Alkitab Mobile SABDA
[VER] : [MANGGARAI]     [PL]  [PB] 
 <<  1 Korintus 1 >> 

Tabé

1Oné-mai hi Paulus, ata pilé le Mori Keraéng bénta te ciri rasul di Kristus Yésus agu oné-mai hi Sosténés, asé-ka’é ca imbi dité,

2latang te weki serani de Mori Keraéng oné Korintus. Weki serani situ poli pandé nggelukd agu poli béntad te ciri ata nggeluks landing hi Kristus Yésus. Agu sanggén ata néténg osang, ata ngaji le ngasang de Mori Keraéng dité hi Yésus Kristus, Mori disé agu Mori dité.

3Tabing agu hambor-libur oné-mai Mori Keraéng, Ema dité agu oné-mai Mori Yésus Kristus loréng méu.

Wali Di’a

4Aku wali di’a mtaung kamping Mori Keraéng daku, landing méu, lut widang de Mori Keraéng ata téi Diha oné méu lut hi Kristus Yésus.

5Ai oné Hia méu ciri boram oné sanggéd cao-ca: Oné sanggéd curup agu oné sanggéd pecing do.

6Hitu dé betuan te keréba latang te hi Kristus poli ndengn oné bahi-réha méu.

7Ali hitu méu toé manga géongs te tiba widang, lari nggitun méu géréng si’ang te cai de Mori dité Yésus Kristus oné ranga data do.

8Hia kolé te pandé mberes méu dengkir agu cemoln, wiga méu toé manga celas du leso cai de Mori dité Yésus Kristus.

9Mori Keraéng hiot junggu, ata bénta méu kudut neki-ca agu Anak Diha Yésus Kristus, Mori dité.

Biké Oné Weki Serani

10Asé-ka’én, aku toing méu le ngasang de Mori dité Yésus Kristus, kudut méu ca nai-ca nukm, agu néka manga biké oné méu, maik poro méu kali paka nai ca anggit, tuka ca léléngm.

11Ai nggo’o asé-ka’én, aku dengé tombo data oné-mai kilo di Klo’é, te manga nggu-ngget oné bahi-réha méu.

12Betuan curup daku nggo’oy, te méu néténg ata manga curups: Aku oné-mai haé diding di Paulus. Ko aku oné-mai haé diding di Apolos. Ko aku oné-mai haé diding di Kéfas. Ko aku oné-mai haé diding di Kristus.

13Co’oy, hi Kristus hitu ngancéng pati-patiy ko? Asa aku, hi Paulus ho’o, panggoly landing méu? Ko asa néng méu, cebong oné ngasang di Paulus?

14Aku wali di’a, ai toé manga cengatan oné-mai méu ata cebong lakum, hanang hi Krispus agu hi Gayus,

15wiga toé manga ata ngancéng taé, te méu cebong oné ngasang dakum.

16Kilo di Stéfanas lakus cebongd le waé serani. Be pé’ang mai isé toé baé laku, manga ko toé ata cebong lakud.

17Ai hi Kristus wuat aku toé latang te cebong, maik latang te wéro Keréba Di’a, agu hitu kolé toé ali nggalas de curup, kudut panggol di Kristus néka oké-bon.

Nggalas De Mori Keraéng Agu Nggalas De Manusia

18Ai keréba latang te panggol hitu te pandé bapa laing latang te isé situt kudut ampus, maik latang te itét kudut selamak, keréba hitu te toto mberes de Mori Keraéng.

19Ai manga tulis: “Aku te pandé ampus nggalas data manga nggalasd agu nggepuk data nggalas te pandé moras Laku.”

20Nias ata situt manga nggalasd? Nias ata situt pecing Taurat? Nias ata situt hoté-hatel lemad oné-mai lino ho’o? Toé weli Mori Keraéng poli pandé caling nggalas de lino ho’o te ciri bapa laing?

21Landing nggalas de lino ho’o toé pecing Mori Keraéng, itup tara nggalas de Mori Keraéng henan te pandé selamak isé situt imbi ali wéro de Keréba Di’a atat loi-la’it taé de lino.

22Ata Yahudi ngoéng tanda agu ata Yunani kawé nggalas.

23Maik ami wéro keréba hi Kristus hitut panggoly. Keréba ho’o, latang te ata Yahudi ného ca watu te pandé timpok laing, agu latang te ata toé Yahudi ného te pandé bodok laing.

24Maik latang te isét bénta le Mori Keraéng, ata Yahudi ko toé ata Yahudi, hi Kristus hitu mberes agu nggalas de Mori Keraéng.

25Ai ata siot bodok oné-mai Mori Keraéng céwé mésé nggalasd oné-mai manusia, agu situt les oné-mai Mori Keraéng céwé mberes oné-mai manusia.

26Nuk kaut asé-ka’én, co’o du ciri ata seranis méu: Lorong wolo de manusia toé dod ata nggalas, toé dod ata cau kuasa, toé dod ata pangkat mésé.

27Maik apa ata bodok lorong wolo de lino ho’o, pilés le Mori Keraéng kudut pandé ritak ata situt manga nggalas. Apa ata les taé de lino ho’o, pilés le Mori Keraéng kudut pandé ritak situt mberes.

28Apa ata toé lélos agu ata bocik le lino ho’o, pilés le Mori Keraéng. Ngot apa ata toé manga betua laingd, pilés le Mori Keraéng te pandé mora situt manga ngasangd.

29Wiga toé manga cengatan manusia ata pandé angos weki run oné ranga de Mori Keraéng.

30Maik, ali Mori Keraéng, méu neki ca oné hi Kristus Yésus, ata poli téi nggalas le Mori Keraéng latang te ité. Hia pandé molor agu pandé nggeluk agu sambé ité.

31Ného manga ata poli tulis: “Céing kaut ata pandé angos, céwé di’an hia pandé angos oné Mori Keraéngy.”


  Share Facebook  |  Share Twitter

 <<  1 Korintus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel