Alkitab Mobile SABDA
[VER] : [MANGGARAI]     [PL]  [PB] 
 <<  1 Korintus 14 >> 

Cengkalin Kolé Tombo; Latang Te Widang De Nai Nggeluk

1Dolong koé momang tau hitu agu rébok koém te tiba sanggéd widang dé Nai Nggeluk, céwén kéta widang latang te pedé.

2Céing ata manga mu’u luju agu lema emasn, toé curup agu manusiay, maik agu Mori Keraéngy. Ai toé cengatan ata pecingn betuan, maik ali Nai Nggeluk hitu, tara hia ngancéng curup ata pété cehad.

3Maik céing ata pecing ba pedé, hia curup agu manusiay, hia te pandé téti éta mosé, toing agu pandé lémbu.

4Céing ata tombo le mu’u luju agu lema emas, hia pandé téti éta mosé de weki run, maik céing ata pecing pedé hia pandé téti éta mosé de weki serani.

5Ngoéng daku kudut sanggés méu tombo ali mu’u luju agu lema emas, maik lé mai hitun, kudut méu pecing nubuat. Ai ata pecing nubuat céwé hiang lata, itu po ata hiot tombo ali mu’u luju agu lema emas, aikn émé ata hitu kolé ngancéng papod, wiga ngancéng pandé téti éta moséd weki serani.

6Jari, asé-ka’én, émé ngo oné méuk aku agu tombo le mu’u luju agu lema emas, apa betuan hitu latang te méu? Toé kéta manga betua cekoén émé tombo le pecing do, ko le pedé, ko le toing. Dion émé tombok aku agu méu le si’ang de Mori Keraéng.

7Cama kaut ného ceca ata toé manga werad, maik runings, ného sunding agu kecapi – co’o kong baén lata déré hitu, runing de sunding ko runing de kecapi, émé situ sua toé woléngs runingd?

8Ko émé toé getas runing de terompét, céing ata mengkek kudut ngo rampas?

9Nenggitu kolé méu hitut tombo le mu’u luju agu lema emas: Émé toé papé curup ata si’ang, co’o kong baén lata apa situt tombo de méu? Tombo de méu hitu oké bon kaut!

10Manga dod – maik toég baén pisa tarad – ai dod tarad curup oné lino; koném po nenggitu, toé manga can oné-mai ceca situt runing ata toé manga betuad.

11Maik émé aku toé pecing betuad curup situ, aku ciri ata weki toé pecing latang te hia hitut papéd, agu hia weki toé pecing latang te aku.

12Nenggitu kolé méu: Bo tu’ung manga réboks méu kudut tiba widang de Nai Nggeluk, maik lé mai hitun, nahé méu paka papés latang te pandé téti étan mosé de weki serani.

13Landing hitu, céi ata tombo le mu’u luju agu lema emas, hia paka ngajiy, kudut ngancéng papod.

14Ai émé aku ngaji le mu’u luju agu lema emas, déwag kanang hitut ngaji, maik nai-nawa daku toé manga ngajin.

15Jari, apa ata paka pandé laku? Ho’oy ata pandé daku: Aku te ngaji ali déwag, maik nai-nawa daku kolé te ngaji, déré agu naring.

16Ai émé hau wali di’a ali nai rum kanang, co’o ata iwod situt manga rangad ngancéng taé “amén”, latang te wali di’am hitu? Toé weli isé toé pecing apa hitut curup de hau?

17Ai koném po di’a kétay wali di’am hitu, maik ata bana toé pandé téti éta moséd le hau.

18Aku wali di’a kamping Mori Keraéng le mu’u luju agu lema emas, labi oné-mai sanggés méu.

19Maik oné neki ca de weki serani, ngoéng daku liman kaut curup ata ngancéng idepn latang te toing ata bana, itu po mber-lanak curup do le mu’u luju agu lema emas.

20Asé-ka’én, néka cama ného nuk de anak koém. Ciri anak koé kali oné pandé da’ats, maik ciri ata tu’a oné nuks.

21Oné Adak Taurat, manga tulis: “Lisét manga curup bana, agu le mu’u data weki toé pecing, Aku te tombo oné wa’u ho’o, maik isé toé gorid te séngét Aku, taé de Mori Keraéng.”

22Landing hitu widang curup te mu’u luju agu lema emas ca tanda, toé latang te ata imbi, maik latang te ata toé imbi; maik widang latang te pedé, ca tanda toé latang te ata toé imbi, maik latang te ata imbi.

23Jari, émé sanggéd ata serani lonto torok agu néténg ata tombo le mu’u luju agu lema emas, itu kali maid ata pé’ang mai, ko ata toé imbi, toé weli nggo’o taé disé: ata wédol méu ko?

24Maik émé sanggén ata pandé pedés, itu kali onéd ata toé imbi ko ata weru, hia hitu te ciri imbiy agu céca lata do’y.

25Sanggéd taung pété ceha situt manga oné nain te ciri si’angs, wiga hia te suju agu io Mori Keraéngy, agu imbi: “Tu’ung kéta Mori Keraéng manga oné bahi-réha méu’y.”

Wintuk Oné Lonto Léok De Weki Serani

26Jari, co’o gé asé-ka’én? Émé lonto léok méu, poro néténg ata takung cao-ca: hiat cengata te mazmur, ata iwon te toing, ko téing si’ang de Mori Keraéng, ko widang mu’u luju agu lema emas, ko widang kudut pangongs mu’u luju agu lema emas situ. Ai sanggéd taung situ te pandé téti éta mosé de weki serani.

27Émé manga ata tiba widang mu’u luju agu lema emas, maram ata suas, ko telu taus, ko cengata kaut, paka manga ata bana te pangongd tombo situ.

28Émé toé manga ata pangongd tombo situ, céwé di’an, isé hema kauts oné lonto léok de weki serani, nuk kaut oné nai de run agu oné Mori Keraéng.

29Latang te sanggéd nabi – céwé di’an sua ko telu taun oné-mai isé te tombo, agu ata iwon idep apa situt tombo disé.

30Maik émé manga cengata ata bana oné lonto léok hitu, tiba si’ang oné-mai Mori Keraéng, hia hitu paka hema kauty.

31Ai néténg weki oné mai méu ngancéng pedé, wiga sanggés méu ngancéng nungku agu tiba mberes de Mori Keraéng.

32Widang de Nai Nggeluk te ba keréba di’a de Mori Keraéng, ngancéng petu le sanggéd nabi.

33Ai Mori Keraéng toé ngoéng te pandé ngai-ngaok, maik te ba hambor-libur.

34Cama ného oné sanggéd weki serani ata nggeluk, sanggéd inéwai paka hema kauts oné lonto léok de weki serani. Ai isé toé sendos te tombo. Isé paka tengguk taungs cama ného apa ata poli taé oné Adak Taurat.

35Émé isé ngoéng te pecing cao’cas, céwé di’an isé réi ronad oné mbaru de rud. Ai toé patun latang te inéwai kudut tombo oné lonto léok de weki serani.

36Ko, asa léng curup de Mori Keraéng, mai oné-mai méun? Ko hanang latang te méu kanang kali cain keréba di’a hitu?

37Émé hiat cengata caro weki run ca nabi, ko ata hiot tiba widang nggeluk, paka noing liha te apa so’ot tulis daku oné méu, perénta de Mori Keraéng.

38Maik émé toé pinga liha, méu kolé néka pinga hiam.

39Landing hitu asé-ka’é daku, rébok koém kudut haéng widang nubuat agu néka ré’ing ata siot tombo le mu’u luju agu lema emas.

40Maik sanggéd cao’ca paka ruda olo ali wintuk ata patun agu jepek.


  Share Facebook  |  Share Twitter

 <<  1 Korintus 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel