1Nakana Batara Kaminang Koasaya, "Ri anjo alloa lappasolongA’ se’re timbuseng je’ne’ untu’ ampakatangkasaki jari-jarina Daud siagang pandudu’na Yerusalem battu ri dosana siagang ri gau’ panynyombanna ke’nanga ri barhalaya.
2Ri anjo alloa laKupattaenami areng-arenna barhala-barhalaya battu ri anne buttaya, sa’genna tenamo manna sitau angngu’rangi. Sikontu tau nakanaya kalenna na’bi siagang tau a’balle-ballea nakana kalenna napantamakki roh, laKubongka kabusuki.
3Na punna nia’ ija tau nakana kalenna appabattui pasang, kalenna anrong manggena langkana ri ia angkana musti nihukkung matei lanri appauna kana balle-balle. Punna tuli nakana ija kalenna na’bi, lanicokai sa’genna mate ri manggena siagang amma’ kalenna.
4Ri anjo alloa, sikamma na’bia lasiriki untu’ anggaukangi gau’ na’bia. Tena nalammake na’bi ke’nanga untu’ annipu siagang ampattampoangi sikamma paccini’na.
5Kabalekanna, lanakana ke’nanga, ‘Inakke teaiya’ na’bi. Inakke poro pamarrija’ bawang, anjamaya ri kokoa lalang sikontu tallasakku.’
6Na punna akkuta’nang taua ri ia angkana, ‘Bokka’ apa anjo ri barambannu?’, lappiali angkana, ‘Anjorenga’ ri balla’na agangku anggappa loko’.’"
7Nakana Batara Kaminang Koasaya, "Ammentengko nai’ he pa’dang, nampa nubuccu’ pakalawaki anjamaya untu’ iNakke! Bunoi, natassimbung-simbung sikamma gimbalaka. LaKubunduki ummakKu,
8na ruambageang talluna sikontu pandudu’na pa’rasanganga lamate.
9Bage talluna mami lasalama’. Siagang anjo ke’nanga laKupakatangkasaki rapang pera’ nipakati’noka siagang pepe’. LaKuuji ke’nanga rapang tau angngujia bulaeng. Nampa lappala’ doang ke’nanga mae ri Nakke, siagang laKupiali pappala’na ke’nanga. LaKupauangi ke’nanga angkanaya iami ke’nanga ummakKu, nampa ke’nanga lamangaku tongi angkanaya iNakkemi Karaeng Allata’alana ke’nanga."