Alkitab Mobile SABDA
[VER] : [MAKASAR]     [PL]  [PB] 
 <<  Yosua 7 >> 

1Le’ba’mi Naparentakang Batara mae ri umma’ Israel angkanaya battu ri sikontu apa-apa mustia niancuru’ ri Yerikho, tena sikali apa-apa akkulle nialle. Mingka anjo parentaya tena nanituruki. Nia’ sitau bura’ne niareng Akhan andakkai anjo parentaya, sa’genna sanna’ larroNa Batara mae ri umma’ Israel. (Manggena Akhan niarengi Karmi siagang toana niarengi Zabdi, battu ri golongang bijanna Zerah lalang ri suku Yehuda.)

2Anjo wattua nia’ siapa are tau nasuro Yosua battu ri Yerikho mange ri kota Ai, iamintu se’rea kota irayanganna Betel, ri ampi’na Bet-Awen. Anjo sikammaya tau nisarei tugasa’ untu’ a’lampa ansalidiki anjo daeraya. Le’ba’na nagaukang ke’nanga anjo tugasaka,

3ammotere’mi ke’nanga siagang a’laporo’mi mae ri Yosua. Nakana ke’nanga, "Tenaja niparallu a’lampa ngaseng untu’ ambunduki anjo kota Ai. Kira-kira ruassa’bumo yareka tallussa’bumo tau kiring mange anjoreng. Tea’mi kiring ngasengi tantaraya mange anjoreng untu’ a’bundu’, nasaba’ anjo kotaya ca’di-ca’diji."

4Jari tallussa’buji tau a’lampa mange ambunduki anjo kotaya, mingka nitunrungi ke’nanga sa’genna ammono’boko.

5Niondangi ke’nanga ri tu Ai battu ri pakke’bu’ lompona kota Ai sa’genna mange ri daera pangngekeang bassia, nampa nabuno kira-kira nia’ tallumpulo angngannang tau battu ri ke’nanga ri pungku’na buluka. Na’jari lussa’mo siagang malla’mi tu Israel.

6Sanna’mi si’nana pa’mai’na Yosua siagang sikamma pamimping umma’na Israel sa’genna nakekke’-kekke’ pakeanna ke’nanga, siagang su’ju’mi ke’nanga sila’busu’ allo ri dallekanna Patti ParjanjianNa Batara; nasareimi au ulunna ke’nanga salaku pammatei ri si’nana pa’mai’na ke’nanga.

7Nakanamo Yosua ri Batara, "O, Allata’ala Bataraku! Untu’ apa naKierang ikambe anta’leang mae ri ba’leanna anne Yordan? Apaka lanri erotTa ampassareangi anne ikambe mae ri tu Amori? Sollanna namate ikambe? Bajikangngangi ka’de’ ammantang mami ikambe, ri ba’leanna Yordan!

8O, Batara! Le’ba’mi nitunrung nipaono’ boko tu Israel. Kamma-kamma anne apami lakukana?

9Lanalangngere’mi tu Kanaan siagang sikontu tau niaka ri anne daeraya anne passalaka. Lanalipungi siagang lanabuno ngasemmi ikambe! Nampa apa laKigaukang untu’ angkatutui kalompoanTa?"

10Appialimi Batara ri Yosua angkana, "Ambangungko nai’! Tena matu-matunnu su’ju’ kamma antu ri buttaya!

11A’gau’ dosami tu Israel. Le’ba’mi Kuparentakang mae ri ke’nanga sollanna naturuki parjanjiangKu siagang ke’nanga, mingka nadakkaimi ke’nanga anjo parentaKu! Sikamma barang-barang mustia niancuru’, naallei ke’nanga. Nalukkaki ke’nanga siagang nacokkoi ri alla’na barang-baranna ke’nanga sollanna tena nakaassengang.

12Iaminjo saba’na natenamo nakkulle attahang ke’nanga andallekangi musua. Nitunrungi nipamono’ boko ke’nanga ri musua, lanri kalenna ke’nanga nipitujuimi hukkungang untu’ niancuru’. Tenamo nalaKururungangko, punna tenapa naniancuruki anjo barang-barang tenaya nakkulle nialle.

13Kamma-kamma anne ambangungko nai’ Yosua! Tangkasi umma’ Israel siagang suroi ke’nanga ampasadiai kalenna untu’ andallekang ri Nakke. Parentakangi mae ri ke’nanga sollanna sadia-sadia ammuko, saba’ iNakke Karaeng Allata’alana Israel, laKupabattui anne mae ri ke’nanga angkanaya: ‘E, ikau ngaseng tu Israel! Anjo barang-barang Kuparentakanga mae ri kau sollanna nuancuruki, niaki sipa’gang ri kau. Lalang tenana nanupelaki anjo barang-baranga, tena nulattahang andallekangi musunnu!’

14Lanri kammana anjo Yosua, pauangi ke’nanga angkanaya ammuko bari’basa’ laniparessai ke’nanga tasse’re-se’re suku. Punna Kujo’joki se’reanga suku, sikontu golongang bija niaka lalang ri anjo sukua musti majui tasse’re-se’re golongang. Siagang punna Kujo’joki se’reanga golongang, sikontu kaluarga niaka lalang ri anjo golongang bijaya musti majui tasse’re-se’re kaluarga. Nampa punna Kujo’joki se’reanga kaluarga, musti maju tasse’re-se’rei tau niaka lalang ri anjo kaluargaya.

15Nampa anjo tau nijo’joka siagang a’nyatami angkanaya ammoliki barang-barang anjo nipappisangkanga, musti nitunui sa’genna cappu’ siagang sikamma kaluargana kammayatompa sikontu barang-barang napatanga; nasaba’ iami anjo taua andakkai parjanjianga siagang le’baka anggaukangi kaja’dallang lompoa ri tangnga-tangngana umma’ Israel."

16Ammukona ri bari’basa’ dudua, nasuromi Yosua maju umma’ Israel mae ri dallekang, tasse’re-se’re suku, nampa suku Yehudami nataba.

17Nampa nasuromo Yosua maju mae ri dallekang anjo suku Yehuda, tasse’re-se’re golongang bija, nampa golongang Zerah nataba. Nampa nisuro golongang Zerah maju mae ri dallekang, tasse’re-se’re kaluarga, nampa kaluarga Zabdi nataba.

18Le’baki anjo nasuromi Yosua kaluarga Zabdi maju mae ri dallekang, tasse’re-se’re tau; nampa Akhan, ana’na Karmi, cucunna Zabdi nataba.

19Nakanamo Yosua ri Akhan, "Na’, mangakuimi siagang paumi silambusu’na anrinni ri dallekanNa Batara, Allata’alana Israel, apa le’baka nugaukang. Pauamma’, teako cokkoi."

20Nakanamo Akhan, "Kammatojengi, le’ba’ma’ a’gau’ dosa mae ri Batara, Allata’alana Israel. Iaminne kugaukanga:

21Ri alla’na barang-barang niallea, nia’ kucini’ juba sanna’ ga’gana, pare’ Babilonia, pera’ kira-kira nia’ rua kilo battala’na, siagang bulaeng sipolong kira-kira la’bi sitangnga kilo battala’na. Ero’ dudua’ ri anjo barang-baranga, jari kuallemi siagang kucokkoi lalang ri buttaya ri kemaku; rawa dudui pera’na kuboli’."

22Nampa akkirimmo Yosua linta’ tau mange ri kemana Akhan. Na’nassamo angkanaya anjo barang-barang nipappisangkanga nia’ ngasengiji anjoreng, nicokko lalang ri buttaya, siagang pera’na niaki rawa dudu.

23Naallemi ke’nanga anjo barang-baranga nampa naerang mange ri Yosua siagang sikontu tu Israel. Nampa nipadongko’ anjo barang-baranga ri dallekanNa Batara.

24Nampa nijakkala’mo anjo Akhan ri Yosua siagang ri sikontu tu Israel, siagang nierangi mange ri Ka’bung Kasusaang nipasierang siagang sikontu ana’na, olo’-olo’ sapi, keledai, gimbala’, kema, siagang sikontu apa-apa napatanga, kammayatompa anjo peraka, jubaya siagang bulaeng nalukkaka.

25Nampa nakanamo Yosua mae ri Akhan, "Angngapa nuppabattu kasusaang mae ri katte ngaseng? Kamma-kamma anne lappabattui Batara kasusaang mae ri kau!" Jari Akhan siagang sikamma kaluargana nisambilaimi batu ri sikontu tu Israel sa’genna mate. Sikontu barang-baranna, kammayatompa barang-barang nalukkaka nitunu ngasemmi sa’genna cappu’.

26Le’baki anjo natambungimi ke’nanga anjo tampaka siagang batu sannaka jaina, ia niaka ija anjoreng sa’genna anne alloa. Iaminjo saba’na naniarengija anjo tampa’ Ka’bung Kasusaang. Nampa naummo larroNa Batara.


  Share Facebook  |  Share Twitter

 <<  Yosua 7 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran