Alkitab Mobile SABDA
[VER] : [MAKASAR]     [PL]  [PB] 
 <<  Yosua 20 >> 

1Nampa Nasuro Batara anjo Yosua

2akkana kamma anne mae ri tu Israel, "Le’baki Kuparentakang mae ri Musa sollanna napauangko ri passala’na kota-kota palarianga, iamintu kota-kota akkullea nabattui tau laria untu’ anggappa pa’la’langngang. Kamma-kamma anne pileimi anjo kotaya.

3Inai-nai ambunoi paranna tau natena nakunjungi, akkullei lari mange ri anjo kotaya sollanna ta’lappasa’ battu ri tau eroka ampa’balassangi anjo tau matea.

4Akkullei lari mange ri kalase’renna anjo kotaya, siagang a’lampa mange ri pangadelanga ri pakke’bu’ lompona anjo kotaya, nampa napakasingara’ anjoreng mae ri sikamma pamimpinga apa le’baka kajariang. Lanipa’biangi ri pamimping-pamimping niaka anjoreng untu’ antama’ ri anjo kotaya, siagang lanasarei pammantangngang.

5Punna niondangi ri anjo tau eroka a’balasa’ sa’genna mange anjoreng, takkulleai pandudu’na anjo kotaya ampassareangi anjo taua mae ri anjo tau angngondanga. Musti nala’langngi ke’nanga, nasaba’ tena nakunjungi anjo pammunoanga, siagang teai lanri birisi’na nammuno.

6Akkullei ammantang anjoreng sa’genna le’ba’ niadeli ri dallekanna tau jaia, siagang sa’genna matemo tau anna’galaka Imang Lompo anjo wattua. Le’bappi anjo kammaya nampa akkulle anjo taua ammotere’ mange ri bori’ paranglakkenna ri wattunna lari."

7Jari ri daera laukanna Binanga Yordan napattantumi umma’ Israel kota-kota palarianga, iamintu: Kedes ri pa’monconganna suku Naftali ri Galilea, Sikhem ri pa’monconganna suku Efraim, siagang Hebron ri pa’monconganna suku Yehuda.

8Ri daera rayanganna Binanga Yordan ri lappara’ tinggina parang kassika irayanganna Yerikho, napattantumi ke’nanga kota-kota palarianga, iamintu: kota Bezer ri daerana suku Ruben, kota Ramot ri Gilead ri daerana suku Gad, siagang kota Golan ri Basan, ri daerana suku Manasye.

9Yangasemmi anjo kota-kota palariang nipattantua untu’ sikontu umma’ Israel siagang untu’ bansa maraeng niaka ammantang ri tangnga-tangngana ke’nanga. Inai-nai ambunoi paranna tau natenaja nakunjungi, akkullei anggappa pa’la’langngang ri anjo kota-kotaya battu ri pangngondanna tau eroka a’balasa’ mae ri ia; takkulleai nibuno punna tenapa naniadeli ri dallekanna tau jaia.


  Share Facebook  |  Share Twitter

 <<  Yosua 20 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran