Alkitab Mobile SABDA
[VER] : [MAKASAR]     [PL]  [PB] 
 <<  Yosua 8 >> 

1Nakana Batara ri Yosua, "Passe’rei sikontu tantaranu, nampa a’lampako siagang ke’nanga mange ri Ai. Teako lussakki siagang teako mallakki! INakke lassareko pammetang mae ri karaeng Ai. Ra’ya’na, kotana, kammayatompa pa’rasanganna lanuallei.

2Ai siagang karaenna nupareki nupasangkamma Yerikho siagang karaenna riolo. Mingka kamma-kamma anne, akkullei nualle barang-baranna siagang olo’-olo’na untu’ nukammai. Sadia-sadia mako untu’ ambunduki silalonnai anjo kotaya battu ri boko."

3Jari sadia-sadiami Yosua siagang sikontu tantarana untu’ a’lampa mange ri Ai. Ammilemi 30.000 tau, iamintu tantara kaminang bajika, nampa nasuro ri wattu bangngi ke’nanga,

4siagang naparentakang kamma anne mae ri ke’nanga, "Accokkoko anjorenganna anjo kotaya, mingka teako bella dudu; siagang sadiako untu’ a’bundu’.

5Inakke siagang ana’ buaku lanreppesi anjo kotaya. Punna assuluki tu Ai untu’ angngewai ikambe, lata’gilingi ikambe siagang lari ammunduru’ kamma riolo.

6Laniondang tulusuki ke’nanga mae ri kambe sa’genna bella battu ri anjo kotaya, siagang nakapangi ke’nanga angkana lalari ikambe sangkamma riolo.

7Iaminjo wattua numusti assulu’ battu ri tampa’ paccokkoannu, siagang nualle anjo kotaya. Karaeng Allata’alanu lampassareangi mae ri kau.

8Punna nupantamakkimi, tunumi anjo kotaya, situru’ apa Naparentakanga Batara. Iaminjo tugasa’nu ngaseng."

9Nampa nakirimmo Yosua anjo ke’nanga, siagang a’lampami ke’nanga accokko ri laukanna kota Ai, iamintu ri alla’na Ai siagang Betel, nampa attayang anjoreng. Mingka Yosua a’bangngi ri pakkemaanna tu Israel.

10Ri bari’basa’ dudua ambangummi Yosua siagang naparentakammi sollanna asse’re pasukanna. Nampa ia siagang sikamma pamimpinna umma’ Israel naerammi anjo pasukanga mange ri Ai.

11Anjo pasukanga siagang Yosua a’jappai mange ri pakke’bu’ lompo lomoro’ se’rena kota Ai, nampa akkema ri bageang warakkang, niaka se’re ka’bung ri alla’na ke’nanga siagang anjo kotaya.

12Nia’mo kira-kira 5.000 tau nasuro accokko ri laukanna anjo kotaya, ri alla’na Ai siagang Betel.

13Jari, kammai anne batena nisusung anjo pasukang eroka a’bundu’: Pasukang lomoro’ se’rea ri warakkannai kota Ai attampa’ nampa pasukanga maraengannaya ri bageang laukang, nampa Yosua a’lampai mange ri ka’bunga anjo bangngia.

14Kamma nacini’na karaeng Ai anjo ana’ buana Yosua, akkaro-karomi angngalle tindakang. Assulu’mi siagang sikontu taunna mange ri ka’bunna Yordan untu’ ambunduki tu Israel anjoreng ri tampa’ pirangalloanga. Tanaassengai angkanaya tasalloami nanibunduki battu ri boko.

15Yosua siagang ana’ buana napare’ kammami angkana ammunduruki ke’nanga; larimi ke’nanga mange ri parang kalotoroka.

16Sikontu tu bura’nea ri kota Ai nipagio’ ngasemmi untu’ angngondangi Yosua siagang anjo pasukanna. Mingka pila’ angngondangi ke’nanga ri Yosua, pila’ bellami ke’nanga battu ri kotana.

17Sikontu tau niaka ri Ai assulu’mi angngondangi tu Israel, sa’genna ammantammi tassungke bawang anjo kotaya, tena tau anjagai.

18Nampa Nakanamo Batara ri Yosua, "Angkaki pokenu siagang pa’dalle’ mangei matanna ri kota Ai; kamma-kamma anne Kupassareangi anjo kotaya mae ri kau." Nagaukammi Yosua anjo apa Naparentakanga Batara.

19Kamma naangka’na limanna Yosua, ammenteng ngasemmi linta’ anjo pasukang accokkoa nampa a’bakka antama’ ri anjo kotaya, nampa naempoi. Natunu memanji ke’nanga anjo kotaya.

20Assailemi tu Ai mae ri boko, siagang nacini’mi ke’nanga umbua nai’ ri langika. Nacini’ tommi Yosua siagang pasukanna anjo umbua, siagang naassemmi ke’nanga angkanaya nipantamakkimi anjo kotaya ri anjo pasukang maraenga. Jari nagilimmi kalenna Yosua siagang pasukanna untu’ a’bakka ambunduki siagang ambunoi tu Ai. Nampa battu tommi tu Israel niakamo anjoreng ri kota Ai amminawang ambunduki ke’nanga, sa’genna nilipummi tu Ai siagang tenamo kalappassanna untu’ lari. Tena manna sitau ri ke’nanga ta’lappasa’; yangasenna nibuno ngasengi ri tu Israel,

21(8:20)

22(8:20)

23pantaranganna karaeng Ai. Nijakkalaki anjo karaenga nampa nierang mange andallekang ri Yosua.

24Le’ba’na pasukang Israel nabuno ngaseng tantara musu angngondangai ke’nanga ri parang kalotoroka, ammotere’mi ke’nanga mange ri Ai, nampa nabuno sikontu tau niaka anjoreng.

25Tulusu’ naangka’na pokena Yosua a’dalle’ mange ri kota Ai, siagang tanapanaungai limanna sa’genna le’ba’ ngasemmo nibuno tu Ai. Anjo memang alloa mate ngasemmi sikontu pandudu’na Ai, kira-kira 12.000 tau jaina, bura’ne baine.

26(8:25)

27Sikamma olo’-oloka siagang barang-barang niallea ri anjo kotaya, naallei tu Israel a’jari barang-baranna, situru’ apa Napaua Batara mae ri Yosua.

28Natunumi Yosua anjo kota Ai, nampa nalappassang a’jari rumbangngang sa’genna kamma-kamma anne.

29Karaenna anjo kotaya nagentungi ri se’reang benteng, nampa nalappassang ammantang anjoreng sa’genna karueng. Ri wattunna labu alloa, nasuromi Yosua taua angngallei anjo mayaka nampa napela’ ri dallekang pakke’bu’ lompona kotaya. Nampa nitambungi anjo tampaka siagang jai sikali batu. Anjo batu-batua nia’ iji anjoreng sa’genna kamma-kamma anne.

30Nampa ambangung Yosua se’re tampa’ pakkoro’bangngang ri Moncong Ebal untu’ Batara, Allata’alana Israel.

31Napareki anjo tampa’ pakkoro’bangnganga situru’ pitunju’-pitunju’ niaka lalang ri Kitta’na Musa, anjo atanNa Batara, mae ri tu Israel. Kammaminne anjo pitunjuka: "Se’re tampa’ pakkoro’bangngang nipareka battu ri batu-batu tenayapa nale’ba’ nijama siagang pakkakasa’-pakkakasa’ bassi." Irate ri anjo tampa’ pakkoro’bangnganga assare koro’bang tu Israel mae ri Batara, iamintu: koro’bang nitunu siagang koro’bang passiamakkanna ke’nanga.

32Anjoreng, nisa’bi ri sikontu tu Israel, natulisiki Yosua mae ri anjo batu-batu tampa’ pakkoro’bangnganga, salinanna hukkung-hukkunNa Batara niaka lalang ri Kitta’na Musa.

33Sikontu tu Israel, siagang sikamma pamimpinga, komandang-komandang tantaraya, haking-hakinga, kammayatompa bansa maraeng niaka ammantang ri alla’na ke’nanga, massing ammenteng ngasengi ke’nanga ri ba’leang kairi kananna anjo Patti ParjanjianNa Batara, a’dalle mae ri sikamma Imang Lewi ambulekai anjo Patti Parjanjianga. Bage ruana anjo taua a’dalle mangei ri Moncong Gerizim, nampa bage ruana maraenga a’dalle’ mangei ri Moncong Ebal. Le’ba’mi naparentakang Musa, anjo atanNa Batara, sollanna nagaukang ke’nanga anjo kammaya punna narapi’mo wattunna ke’nanga untu’ antarimai barakka’ Napa’janjianga Batara.

34Nampa nabacamo Yosua siagang sa’ra lompo sikontu hukkunga sangkamma apa niaka tattulisi’ lalang ri Kitta’ Hukkunga, kammayatompa barakka’-barakkaka siagang pattunra-pattunraya.

35Sikamma parentana Musa nabacakangi Yosua mae ri sikontu umma’ Israel niaka asse’re anjoreng, kammayami tubai’-bainea, ana’-anaka, siagang sikamma bansa maraeng niaka ammantang ri alla’na ke’nanga.


  Share Facebook  |  Share Twitter

 <<  Yosua 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel