Alkitab Mobile SABDA
[VER] : [MAKASAR]     [PL]  [PB] 
 <<  Yosua 17 >> 

1Siapa are bageang ri bageang laukanna Binanga Yordan nipassareangi mae ri bageruanna kaluarga-kaluarga Manasye, ana’ toana Yusuf. Makhir, manggena Gilead, iami ana’ toana Manasye. Nasaba’ ia se’rei tantara pejuang, jari daera Gilead siagang Basan niaka irayanganna Binanga Yordan nipassareang mae ri ia.

2Daera laukanna Binanga Yordan nipassareangi mae ri kaluarga-kaluarga maraenga battu ri jari-jarina Manasye, iamintu kaluarga-kaluarga: Abiezer, Helek, Asriel, Sekhem, Hefer siagang Semida; yangasenna anjo ke’nanga turungang bura’ne battu ri Manasye ana’na Yusuf. Iami ke’nanga kapala-kapala kaluarga.

3Zelafehad, ana’na Hefer, cucunna Gilead (Gilead ana’na Makhir, cucunna Manasye), tena ana’na bura’ne, mingka baine bawang, iamintu: Makhla, Noa, Hogla, Milka, Tirza.

4A’lampai ke’nanga mange ri Imang Eleazar, Yosua ana’na Nun siagang sikamma pamimpinga, na nakana ke’nanga, "Nakana Batara mae ri Musa angkana ikambe musti para anggappa tongi butta sangkamma sari’battanna ikambe bura’nea." Lanri kammana anjo, situru’ parentaNa Batara, anjo ana’na ngaseng Zelafehad para nisare tongi butta sangkamma sari’battang bura’nena ke’nanga.

5Jari, teai jari-jari bura’nena bawang Manasye angngappa pambageang butta, mingka jari-jarina pole bainea. Iami anjo saba’na angngapa nanisare suku Manasye sampulo bageang, pantaranganna butta Gilead siagang Basan irayanganna Binanga Yordan. Butta Gilead nipassareangi mae ri jari-jarina Manasye maraenganga.

6(17:5)

7Garisi’-garisi’ pa’baeng-baenna suku Manasye appakkaramulai battu ri Asyer sa’genna Mikhmetat irayanganna Sikhem. Battu anjoreng anjo garisika naungi a’lampa timboro’ sa’genna mange ri daera golongang En-Tapuah.

8Daera Tapuah iamintu daerana suku Manasye, mingka kota Tapuah, ri pa’baeng-baenga, iamintu kotana jari-jarina Efraim.

9Nampa naung anjo garisi’ pa’baeng-baenna suku Manasye sa’genna pangkana Binanga Kana. Kota-kota niaka ri timboranna anjo pangka binangaya iamintu kota-kotana suku Efraim, manna nania’ lalang ri daerana suku Manasye. Anjo garisi’ pa’baeng-baenna daera Manasye tulusuki pole anturuki agang warakkanna anjo pangka binangaya, nampa kala’busang ri Tamparang Tangngaya.

10Kammaminjo nania’ suku Efraim ri bageang timboro’ siagang suku Manasye ri bageang wara’, nampa Tamparang Tangngaya a’jari pa’baeng-baenna ke’nanga ri bageang lau’. Ri bageang lau’ na mae ri kanang sike’de’, anjo daerana suku Manasye a’baeng-baengi siagang daerana suku Asyer, nampa bageang iraya mae ri kanang sike’de’, a’baeng-baengi siagang daerana suku Isakhar.

11Ilalang ri anjo daerana suku Isakhar siagang suku Asyer nia’ buttana suku Manasye, iamintu: Bet-Sean siagang Yibleam kammayatompa desa-desa niaka ri tammulilina. Kammayatompa: Dor (kota niaka ri biring tamparang), En-Dor, Taanakh, Megido siagang desa-desa niaka ri tammulilina.

12Mingka takkulleai suku Manasye ambongkai pandudu’na anjo kotaya; iaminjo saba’na nammantang ija tu Kanaan anjoreng.

13Ba’lalo ri bokoangallo, a’jari pila’ kassa’namo tu Israel, tenaja nabongka ngasengi anjo tu Kanaan; poro napassanaji anjo taua ampanjamangi ke’nanga.

14Nakanamo jari-jarina Yusuf ri Yosua, "Angngapa nase’reja pambageang butta nisareangi ikambe, nampa ikambe anne jai sikaliki’, lanri nibarakkakinna ikambe ri Batara?"

15Appialimi Yosua angkana, "Lanri jai dudunu, siagang lanri seppa’ duduna daera pa’moncongang Efraim untu’ ikau, a’lampamako mange ri daerana tu Feris siagang Refaim. Anynyungke mako tampa’-tampa’ beru ri romang-romanna anjo ke’nanga."

16Appialimi anjo turunganna Yusuf angkana, "Tanggannakkai luara’na anjo daera pa’monconganga untu’ ikambe, nampa anjo bansa Kanaan niaka ammantang ri lappara’-lappara’ rawaya jai kareta bundu’na, bassia nipare’, baji’ niaka ammantang ri Bet-Sean siagang desa-desa niaka ri tammulilina, kammayatompa niaka ammantang ri Ka’bung Yizreel."

17Jari nakanamo Yosua mae ri suku Efraim siagang mae ri anjo suku Manasye ammantanga ri bageang ilau’, "Kammatojengi, ikau jai duduko siagang sanna’ kassa’nu, jari siratangko nisare la’bi jaiangngang butta.

18Allemi daera pa’monconganga, nasaba’ manna naromang ija anjo daeraya, mingka akkullei nusungke anjo daeraya nampa nupisakai ngaseng. Nampa ri passala’na anjo tu Kanaan, akkullei nubongka ke’nanga, manna pole nakassa’ ke’nanga siagang jai kareta bassi pa’bundukanna."


  Share Facebook  |  Share Twitter

 <<  Yosua 17 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran