Hinom, ri cappa’ wara’na Ka’bung Refaim,

9nampa tulusu’ mange ri timbuseng je’ne’ Me-Neftoah, sa’genna mange ri kota-kota niaka ri ampi’na Moncong Efron. Battu anjoreng a’lekkoi anjo garisi’ pa’baeng-baenga mange ri Baala (iamintu Kiryat-Yearim),

10nampa nakulilingi bageang lau’na Baala mange ri pa’moncongang Edom, nampa tulusu’ mange ri bageang warakkanna Moncong Yearim (iamintu Moncong Kesalon), siagang naung ri Bet-Semes, nampa tulusu’ mange ri Timna.

11Battu ri Timna, anjo garisi’ pa’baeng-baenga a’lampa mangei ri bageang warakkanna Moncong Ekron, nampa a’lekko mange ri Sikron, allalo ri Moncong Baala, tulusu’ mange ri Yabneel, nampa kala’busang ri Tamparang Tangngaya,

12a’jaria garisi’ pa’baeng-baeng bageang ilau’na daera suku Yehuda. Lalangi ri anjo daeraya ammantang sikamma kaluarga niaka lalang ri suku Yehuda.

13Situru’ parentaNa Batara mae ri Yosua, siapa are bageang battu ri daerana Yehuda nipassareangi mae ri Kaleb ana’na Yefune battu ri suku Yehuda. Nipassareangi mae ri ia Hebron, iamintu kotana Arba, manggena Enak.

14Ia jari-jarina Enak iamintu Sesai, Ahiman, siagang Talmai. Nabongka ngasemmi Kaleb anjo ke’nanga battu ri Hebron.

15Battu anjoreng a’lampami ambunduki sikamma tau ammantanga ri Debir. (Anjo kotaya riolo niarengi Kiryat-Sefer.)

16Nakana Kaleb, "Inai-nai akkulle angngallei Kiryat-Sefer, lakupassareangi anakku iamintu Akhsa, a’jari bainenna."

17Nampa Otniel, iamintu ana’na sari’battanna Kaleb niarenga Kenas, angngallei anjo kotaya; Jari napassareammi Kaleb ana’na iamintu Akhsa, a’jari bainenna Otniel.

18Ri allo pa’buntinganna ke’nanga, nasuro tojemmi Otniel anjo Akhsa untu’ appala’ sisapa’ butta battu ri manggena. Jari naummi Akhsa battu ri keledaina; nampa akkuta’nammi Kaleb mae ri ia angkana apa nakaeroki.

19Appialimi Akhsa angkana, "Erokka’ siapa are timbuseng je’ne’, nasaba’ anjo butta kipassareanga mae ri nakke anjorengi ri daera kalotoroka." Jari napassareammi Kaleb mae ri ia timbuseng je’ne’ niaka ri bageang rate siagang ri bageang ulu binangaya.

20Iaminne butta nipassareanga mae ri kaluarga-kaluarga niaka lalang ri suku Yehuda untu’ a’jari pisakana ke’nanga.

21Kota-kota kaminang bellaya ri bageang timboro’, a’jaria buttana suku Yehuda iamintu niaka ri pa’baeng-baenna Edom, yangasenna nia’ ruampulo assalapang kota kammayatompa desa-desa niaka ri tammulilina. Anjo kota-kotaya iamintu: Kabzeel, Eder, Yagur, Kina, Dimona, Adada, Kedes, Hazor, Yitnan, Zif, Telem, Bealot, Hazor-Hadata, Keriot-Hezron (iamintu Hazor), Amam, Sema, Molada, Hazar-Gada, Hesmon, Bet-Pelet, Hazar-Sual, Bersyeba, Baala, Iyim, Ezem, Eltolad, Khesil, Horma, Ziklag, Madmana, Sansana, Lebaot, Silhim, Ain, siagang Rimon.

22(15:21)

23(15:21)

24(15:21)

25(15:21)

26(15:21)

27(15:21)

28(15:21)

29(15:21)

30(15:21)

31(15:21)

32(15:21)

33Kota-kota, kammayatompa desa-desa niaka ri tammulilina, niaka ri bangkeng buluka, kabusu’na nia’ sampulo angngappa’ kota, iamintu: Esytaol, Zora, Asna, Zanoah, En-Ganim, Tapuah, Enam, Yarmut, Adulam, Sokho. Azeka, Saaraim, Aditaim, Gedera siagang Gederotaim.

34(15:33)

35(15:33)

36(15:33)

37Kammayatompa anne sampuloa angngannang kota siagang desa-desa niaka ri tammulilina: Zenan, Hadasa, Migdal-Gad, Dilean, Mizpa, Yokteel, Lakhis, Bozkat, Eglon, Khabon, Lahmas, Khitlis, Gederot, Bet-Dagon, Naama siagang Makeda.

38(15:37)

39(15:37)

40(15:37)

41(15:37)

42Kammayatompa salapang kota siagang desa-desa niaka ri tammulilina, iamintu: Libna, Eter, Asan, Yiftah, Asna, Nezib, Kehila, Akhzib siagang Maresa.

43(15:42)

44(15:42)

45Kammayatompa Ekron siagang kota-kota ca’di siagang desa-desana,

46sikontu kota-kota siagang desa-desa niaka ri ampi’na Asdod, battu ri Ekron sa’genna mange ri Tamparang Tangngaya.

47Kammayatompa Asdod siagang Gaza siagang kota-kota ca’di siagang pole desa-desa niaka tassiara’ sa’genna mange ri ampi’na pangka binangaya ri pa’baeng-baenna Mesir siagang birinna Tamparang Tangngaya.

48Ri daera pa’monconganga nia’ sampulo asse’re kota siagang desa-desa niaka ri tammulilina, iamintu: Samir, Yatir, Sokho, Dana, Kiryat-Sana (iamintu Debir), Anab, Estemoa, Anim, Gosyen, Holon siagang Gilo.

49(15:48)

50(15:48)

51(15:48)

52Kammayatompa anne salapanga kota siagang sikamma desa-desa niaka ri tammulilina: Arab, Duma, Esan, Yanum, Bet-Tapuah, Afeka, Humta, Kiryat-Arba (iamintu Hebron) siagang Zior.

53(15:52)

54(15:52)

55Kammayatompa anne sampuloa kota siagang desa-desa niaka ri tammulilina: Maon, Karmel, Zif, Yuta, Yizreel, Yokdeam, Zanoah, Kain, Gibea siagang Timna.

56(15:55)

57(15:55)

58Siagang anne annanga kota siagang sikamma desa-desa niaka ri tammulilina: Halhul, Bet-Zur, Gedor, Maarat, Bet-Anot, siagang Eltekon.

59(15:58)

60Kammayatompa anne ruaya kota siagang desa-desa niaka ri tammulilina: Kota Kiryat-Baal (iamintu Kiryat-Yearim) siagang kota Raba.

61Ri daera parang lompoa, nia’ annang kota siagang desa-desa niaka ri tammulilina: Bet-Araba, Midin, Sekhakha, Nibsan, kota Garam siagang En-Gedi.

62(15:61)

63Kota Yerusalem antama tongi kotana Yehuda, mingka takkulleai tu Yehuda nabongka tu Yebus niaka ammantang anjoreng. Sa’genna kamma-kamma anne tuli nia’ iji tu Yebus sipammantangngang siagang tu Yehuda ri anjo kotaya.


  Share Facebook  |  Share Twitter

 <<  Yosua 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran