Dual Panel1Le’baki nabeta tu Israel anjo pa’rasangang Napa’janjianga Batara, asse’remi ke’nanga ri Silo, nampa nabangung ke’nanga Kema KahaderanNa Batara.
2Nia’ ija tuju suku bansa Israel tenapa nanggappa pambageang butta.
3Jari nakanamo Yosua mae ri umma’ Israel, "Siapapi sallonu lattayang ngaseng, nampa a’lampako mange angngallei daera Napassareanga Batara, Allata’alana boe-boenu mae ri kau?
4Pileimi tallu tau massing sukua. Lakusuroi ke’nanga mange anciniki sikontu anne pa’rasanganga na nacata’ pa’baeng-baeng daera nakaerokia ke’nanga untu’ napisakai. Le’baki anjo, musti ammotereki ke’nanga mae ri nakke.
5Anjo buttaya musti nibagei a’jari tuju bageang. Suku Yehuda lammantang tulimi ri daera bageang timboro’, nampa Yusuf ri daera bageang wara’.
6Gambara’na pa’baeng-baenna anjo tujua pambageang butta musti nipareki, nampa nipassareang mae ri nakke. Sallang lammuanga’ loterei untu’ angngassengi apa Napattantua Allata’ala untu’ ikau ngaseng.
7Suku Lewi bawang talanggappaya pambageang butta, lanri pambageanna ke’nanga iamintu a’jaria imang-imang allayani Batara. Siagang passala’na suku Gad, suku Ruben siagang bageruanna suku Manasye, le’ba’ memammi ke’nanga natarima bageanna irayanganna Binanga Yordan. Le’ba’mi napassareang Musa, atanNa Batara, anjo buttaya mae ri ke’nanga."
8Jari nasaremi pitunju’ Yosua anjo taua nakana, "A’lampa mako mange amparessai sikontu anne pa’rasanganga siagang pare’mi gambara’na pa’baeng-baenna; nampa punna le’baki, battu mako pole mae ri nakke. Sallang lammuanga’ loterei anrinni ri Silo untu’ angngassengi apa Napattantua Batara mae ri kau ngaseng." Le’baki natarima ke’nanga anjo pitunju’-pitunjuka battu ri Yosua, a’lampami ke’nanga amparessai anjo buttaya.
9Najappaimi ke’nanga sikontu anjo pa’rasanganga, nampa nacata’ ke’nanga pa’baeng-baenna anjo tujua pambageang butta, kammayatompa nacata’ ngaseng tommi kota-kota niaka ilalang. Nampa ammotere’ ke’nanga mae ri Yosua ri pakkemaanga ri Silo.
10Nampa nabuang Yosua lotereia untu’ angngassengi apa Napattantua Batara mae ri ke’nanga. Le’baki anjo napassareammi Yosua anjo pambageang buttaya mae ri tunggala’ sukua lalang ri bansa Israel tenayapa nanggappa pambageang butta.
11Pambageang makase’rea iamintu butta untu’ kaluarga-kaluarga niaka lalang ri suku Benyamin. Anjo bageanna ke’nanga niaki ri alla’na buttana suku Yehuda siagang buttana suku jari-jarina Yusuf.
12Ri bageang wara’, pa’baeng-baenna buttana ke’nanga appakkaramulai battu ri Binanga Yordan, nampa nai’ ri pungku’na moncong ri warakkanna Yerikho, nampa a’lampa kalau’ allalo ri daera pa’monconganga sa’genna mange ri daera Bet-Awen.
13Anjo garisi’ pa’baeng-baenga tulusuki pole mange ri pungku’ moncong timboranna Lus (niassenga angkana niarengi Betel), nampa naung ri Atarot-Adar ri moncong timboranna Bet-Horon-Hilir.
14Battu ri bageang lau’na anjo monconga, a’lekkoi anjo garisi’ pa’baeng-baenna buttaya a’lampa timboro’ mange ri Kiryat-Baal (iamintu Kiryat-Yearim). Anjo Kiryat-Baal suku Yehuda pata. Iaminjo garisi’ pa’baeng-baenna anjo buttaya ri bageang ilau’.
15Pa’baeng-baeng ri bageang timboroka appakkaramulai battu ri birinna Kiryat-Yearim tulusu’ mange ri timbuseng-timbuseng je’ne’ Me-Neftoah,
16nampa naung ri bangkeng moncong assidallekanga siagang Ka’bung Hinom ri cappa’ wara’na Ka’bung Refaim. Le’baki anjo, a’lampa timboroki anjo garisi’ pa’baeng-baenga allalo ri ka’bung Hinom ri bageang timboro’na pungku’-pungku’na monconga ri pa’rasangang Yebus, tulusu’ mange ri En-Rogel,
17a’lekko wara’ mange ri En-Semes, nampa mange ri Gelilot ri ba’leanna Pangngambikang Adumim. Le’baki anjo, naungi anjo garisi’ pa’baeng-baenga ri Batu Bohan (Bohan iamintu ana’na Ruben),
18nampa allalo ri bageang wara’na pungku’-pungku’ moncong assidallekanga siagang Ka’bung Yordan, nampa naung ri anjo ka’bunga,
19allalo wara’ ri pungku’-pungku’na Moncong Bet-Hogla, nampa kala’busang ri bageang wara’na Tamparang Matea ri tampa’ cappa’ pa’lo’loranna Binanga Yordan. Iaminjo pa’baeng-baenga ri bageang timboro’.
20Binanga Yordan a’jari pa’baeng-baeng ri bageang iraya. Kammaminjo pa’baeng-baenna butta nipassareanga mae ri kaluarga-kaluarga niaka lalang ri suku Benyamin untu’ a’jari pisakana ke’nanga.
21Kota-kota napatanga kaluarga-kaluarga niaka lalang ri suku Benyamin, kabusu’na nia’ sampulo anrua kota siagang desa-desa niaka ri tammulilina, iamintu: Yerikho, Bet-Hogla, Emek-Kezis, Bet-Araba, Zemaraim, Betel, Haawim, Para, Ofra, Kefar-Haamonai, Ofni, siagang Geba.
22(18:21)
23(18:21)
24(18:21)
25Kammayatompa anne sampuloa angngappa’ kota siagang sikamma desa-desa niaka ri tammulilina, iamintu: Gibeon, Rama, Beerot, Mizpa, Kefira, Moza, Rekem, Yirpeel, Tarala, Zela, Elef, Yebus (iamintu Yerusalem), Gibea siagang Kiryat-Yearim. Iaminjo sikamma butta nipassareanga mae ri kaluarga niaka lalang ri suku Benyamin, untu’ a’jari pisakana ke’nanga.
26(18:25)
27(18:25)
28(18:25)