Alkitab Mobile SABDA
[VER] : [MANGGARAI]     [PL]  [PB] 
 <<  1 Korintus 16 >> 

Campé Latang Te Weki Serani Oné Yérusalém

1Émé réco séng kudut te sanggéd ata nggeluk, poro pandé le méu lorong agu toing daku latang te weki serani oné Galatia.

2Oné leso laring cain néténg minggu, nahé sanggés méu – téing lorong apa ata tiba de méu – cimpa koé cekoén, agu na’a, agu réco situ néka nongko du hitu di caig aku.

3Du caig aku, aku te jera ata, atat patun le méu latang te hitu, ba agu surak te karongd nggere-oné Yérusalém kudut tombo téing de méu situ.

4Émé sékék tu’ung paka ngo agu aku, itu po ngo cama agu akus.

Bet Di Paulus

5Aku kudut mai oné méuk émé poli liba oné Makédonia, ai aku paka liba oné tana hituk.

6Aram remo naisg aku te ka’éng cama agu méu oné Korintus, ko aram kudut ka’éng lawang cekeng cés, wiga méu ngancéng campé aku te ruda olon lako daku.

7Ai aku toé ngoéng te lélo méu mbalep nggitu kaut. Bengkes daku kudut remo béhéng ka’éng agu méu, émé henan le Mori Keraéng.

8Maik aku kudut ka’éng oné Éfésus dengkir leso adak Péntékostén,

9ai manga kin linga latang te aku kudut pandés gori ata dai méséd agu mengit, koném po manga ata léwangn.

Pisa Tarad Tura

10Émé cai hi Timotéus, anor di’a le méu kudut hia toé rantangy émé manga oné bahi-réha méu, ai hia pandé gori de Mori Keraéng cama ného akuy.

11Jari, néka manga ata oné-mai méu te rékéng jengge-li’o hia! Ata di’an campé hia, kudut hia ngancéng ruda olo lakon wiga selamaky, kudut hia mai koléy oné aku, ai aku cé’é ho’o géréng cai diha agu sanggéd asé-ka’é ca imbi situt iwod.

12Latang te asé-ka’é dité hi Apolos, dongkalin laku sorén kudut ngo la’at méu cama laing agu asé-ka’é ca imbi situt iwod, maik hia toé kéta kin gori te mai ho’o gi. Émé manga lingan cepisa, hia kudut maiy.

13Jerék di’a-di’a! Metek koé imbis! Rani agu mberes koé nais!

14Pandé sanggéd gori de méu le momang!

15Manga ca kolé tegi daku agu méu asé-ka’én. Pecingp le méu hi Stéfanas, agu haé kilon, isé ata laring cain teser oné Akhaya, agu isé poli oké moséd ciri keturu latang te sanggéd ata nggeluk.

16Landing hitu, lorong koé le méu ata nenggitu agu néténg ata siot lorong gori agu rébok do.

17Aku naka kétak ali cai di Stéfanas, hi Fortunatus agu hi Akhaikus, ai isé luing manga ranga de méu.

18Isé pandé ciar nai daku agu nai de méu. Hiang koé sanggéd ata nenggitu!

Tabé

19Tabé latang te méu, de weki serani oné-mai Asia Koé, oné-mai hi Akwila, oné-mai hi Priskila, agu sanggéd ata serani oné mbaru disé téi tabé do oné ngasang de Mori Keraéng latang te méu.

20Tabé latang te méu, oné-mai sanggéd asé-ka’é ca imbi. Téi koé tabé oné ata iwod ali omo nggeluk.

21Ali limé rug aku tulis surak ho’o: Tabé oné-mai hi Paulus.

22Céing ata toé momang Mori Keraéng, nahé niury. Maranatha!

23Widang de Mori Yésus loréng méuy.

24Momang daku loréng sanggés méu oné hi Kristus Yésus.


  Share Facebook  |  Share Twitter

 <<  1 Korintus 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel